20 ވަނަ ހޮޓެލް އޭޝިއާ އެގްޒިބިޝަން ފަށައިފި

20 ވަނަ ހޮޓެލް އޭޝިއާ އެގްޒިބިޝަން މިއަދު ފަށައިފިއެވެ.

މި ފަހަރުގެ އެބްޒިބިޝަން ކުރިއަށް ދަނީ ހުޅުމާލޭ ސިންތެޓިކް ޓްރެކްގަ އެވެ. ރިސޯޓް އޮޕަރޭޓަރުންނާއި، ވިޔަފާރިވެރިންނާއި، ޝެފުން ފަދަ ފަރާތްތަކުގެ ބައިވެރިވުމާއެކު ކުރިއަށްގެންދާ މި އެގްޒިބިޝަނަކީ ރާއްޖޭގައި ބާއްވާ އެންމެ ކާމިޔާބު އެއް އެގްޒިބިޝަނެވެ.

ހުޅުމާލޭ ސިންތެޓިކް ޓްރެކްގައި މިއަދު ބޭއްވި ހާއްސަ ރަސްމިއްޔާތެއްގައި 20 ވަނަ ހޮޓެލް އޭޝިއާ އެގްޒިބިޝަން ރަސްމީކޮށް ހުޅުވައިދެއްވީ ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން އެވެ.

މި ރަސްމިއްޔާތުގައި ވަޒީރު ވިދާޅުވީ ބޭރުގެ ސަޕްލަޔަރުންނާއި، ހޮޓެލް އޮޕަރޭޓަރުންގެ އިތުރުން ދާއިރާގެ ފަންނީ މީހުންގެ ބައިވެރިވުން މި އެގްޒިބިޝަނުން ވަރަށް ރަނގަޅަށް ފެންނަމުންދާކަމަށެވެ. އަދި މިއީ ފަތުރުވެރިކަމުގެ ސިނާއަތްކުރިއެރުވުމުގައި މުހިންމު ދައުރެއް އަދާކުރާ އެގްޒިބިޝަނެއްކަމަށް ވަޒީރު ވިދާޅުވިއެވެ.

ތިން ދުވަހުގެ މުއްދަތަކަށް ކޮންމެ ދުވަހަކު ހެނދުނު 10އިން އިރުއޮއްސި 7ޖަހަންދެން މި އެގްޒިބިޝަން ކުރިއަށްދާނެއެވެ. ރާއްޖޭގެ ފަތުރުވެރިކަމުގެ ދާއިރާއަށް ޚާއްސަކޮށްގެން ބާއްވާ މި އެގްޒިބިޝަންގައި މި އަހަރު 45 ޤައުމުން ބައިވެރިވެއެވެ. އަދި 200 ކުންފުނިން މި ފަހަރުގެ އެގްޒިބިޝަންގައި ބައިވެރިވެއެވެ.

އަދި 200 ކުންފުނިން މި ފަހަރުގެ އެގްޒިބިޝަންގައި ބައިވެރިވެއެވެ. އޭގެތެރޭގައި ރާއްޖެއާއި ރާއްޖެއިން ބޭރުގެ ކުންފުނިތައް ހިމެނެއެވެ. މިފަހަރުގެ އެގްޒިބިޝަންގައި ވެސް، ހޮސްޕިޓަލިޓީ ދާއިރާ އާއި ރިސޯޓް ސަޕްލައި އަދި ކަލިނަރީ ދާއިރާގެ ސްޓޭކް ހޯލްޑަރުން ބައިވެރިވެއެވެ.

އެގްޒިބިޓަރުން ފާހަގަކުރިގޮތުގައި މިއީ ފަތުރުވެރިކަމުގެ ދާއިރާއަށް ބޭނުންވާ ޒަމާނީ އަދި ފެންވަރު ރަނގަޅު ވަސީލަތްތައް ފުރިހަމަކުރުމަށް ބޭނުންވާ ވިޔަފާރިވެރިންނަށް ލިބޭ ވަރަށް ރަނގަޅު ފުރުސަތެކެވެ.

ހޮޓެލް އޭޝިއާ އެގްޒިބިޝަން އަކީ 2008 ވަނަ އަހަރުން ފެށިގެން ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ މެދުގައި ގުޅުން ބަދަހި ކުރުމާއި، މި އިންޑަސްޓްރީއަށް ގެންނަން އާ އީޖާދުތަކާއި އުފެއްދުންތެރިކަން އިތުރު ކުރުމުގެ މަގުސަދުގައި ބާއްވަމުން އަންނަ އެގްޒިބިޝަން އެކެވެ.