ރައްކާތެރިގޮތުގައި އިންޓަނެޓު ބޭނުންކުރުމަށް ނ. އަތޮޅު މަދަރުސާގެ ދަރިވަރުންގެ ކިބައިން އެސިސްޓެންޓް ކޮމިޝަނަރ އޮފް ޕޮލިސް މޫސާ ޢަލީ އެދިވަޑައިގެންފިއެވެ.
ނ. އަތޮޅު މަދަރުސާގެ ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާމް ނިންމުމުގެ ރަސްމިއްޔާތުގައި ވާހަކަ ދައްކަވަމުން، އެސިސްޓެންޓް ކޮމިޝަނަރ ވަނީ ޓްރެފިކް މޮނީޓާސް ޕްރޮގްރާމް ނިންމި ދަރިވަރުންނަށް މަރުހަބާ ވިދާޅުވެ ޕްރޮގްރާމުގެ ތެރެއިން ދަސްކުރި ކަންކަން ހެޔޮގޮތުގައި ބޭނުންހިފައި ނަމޫނާ ދަރިވަރުންތަކަކަށް ވުމަށް އެދިވަޑައިގެންފައެވެ. އަދި ސައިބަރ ކްރައިމްގެ މައްސަލަތަކުން ރައްކާތެރިވެތިބުމަށާއި ރައްކާތެރިގޮތުގައި އިންޓަނެޓު ބޭނުންކުރުމަށް ދަރިވަރުންނަށާއި ބެލެނިވެރިންނަށް އިލްތިމާސްކުރެއްވިއެވެ.
ރޯޑް ސޭފްޓީ އެވެއާނަސް އެންޑް ޕްރިވެންޝަނާއި މަނަދޫ ޕޮލިސް އަދި ނ. އަތޮޅު މަދަރުސާ ގުޅިގެން އޮކްޓޫބަރު 19 އިން ފަސްދުވަހުގެ މުއްދަތަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާމުގައި ނ. އަތޮޅު މަދަރުސާގެ ގްރޭޑް 8، 7، 6 ގެ 35 ދަރިވަރުން ބައިވެރިވިއެވެ.
މި ޕްރޮގްރާމުގައި ބައިވެރިވި ދަރިވަރުންނަށް ޓީމް ބިލްޑިންގ ހަރަކާތްތަކާއި، މަސައްކަތުގައި ކާމިޔާބު ހޯދުމަށްޓަކައި މޯޓިވޭޝަނަލް ސެޝަނެއް ކުރިއަށް ގެންގޮސްފައިވެއެވެ. އަދި އާންމުންނާ ބައްދަލުވެ ވާހަކަދެއްކުމުގައި އަދި އާންމު ދިރިއުޅުމުގައި ވެސް ބަސްމަގު ބަހައްޓަންވީގޮތްތައް ކިޔައިދިނުމަށްޓަކައި ކޮމިއުނިކޭޝަން ސްކިލް ސެޝަނަކާއި، ދިމާވާ ހާލަތަކުން ސަލާމަތްވުމަށް ބޭނުންވާ ބޭސިކް ސެލްފް ޑިފެންސް އުކުޅުތައް ދަސްކޮށްދީފައިވާ ކަމަށް ފުލުހުން ވަނީ ބުނެފައެވެ.
އޭގެ އިތުރުން، މަގުމަތީގެ ގަވާއިދުތަކަށް އަހުލުވެރިކުރުވުމަށް ގާނޫނާއި ގަވާއިދުތައް ކިޔައިދީ، މަގުމަތީގައި ދިމާވާ ހާދިސާތަކުން ސަލާމަތްވުމަށް ސަމާލުކަން ދޭންޖެހޭ ކަންކަމާއި، ޓްރެފިކް މޮނިޓަރުންގެ ރޯލުތަކާއި، ޓްރެފިކް ސައިންތަކާއި، ލައިސަންސް ނަގައިގެން ދުއްވަން ކަނޑައެޅިފައިވާ އުސޫލުތަކުގެ އިތުރުން ސިއްހީ ކުއްލި ހާލަތެއްގައި އަވަސް ފަރުވާ ދިނުމަށްޓަކައި ކުރަންޖެހޭ ކަންކަން ކިޔައިދީފައިވާ ކަމަށާއި މި ޕްރޮގްރާމް ކުރިއަށް ގެންދިއުމަށްޓަކައި ނ. އަތޮޅު މަދަރުސާގެ ޕްރިންސިޕަލާއި މުދައްރިސުންގެ ފަރާތުން ވަރަށް ފުރިހަމަ އެއްބާރުލުމެއް ލިބިފައިވާ ކަމަށް ފުލުހުން ބުނެއެވެ.
ޓްރެފިކް މޮނީޓާސް ޕްރޮގްރާމުގެ އިތުރުން، ނ. އަތޮޅުގައި މަސައްކަތްކުރާ ބައެއް ފުލުހުންނާއި، އާންމު ރައްޔިތުންނަށް ވެސް މައުލޫމާތުދީފައިވެއެވެ. އެގޮތުން އެއްގަމު ދަތުރުފަތުގެ ގާނޫނަށް އަހުލުވެރިކުރުވުމަށް މަނަދޫ، ޅޮހި އަދި މާޅެންދޫގައި މައުލޫމާތުދިނުމުގެ ސެޝަންތައް ކުރިއަށް ގެންގޮސްފައިވެއެވެ.
މި ރަސްމިއްޔާތު ޝަރަފުވެރިކޮށްދެއްވީ ހެޑް އޮފް އޮފީސް އޮފް ދަ ކޮމިޝަނަރ، އެސިސްޓެންޓް ކޮމިޝަނަރ އޮފް ޕޮލިސް މޫސާ ޢަލީއެވެ. މި ރަސްމިއްޔާތުގައި، ރޯޑް ސޭފްޓީ އެވެއާނަސް އެންޑް ޕްރިވެންޝަން ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު ފަސީހް، ނ. އަތޮޅު ކޮމާންޑަރު އިންސްޕެކްޓަރ އޮފް ޕޮލިސް ޝުޢައިބް ޢަބްދުއްރަހްމާން އަދި ނ. އަތޮޅު މަދަރުސާގެ އިސްވެރިން ބައިވެރިލެއްވިއެވެ.
