ގާނޫނު އަސާސީގެ ދިފާއުގައޭ ކިޔާއިރު އެޔަށް ފައިން އެރީވެސް އެމްޑީޕީން: މެމްބަރު ފަޒީލް

ގާނޫނުއަސާސީގެ ދިފާއުގައޭ ކިޔާފައި އެމްޑީޕީއަކަށް އެއްވެސް ވާހަކައެއް ނުދެއްކޭނެ ކަމަށާއި ގާނޫނު އަސާސީގެ މައްޗަށް ފައިން އެރީ ވެސް އެމްޑީޕީން ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު މުހައްމަދު ފަޒީލް ވިދާޅުވެއްޖެއެވެ.

"އަސްލު ޓީވީ" ގެ ބާބު ޕްރޮގްރާމްގައި ވާހަކަފުޅު ދައްކަވަމުން މެންބަރު ވިދާޅުވީ އެމްޑީޕީން ގާނޫނު އަސާސީ ވީދައި، މަޖިލީހުގެ ތަޅުމުގައިވެސް ގާނޫނު އަސާސީގެ މައްޗަށް ފައިން އެރި ކަމަށެވެ.

މެމްބަރު ވަނީ އެންޓި-ޑިފެކްޝަން ގާނޫނު ފުރަތަމަ އެމްޑީޕީން ފާސްކުރިއިރު، އެމްޑީޕީގެ ބޭފުޅުން ކޮބައިތޯ ސުވާލު ކުރައްވާފައެވެ.

"އަޅުގަނޑުމެން ހަމައެކަނި މި ކުރިކަމަކީ، މި ގާނޫނުއަސާސީ ފުށު އަރާތީވެ، ގާނޫނުއަސާސީއަށް އިސްލާހެއް އިތުރު މިކޮށްލީ" މެމްބަރު

މެމްބަރު ވިދާޅުވީ ގާނޫނު އަސާސީގެ ދިފާއުކުރުން ނަމުގައި އެމްޑީޕީން އެ ނިކުންނަނީ ސިޔާސީ ބޭނުއްމެއްގައި ކަމަށާއި އެމްޑީޕީއަކީ އެއްވެސް އިރެއްގައި ގާނޫނަށް ބޯލަނބާ ބައެއް ނޫންކަމަށެވެ.

"އެބޭފުޅުން ވެރިކަމުގައި ނެތީވިއްޔާ ރާއްޖޭގެ ޓޫރިޒަމްވެސް ބޮއިކޮޓް ކުރަންވީ، މަގުމަތިވެސް ހަލަބޮލި ކުރަންވީ. ގައުމަށް ކިތަންމެ ބޮޑު ގެއްލުމެއް ލިބުނަސް، އެއީ އެބޭފުޅުންގެ ހާލަތު." މެންބަރު މުހައްމަދު ފަޒީލް

މެމްބަރު މުހައްމަދު ފަޒީލް ވިދާޅުވީ ގާނޫނުއަސާސީގެ ދިފާއުގައި އެމްޑީޕީން ނިކުންނާކަށް ނުޖެހޭނެ ކަމަށާއި، ޕީއެންސީން ތިބީ ގާނޫނުއަސާސީގެ ދިފާއުގައި ނިކުމެ ކަމަށެވެ. މެމްބަރު ވިދާޅުވީ ގާނޫނުތަކަށް ބޯ ނުލެނބުމަކީ އެމްޑީޕީން ދެކޭ ގޮތުގައި ޑިމޮކްރަސީ ކަމަށެވެ.

ކިތަންމެ ވަރަކަށް ސިޔާސީ ހަރަކާތްތައް އެމްޑީޕީން ހިންގި ކަމުގައި ވިޔަސް، ވެރިކަމެއް ވައްޓައެއް ނުލެވޭނެ ކަމަށާއި މިހާރު ރައްޔިތުން އެއަށް ވުރެ ހޭލުންތެރި ކަމަށް ދާންދޫ ދާއިރާގެ މެމްބަރު ވިދާޅުވިއެވެ.

ހަމައެއާއެކު، މިހާރުގެ ރައީސް ޑރ މުހައްމަދު މުއިއްޒު މަސައްކަތް ކުރައްވަނީ ގައުމު މިހާރު އޮތް ހާލަތުން އަރައިގަންނަން ކަމަށާއި، ޓޫރިޒަމް ގާނޫނަށް ވެސް އިސްލާހުތަކެއް ގެންނަންޖެހޭ ކަމަށް ވިދާޅުވިއެވެ.

މެމްބަރު މުހައްމަދު ފަޒީލް ވިދާޅުވީ، ޑޮލަރުގެ ދަތިކަން ދިވެހި ރައްޔިތުންނަށް ދިމާވެފައިވާއިރު، އޭގެ މައިގަނޑު އަސްލަކީ މިދިޔަ ސަރުކާރުން ޗާޕުކުރި ފައިސާ ކަމަށެވެ.

ގާނޫނު އަސާސީގެ ދިފާއުގެ ނަމުގައި ހިންގާ ހަރަކާތަކީ ގާނޫނު އަސާސީއަށް ގެނައި އިސްލާހުތަކާއެކު، ވިޔަފާރިވެރިންތަކެއް އަޑީގައި ތިބެގެން، އެމްޑީޕީ އާއެކު ހިންގާ ހަރަކާތެއް ކަމަށް މުހައްމަދު ފަޒީލް ތުހުމަތު ކުރެއްވިއެވެ.