ދާއިރާގެ ވޯޓުން މެންބަރުން ވަކިކުރެވޭ ގޮތަށް ހުށަހެޅި އިސްލާހު އަނބުރާ ގެންގޮސްފި

ރައްޔިތުންގެ މަޖިލީހުގެ މެންބަރުން ނިސްބަތްވާ ދާއިރާގެ ރައްޔިތުންގެ ވޯޓުން މަޖިލިސް މެންބަރުން ވަކިކުރެވޭ ގޮތަށް ގާނޫނޫ އަސާސީ އަށް ހުށަހެޅި އިސްލާހު އަނބުރާ ގެންގޮސްފިއެވެ

މި އިސްލާހު މަޖިލީހަށް ހުށަހެޅުއްވީ ދަ ޑިމޮކްރެޓްސްގެ ރައީސް، ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފެވެ. މި އިސްލާހު އިއްޔެގެ ވަގުތެއްގައި އަނބުރާ ގެންދަވާފައިވާ ކަމަށް ރިޔާސަތުން މިއަދު ވަނީ އިއުލާންކުރައްވާފައެވެ.

ހަސަން ހުށަހަޅުއްވި އިސްލާހުގައި ވަނީ ގާނޫނުއަސާސީގެ 73 ވަނަ މާއްދާގެ (ރ)ގެ ފަހަތަށް (ބ) ގެ ގޮތުގައި އަކުރެއް އިތުރު ކުރުމަށެވެ. އެ އަކުރުގައި މަޖިލީހުގެ މެންބަރު ކަމުން ވަކިވާނެ ފަސް ހާލަތެއް ބަޔާން ކޮށްފައިވެއެވެ.

ހަސަން ލަތީފް ގާނޫނުއަސާސީއަށް ގެންނަ ހުށަހެޅި އިސްލާހުގައިވާ ގޮތުން:

1. މެންބަރުގެ އަމިއްލަ އިސްނެގުމަށް އިންތިހާބުވި ޕާޓީއަކުން ވަކިވުން ނުވަތަ އެހެން ސިޔާސީ ޕާޓީ އަކަށް ބަދަލުވުން
2. އަމިއްލަ ގޮތުން އިންތިހާބުވެފައިވާ މެންބަރަކު ޕާޓީއެއްގެ މެންބަރަކަށްވުން
3. ސިޔާސީ ޕާޓީއެއްގެ މެންބަރެއްގެ ހައިސިއްޔަތުން މަޖިލީހަށް އިންތިހާބުވި މެންބަރަކު، އެ ޕާޓީގެ ނިންމުމަކާ ހިލާފަށް މަޖިލީހުން ނުވަތަ މަޖިލީހުގެ ކޮމިޓީއެއްގައި ނިންމާ ނިންމުމެއްގައި ވޯޓު ދިނުމުގެ ސަބަބުން ޕާޓީގެ އަސާސީ ގަވައިދާ އެއްގޮތަށް އޭނާ އިންތިހާބުވި ދައުރުގެ ތެރޭގައި އޭނާ ޕާޓީގެ މެންބަރުކަމުން ވަކިކުރުން
4. ސިޔާސީ ޕާޓީއެއްގެ މެންބަރެއްގެ ހައިސިއްޔަތުން މަޖިލީހަށް އިންތިހާބުވި މެންބަރަކު، ޕާޓީގެ ނިންމުމާ ހިލާފަށް ވޯޓު ދިނުން ފިޔަވައި، އެނޫން ސަބަބަކައްޓަކައި ޕާޓީގެ މެންބަރުކަމުން ވަކިކުރާ ހާލަތުގައި، އޭނާ އިންތިހާބުވީ ދާއިރާގެ ވޯޓު ދިނުމުގެ ހައްގު ލިބިފަިއވާ މީހުންގެ އަގުލަބިއްޔަތުން އޭނާ އެ މަގާމުން ވަކިކުރުމަށް ނިންމުން
5. މަޖިލިސް މެންބަރަކު ވަކިކުރަން، އެ ދާއިރާއަކަށް ވޯޓު ލުމުގެ ހައްގު ލިބިފައިވާ އާބާދީގެ ވަކި އިންސައްތައެއްގެ ރައްޔިތުން ސޮއިކޮށް މަޖިލިސް އަށް ހުށަހަޅާ ޕެޓިޝަނެއް މަޖިލިހުގެ ކަމާބެހޭ ކޮމިޓީން ދިރާސާކޮށް، އެ މެންބަރަކު މަގާމުން ވަކި ކުރުމަށް އެ ދާއިރާގެ ވޯޓު ލުމުގެ ހައްގު ލިބިފަިއވާ އާބާދީގެ މެދުގައި އާއްމު ވޯޓެއް ނަގަން ނިންމައި، އެ ވޯޓުލާ މީހުންގެ އަގުލަބިއްޔަތުން އެ މެންބަރަކު މަގާމުން ވަކިކުރުމަށް ނިންމުން.

މަޖިލީސް މެމްބަރުން އިންތިހާބުވި ޕާޓީ ނޫން އެހެން ޕާޓީއަކަށް ބަދަލުވެއްޖެ ނަމަ ގޮނޑި ގެއްލޭނެ އުސޫލު ވަނީ ފާސްކޮށް ރައީސުލްޖުމްހޫރިއްޔާ ވަނީ ތަސްދީގުވެސް ކޮށްފައެވެ. އެހެން ނަމަވެސް އެ ގާނޫނުގައި މެމްބަރުން ވަކިވާގޮތެއް ބަޔާންކޮށްފައިނުވެއެވެ. އެހެން ނަމަވެސް އޭގައި އޮންނަނީ ޕާޓި ބަދަލުވެއްޖެ ނަމަ އެކަން އިލެކްޝަނަށް އަންގައި އަމިއްލައަށް އިސްތިއުފާދިނުމަށެވެ.

މި އިސްލާހުގެ އިތުރުން އިލެކްޝަންސް ކޮމިޝަނަށް މެންބަރުން ހޯދުމުގެ ބާރު ރައްޔިތުންގެ މަޖިލީހަށް ލިބޭ ގޮތަށް ހޮޅުދޫ ދާއިރާގެ މެންބަރު ޔޫނުސް އަލީ ހުށަހަޅާފައިވާ އިސްލާހެއް ވެސް ވަނީ އަނބުރާ ގެންގޮސްފައެވެ.