ތައިލެންޑްގެ ސަފީރުކަމަށް ފުއާދު އައްޔަންކުރުމަށް ރުހުން ދީފި

ތައިލެންޑަށް ރާއްޖެއިން ކަނޑައަޅާ ސަފީރަށް އިލެކްޝަން ކޮމިޝަންގެ ކުރީގެ ރައީސް ފުއާދު ތައުފީގު އައްޔަން ކުރަން ޚާރިޖީ ގުޅުންތަކުގެ ކޮމިޓީން ފާސްކޮށްފިއެވެ.

އީސީގެ ދައުރު ހަމަވެ، ފުއާދު ވަޒީފާއިން ވަކިވެވަޑައިގަތީ މިދިޔަ ނޮވެމްބަރު މަހުގެ 23 ވަނަ ދުވަހުގައެވެ.

ފުއާދުގެ ދައުރު ހަމަވުމާއެކު ރައީސް ޑރ މުހައްމަދު މުއިއްޒު ވަނީ ތައިލެންޑްގެ ސަފީރުކަމަށް ފުއާދުގެ ނަން ރައްޔިތުންގެ މަޖިލީހަށް ހުށަހަޅުއްވާފައެވެ. އެގޮތުން މިދިޔަ މަހު 25 ގައި އޮތް ރައްޔިތުންގެ މަޖިލީހުގެ ޖަލްސާގައި އެ މައްސަލަ ދިރާސާކުރުމަށް ވަނީ ޚާރިޖީ ކޮމިޓީއަށް ފޮނުވިއެވެ.

ޚާރިޖީ ކޮމިޓީގައި މިއަދު 10 މެންބަރުން ބައިވެރިވެފައިވާއިރު، އޭގެ ތެރެއިން 9 މެމްބަރުން ވަނީ ތައިލެންޑްގެ ސަފީރުކަމަށް ފުއާދު އައްޔަންކުރުމަށް ފެންނަ ކަމަށް ވޯޓު ދެއްވާފައެވެ. ކޮމިޓީއިން ނިންމީ ތައިލެންޑްގެ ސަފީރުކަމަށް، ފުއާދުގެ ޝަރުތު ހަމަވާކަމަށެވެ. ފުއާދަކީ މަގާމަށް އެކަށީގެންވާ މީހެއް ކަމަށް ކޮމިޓީއިން ވަނީ ނިންމާފައެވެ.

ފާހަގަކޮށްލެވޭ ގޮތުގައި،ފުއާދަކީ ސަރުކާރުގައި ދިގު މުއްދަތަކަށް ޚިދުމަތް ކުރެއްވި، ތަޖުރިބާކާރު ބޭފުޅެކެއެވެ.