ފުރަތަމަ 6 މަސް ނިމުނުއިރު ރަސްމީ ރިޒާވުގައި ހުރީ 832 މިލިޔަން ޑޮލަރު : އެމްއެމްއޭ

އަހަރުގެ ފުރަތަމަ 6 މަސް ދުވަސް ނިމުނުއިރު ރަސްމީ ރިޒާވުގައި 832 މިލިޔަން ޑޮލަރު ހުރި ކަމަށް މަރުކަޒީ ބޭންކުގެ ތަފާސްހިސާބުތަކުން ދައްކައިފިއެވެ.

މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ކޮންމެ މަހަކު ނެރޭ ތަފާސްހިސާބުތައް ދައްކާ ގޮތުން މިއަހަރު ޖޫން މަސް ނިމުނު އިރު ރަސްމީ ރިޒާވުގައި ހުރި މިންވަރު މެއި މަހާއި އަޅާބަލާއިރު ވަނީ އިތުރުވެފައެވެ.

ޖޫން މަހުގެ ނިޔަލަށް ރަސްމީ ރިޒާވުގައި 832.4 މިލިޔަން ޑޮލަރު ހުރިއެވެ. މެއި މަހު ރަސްމީ ރިޒާވުގައި ހުރީ 815.8 މިލިޔަން ޑޮލަރެވެ. އެހެން ކަމުން މަހުން މަހަށް އަޅާކިޔާއިރު، މިއީ 2 އިންސައްތައިގެ ކުރިއެރުމެކެވެ.

އެމްއެމްއޭގެ ތަފާސްހިސާބުތައް ދައްކާގޮތުން ރަސްމީ ރިޒާވަށް ކުރިއެރުން ލިބިފައިވީނަމަވެސް ބޭނުން ކުރެވޭ ރިޒާވް ވަނީ ދަށްވެފައެވެ.

ޖޫން މަހުގެ ނިޔަލަށް ބޭނުން ކުރެވޭ ރިޒާވުގައި ހުރީ 203 މިލިޔަން ޑޮލަރުގައެވެ. މި އަދަދު އޭގެ ކުރީ މެއި މަހު ހުރީ 217.9 މިލިޔަން ޑޮލަރުގައެވެ. މިއީ 6.8 އިންސައްތައިގެ ދަށްވުމެކެވެ.

ރަސްމީ ރިޒާވް އިތުރުވި ނަމަވެސް ބޭނުން ކުރެވޭ ރިޒާވް ދަށްވެފައި މިވަނީ ކުރު މުއްދަތަށް ދައްކަން ޖެހޭ ބޭރުފައިސާގެ އިލްތިޒާމުތަކަށްވާ އަދަދު އިތުރުވުމާއި ގުޅިގެންނެވެ. މި އިލްތިމާޒްތަކަށް، މެއި މަހު 742.5 މިލިޔަން ޑޮލަރު ދައްކާފައިވާއިރު، ޖޫން މަހު 774.5 މިލިޔަން ޑޮލަރު ވަނީ ދައްކާފައެވެ.