ބޭރުގެ ކުންފުންޏަކަށް ރަސްމާލެއިން ބިން ދިން މައްސަލަ ހުއްޓުވަން ސްޕްރީމް ކޯޓަށް ހުށައަޅައިފިން: އަލީ ހުސެއިން

ސަރުކާރުން ގަވައިދާ ޙިލާފަށް ބޭރުގެ ކުންފުންޏަކަށް ރަސްމާލެއިން ބިން ދޫކުރި މައްސަލަ އާއި މެދު ހިންހަމަ ނުޖެހިގެން އެކަން ހުއްޓުވަން ސްޕްރީމް ކޯޓަށް ހުށައަޅައިފި އެވެ.

ސަރުކާރުން ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ތަރައްގީ ކުރަމުން އަންނަ އެންމެ ބިޔަ އެއް ޕްރޮޖެކްޓް ކަމަށްވާ ރަސްމާލެ ޕްރޮޖެކްޓްގައި ދުބާއީގެ ކުންފުންޏަކަށް "މޯލްޑިވްސް ވޯޓަފްރޮންޓް އެންޑް މެރީނާ" ތަރައްގީ ކުރަން ވަނީ 99 އަހަރަށް ކުއްޔަށް ދިނުމުގެ އެގްރިމެންޓެއް ހަދާފަ އެވެ.

ދުބާއީގެ އީގަލް ހިލްސް ކުންފުންޏާ އެކު ރަސްމާލޭގައި ތަރައްގީކުރާ "މޯލްޑިވްސް ވޯޓަފްރޮންޓް އެންޑް މެރީނާ" މަޝްރޫއުގެ ދަށުން ތަރައްގީގެ މަޝްރޫއުތަކެއް ހިންގަމުން އަންނަ މައްސަލަ އަށް ސަރުކާރަށް އިދިކޮޅު ފަރާތްތަކުގެ ވަރަށް ބޮޑު ފާޑުކިއުންތައް ވެސް ދަނީ އަމާޒުވަމުންނެވެ.

ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި މަޝްހޫރު ގާނޫނީ ވަކީލް އަލީ ހުސެއިން ވަނީ މި ކަމަކީ ގާނޫނާއި ޙިލާފަށް ކުރަމުންދާ ކަމެއް ކަމަށް ބުނެ އެކަން މިހާރުން މިހާރަށް ހުއްޓުވުމަށް ސުޕްރީމް ކޯޓަށް މައްސަލައެއް ހުށައަޅާފަ އެވެ.

މި މައްސަލަ އާއި ގުޅޭގޮތުން އަލީ ހުސެއިން "އަސްލުޓީ" އަށް މިރޭ ބުނީ މި މައްސަލަ އެމަނިކުފާނު ސްޕްރީމް ކޯޓަށް ހުށައަޅާފައިވާ ކަމަށެވެ. ނަމަވެސް އަދި މި މައްސަލަ ސްޕްރީމް ކޯޓަށް ބަލައިގަނެފަިއވާ ކަމެއް އަދި ނޫން ކަމެއް ސާފެއް ނުވެ އެވެ.

"ރަސްމާލޭ ބޮޑު މަޝްރޫއު ބޭރުގެ [ދުބާއީގެ އީގާލްސް ހިލްސް ކުންފުނި } އަށް ސަރުކާރުން ދީފައިވަނީ ސީދާ ގާނޫނާއި ޙިލާފަށް. އެކަން ބަލަން ޖެހޭނެ. އެ މައްސަލަ ސްޕްރީމް ކޯޓަށް ހުށައަޅައިފިން." އަލީ ހުސެއިން ވިދާޅުވި އެވެ.

ސަރުކާރުން މި މަޝްރޫއު ދޫބާއީގެ ކުންފުންޏަކަށް 99 އަހަރަށް ދީފައިވަނީ އިންސާފުން ނޫން ކަމަށާއި، މި އެގްރިމެންޓް ހަދާފައިވާ ގޮތް ބައްލަވާނެ ކަމަށް އިދިކޮޅުގެ ސިޔާސީ ލީޑަރު ކުރީގެ ރައީސް އަބުދުﷲ ޔާމީން އަބުދުލް ގައްޔޫމް ވެސް ވަނީ ދާދި ފަހަކުން ވިދާޅުވެފަ އެވެ.

ރަސްމާލެ އިން 500 ހެކްޓަރރުގެ ބިން ބޭރުގެ ކުންފުންޏަކަށް އަބަދަށް ދޫކޮށްލުމުގެ ހުރިހާ މައުލޫމާތެއް ހިންގާފައިވަނީ އުސޫލުން ބޭރުން ކަމަށް ވިދާޅުވެ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވެސް ވަނީ ކަންބޮޑުވުން ފާޅުކުރައްވައި ބަޔާންނެއް ނެރެފަ އެވެ.

ފައްޔާޒް އާއްމުކުރި ބަޔާނެއްގައި ބުނީ ރަސްމާލޭގެ ބިމުން ލިބޭނެ ކަމަށް ބެލެވޭ މާލީ ފައިދާއަށް ބަލައި އަގުމަގުކުރުމާއި އެބިން ދޭޝަރުތުތަކާއި އާމްދަނީ ލިބޭނެ ގޮތެއް އެނގެން ނެތް ތަނުގައި ބޭރުބައެއްގެ އަތް މައްޗަށް ދޫކޮށްލާ 500 ހެކްޓަރު ދިވެހި ދައުލަތުން ހަރަދުކޮށްގެން ހިއްކަމުންދާ ރަސްމާލޭގެ 500 ހެކްޓަރުގެ ބިން ބޭރުގެ ކުންފުންޏަކަށް ދޫކޮށްލުމަށް މިސަރުކާރުން ވެފައިވާ އެއްބަސްވުމުގެ އެއްވެސް ތަފްސީލެއް ހާމަކޮށްފައިނުވާކަމަށެވެ.