މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ ވަގުތީ ގޮތުން ހިންގެވުމާއި ހަވާލުވެ ވަޑައިގެންހުންނެވި މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާ، މިއަދު އެ މިނިސްޓްރީގެ އިސްވެރިންނާ ބައްދަލުކުރައްވައިފިއެވެ.
މި ބައްދަލުކުރެއްވުމުގައި މިނިސްޓަރ މާރިޔާ، މިނިސްޓްރީގެ މަސައްކަތްތަކާ ގުޅޭގޮތުން މަޢުލޫމާތު ހޯއްދަވައި، ކުރިއަށް ރާއްވަވާފައިވާ ކަންތައްތަކާ ބެހޭގޮތުން މަޝްވަރާކުރެއްވިއެވެ.
ޑޮކްޓަރ ޢާއިޝަތު ރަމީލާގެ ޞިއްޙީ ޙާލުކޮޅު ހުރިގޮތުން މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަޤާމުން އިސްތިޢުފާ ދެއްވާފައިވަނީ އާދީއްތަދުވަހުއެވެ. މިނިސްޓްރީ ހިންގުން ވަގުތީ ގޮތުން ހަޔަރ އެޑިއުކޭޝަން މިނިސްޓަރާ ރައީސް ހަވާލު ކޮށްފައިވާ ކަން ރައީސް އޮފީހުން ހާމަކޮށްފައިވަނީ އާދީއްތަދުވަހުގެ ރެއެވެ.
ޑރ ރަމީލާ އިސްތިއުފާ ގަބޫލުކޮަށް އެކަމާއި ގުޅޭ ގޮތުން ރައީސް އޮފީހުން ނެރެފައިވާ ނޫސްބަޔާނުގައި ރައީސް ޑރ މުއިއްޒު ވިދާޅުވީ، އާލާސްކަންފުޅުގައި އުޅުއްވަމުންވެސް، މަގާމުގެ ހައިސިއްޔަތުން، ރާއްޖޭގެ ގާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް، ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ހިދުމަތްތަކަށްޓަކައި އިހްލާސްތެރިކަމާއެކު ޝުކުރު އަދާކުރައްވާ ކަމަށެވެ.
އަދި ޑރ ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށާއި ކުރިއަށް އޮތްތާނގައިވެސް ޑރ ރަމީލާގެ ހިދުމަތް ދިވެހި ގައުމަށް ލިބޭނެކަން ޔަގީން ކުރައްވާ ކަމަށް ރައީސް ވަނީ ވިދާޅުވެފައެވެ.
ރައީސް ވަނީ، ޑޮކްޓާ ރަމީލާގެ ސާބިތުކަމާއި ކެތްތެރިކަން އިތުރު ކުރައްވައި މާތްﷲ ގެ ތަނަވަސް ރަހްމަތްފުޅުން ރަމީލާއަށް އަވަސް އަދި ދާއިމީ ޝިފާއެއް މިންވަރު ކުރައްވައި އަދަށްވުރެ އުފާވެރި ފާގަތި މުސްތަގްބަލެއް މިންވަރުކުރެއްވުން އެދިވަޑައިގެން ދުއާ ކުރައްވާ ކަމަށް ވިދާޅުވެފައެވެ.
ޑރ ރަމީލާ ގެންދަވަނީ ކެންސަރުގެ ބައްޔަށް ފަރުވާ ހޯއްދަވަމުންނެވެ. މި ވަގުތުވެސް ހުންނެވީ ފަރުވާ ހޯއްދެވުމަށް އިންޑިޔާގައެވެ.
