ފެނަކައިގެ އާ އޮނިގަނޑެއް އެކުލަވައި، މުވައްޒަފުންގެ އަދަދު ކަނޑައަޅަށް އަންގައިފި

ފެނަކަ ކޯޕަރޭޝަންގެ މުވައްޒަފުންގެ އާ އޮނިގަނޑެއް އެކުލަވައިލައި، އެ ކުންފުނީގެ އޮޕަރޭޝަންތަކަށް ބޭނުންވާނެ ސީދާ އަދަދު ކަނޑައެޅުމަށް ރައްޔިތުންގެ މަޖިލީހުން މިއަދު އަންގައިފިއެވެ.

ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ރިޔާސަތު ބެލެހެއްޓެވި މިއަދުގެ ޖަލްސާގައި މިގޮތަށް ނިންމާފައިވަނީ މާލިއްޔަތު ކޮމިޓީން ތައްޔާރުކުރި ރިޕޯޓަކަށް ބިނާކޮށް، މަޖިލީހުގެ ތަޅުމުގައި ނެގުނު ވޯޓުގައި ބައިވެރިވި 53 މެންބަރުންގެ އިއްތިފާގުންނެވެ.

މި ނިންމުން ނިންމާފައިވަނީ އައްޑޫ ސިޓީގައި ފެނަކައިން 2021 އިން 2023 އަށް ހިންގި މަޝްރޫއުތަކާ ގުޅޭގޮތުން ތައްޔާރުކުރި ހާއްސަ އޮޑިޓް ރިޕޯޓުގައި ފާހަގަކޮށްފައިވާ ކަންބޮޑުވުންތަކާ ގުޅިގެންނެވެ. އެ ރިޕޯޓުގައިވާ ގޮތުން، އައްޑޫގައި އިން-ހައުސްކޮށް ހިންގި ހަތަރު މަޝްރޫއަކަށް މުވައްޒަފުން ނެގުމުގައި ކުންފުނީގެ ހިއުމަން ރިސޯސް ގަވާއިދުތަކާއި އެސްއޯޕީތަކާ ކަނޑައެޅިގެން ހިލާފުވެފައިވެއެވެ.

އޮޑިޓް ރިޕޯޓުން ހާމަވާ ގޮތުގައި، އެއްވެސް އޮނިގަނޑެއް ނެތި މި މަޝްރޫއުތަކަށް މުވައްޒަފުން އިތުރުކުރަމުން ގޮސްފައިވެއެވެ. އެގޮތުން 2023 ވަނަ އަހަރުގެ ނިޔަލަށް 158 މުވައްޒަފުން ވަކިވެފައިވާއިރު، އިތުރަށް 273 މުވައްޒަފުން ނަގާފައިވާކަން ވަނީ ފާހަގަކުރެވިފައެވެ. މީގެ ތެރޭގައި އެސިސްޓަންޓް މެނޭޖަރުންނާއި، ސުޕަވައިޒަރުން އަދި އިދާރީ މުވައްޒަފުން ހިމެނެއެވެ. އަދި މި މުވައްޒަފުން ނެގުމުގައި އޭރުގެ މެނޭޖިން ޑިރެކްޓަރު އަހުމަދު ސައީދު މުހައްމަދުގެ ރަސްމީ ހުއްދައެއް އޮތްކަން ލިޔެކިޔުންތަކުން އެނގެން ނެތް ކަމަށްވެސް ކޮމިޓީ ރިޕޯޓުގައި ބަޔާންކޮށްފައިވެއެވެ.

މި މައްސަލަތަކަށް ދާއިމީ ހައްލެއް ހޯދުމުގެ ގޮތުން، ފެނަކައިގެ ހުރިހާ ގޯތިތަކާއި ބްރާންޗުތަކަށް ބޭނުންވާ މުވައްޒަފުންގެ ހަގީގީ އަދަދު ދެނެގަނެ، ޒަމާނީ އޮނިގަނޑެއް އެކުލަވައިލުމަށްފަހު ކުރިއަށް އޮތް 30 ދުވަހުގެ ތެރޭގައި މާލިއްޔަތު ކޮމިޓީއަށް ހުށަހެޅުމަށް މަޖިލީހުން ވަނީ ލަފާދީފައެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ފެނަކައިގެ ހިންގުން ހަރުދަނާކުރުމުގެ ބޮޑު މަޝްރޫއެއް ފަށާފައިވާއިރު، އެ ކުންފުނީގެ މުވައްޒަފުންގެ އަދަދު މިހާރު ހުރީ 8,000 އާ ގާތްކުރާ އަދަދެއްގައެވެ. ކުންފުނި އިސްލާހުކުރުމުގެ ސިޔާސަތުގެ ދަށުން، އަމިއްލައަށް އެދިގެން ވަކިވާ މުވައްޒަފުންނަށް ހާއްސަ އިނާޔަތެއް ދިނުމަށް ހުޅުވާލި ފުރުސަތުގައި މިހާތަނަށް 108 މުވައްޒަފަކު ވަނީ ވަކިވާން އެދިފައެވެ.