ތައިލެންޑުގައި ފެންބޮޑުވުމުގެ ގެއްލުންތައް 320 މިލިޔަން ޑޮލަރަށް

މިދިޔަ ހަފްތާ ބަންދުގައި މެދުކެނޑުމެއްނެތި ބޯކޮށް ވާރޭވެހުމުގެ ސަބަބުން ތައިލެންޑުގެ ވެރިރަށް ބެންކޮކްގެ ބޮޑު ސަރަޙައްދެއްގައި ފެންބޮޑުވެ، އެތައް ހާސް ބަޔަކު ހާލުގައި ޖެހި، އެތައް މިލިއަން ޑޮލަރެއްގެ ގެއްލުންތައް ލިބިއްޖެއެވެ.

އިޤްތިޞާދީ މާހިރުން ލަފާކުރާ ގޮތުގައި، މި ފެންބޮޑުވުމުގެ ހާދިސާގެ ސަބަބުން ތައިލެންޑުގެ އިޤްތިޞާދަށް މަދުވެގެން 11 ބިލިއަން ބާތު (327 މިލިއަން ޑޮލަރު) ގެ ބޮޑު ގެއްލުމެއް ލިބޭނެއެވެ. އަދި ހާލަތު ރަނގަޅުނުވެއްޖެނަމަ މި ޢަދަދު މިއަށްވުރެ އިތުރުވުން އެކަށީގެންވެއެވެ.

ތައިލޭންޑުގެ ދާޚިލީ ވުޒާރާއިން ނެރުނު ބަޔާނެއްގައި ބުނީ، ފެންބޮޑުވެފައިވާ ސަރަޙައްދުތަކުގައި 80،000 އަށްވުރެ ގިނަ މީހުން ގެއިން ބޭރަށް ނުނުކުމެވި ތާށިވެފައިވާ ކަމަށެވެ. އަދި އެ ފަރާތްތަކަށް އެހީތެރިކަން ފޯރުކޮށްދިނުމަށް ޚާއްސަ އުޅަނދުފަހަރު ބޭނުންކުރަމުން އަންނަ ކަމަށްވެސް އެ ވުޒާރާއިން ބުންޏެވެ.

އެ ވުޒާރާއިން އިތުރަށް ބުނީ، ސަރުކާރުގެ އަމާޒަކީ ފެންބޮޑުވެފައިވާ މުއްދަތާއި، ފެންހިނދޭފަހުން، މަދުވެގެން ހަތް ދުވަހުގެ މުއްދަތަކަށް ހާލުގައި ޖެހިފައިވާ ހުރިހާ ފަރާތްތަކަށް ދުވާލަކު ތިން އިރުގެ ކާނާ ފޯރުކޮށްދިނުން ކަމަށެވެ.

ތައިލެންޑަކީ ދެކުނުއޭޝިއާ ސަރަޙައްދުގެ ދެވަނައަށް އެންމެ ބޮޑު އިޤްތިޞާދަށް ވާއިރު، މިދިޔަ އަހަރުވެސް އެންމެ ތިން ދުވަހުގެ ތެރޭގައި 630 މިލިމީޓަރުގެ ވާރޭވެހި ދެކުނުގެ ސަރަޙައްދުތަކުގައި ފެންބޮޑުވުމުގެ ސަބަބުން 145 މީހުން މަރުވެ، އުމްރާނީ ވަޞީލަތްތަކަށް ބޮޑެތި ގެއްލުންތަކެއް ލިބިފައިވެއެވެ.

ސެޕްޓެމްބަރު 16 އިން ފެށިގެން ތައިލެންޑުގެ 41 ޕްރޮވިންސަކަށް މި ފެންބޮޑުވުމުގެ އަސަރުކޮށްފައިވާއިރު، މި ކާރިސާގައި މިހާތަނަށް މަދުވެގެން 8 މީހުން ވަނީ މަރުވެފައެވެ. އަދި 580,000 އަށްވުރެ ގިނަ ގެދޮރަށް ވަނީ އެކިވަރުގެ ގެއްލުންތައް ވެފައެވެ.

ބެންކޮކް ސިޓީ އެޑްމިނިސްޓްރޭޝަނުން މަޢުލޫމާތު ދޭ ގޮތުގައި، އެ ސިޓީން އެކަނިވެސް މަދުވެގެން 5,901 މީހަކު ވަނީ މި ކާރިސާއާ ގުޅިގެން ޤާއިމުކޮށްފައިވާ 234 ވަގުތީ ހިޔާތަކަށް ބަދަލުކޮށްފައެވެ.