ރައީސުލް ޖުމްހޫރިއްޔާ ބޭރުގެ ގައުމުތަކަށް ކުރާ ދަތުރުތަކުން އެއްވެސް ފައިދާއެއް ނުވޭ: ދީދީ

ރައީސުލް ޖުމްހޫރިއްޔާ ޑރ މުޙައްމަދު މުއިއްޒު ބޭރުގެ ގައުމުތަކަށް ކުރާ ރަސްމީ ދަތުރު ފުޅުތަކާއި އަދި ނުރަސްމީ ދަތުރުފުޅު ތަކުން ވެސް ދިވެހި ގައުމަކަށް އެކަމުން އެއްވެސް ފައިދާއެއް ނުވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދު ދީދީ ވިދާޅުވެއްޖެ އެވެ.

ދީދީ މިފަދައިން ވިދާޅުވެފައިވާއިރު ރައީސުލް ޖުމްހޫރިއްޔާ އާއި އެމަނިކުފާނުގެ އަނބިކަނބަލުން ވަނީ މިދިޔަ އާދީއްތަ ދުވަހު ނުރަސްމީ ދަތުރުފުޅެއްގައި ސިންގަޕޫރަށް ވަޑައިގެންފަ އެވެ. މި ދަތުރުފުޅާއިބެހޭ ގޮތުން ރައީސުލް ޖުމްހޫރިއްޔާގެ އޮފީހުން އެއްވެސް ތަފްސީލެއް މިހާތަނަށް މީޑިޔާ އަށް ހާމަކޮށްފައެއް ނުވެ އެވެ.

ފާހަގަކޮށްލެވޭ ގޮތުގައި ރައީސުލް ޖުމްހޫރިއްޔާ ޑރ މުހައްމަދު މުއިއްޒު ވެރިކަމާއި ހަވާލުވެވަޑައިގެންފަހުން މިއީ ސިންގަޕޫރަށް އެމަނިކުފާނު ކުރައްވާ ހަތްވަނަ ދަތުރުފުޅެވެ. މީގެ ކުރިން ވެސް ނުރަސްމީ ދަތުރުގެ ގޮތުގައި ފަސް ދަތުރުފުޅެއް ވަނީ ސިންގަޕޫރަށް ކުރައްވާފަ އެވެ.

އެންމެ ފަހުން ރައީސް ޑރ މުއިއްޒު ސިންގަޕޫރަށް ނުރަސްމީ ދަތުރުފުޅެއް ކުރެއްވީ ނިމިގެންދިޔަ މެއި މަހުގެ 24 ގައެވެ. ހަ ދުވަހަށް ކުރެއްވި އެ ދަތުރުފުޅު ނިންމަވާލެއްވުމަށްފަހު އެ މަނިކުފާނު ރާއްޖެ ވަޑައިގަތީ އެ މަހުގެ 30 ވަނަ ދުވަހުގައެވެ. ފާހަގަކޮށްލެވޭ ގޮތުގައި ވެރިކަމަށް ވަޑައިގަތުމަށްފަހު އެ މަނިކުފާނު އެންމެ ގިނައިން ދަތުރުފުޅު ކުރައްވާފައި ވަނީ ވެސް ސިންގަޕޫރަށެވެ.

"އަސްލުޓީވީ" ގެ ބާބު ޕްރޮގްރާމުގައި ބައިވެރިވެވަޑައިގެން ވާހަކަފުޅު ދައްކަވަމުން ދީދީ ވިދާޅުވީ ރާއްޖޭގެ އިގްތިސާދު ނާޒުކު ދަނޑިވަޅެއްގައި ސަރުކާރުންވެސް ޙަރަދުތައް ކުޑަ ކުރުމަށް ވާހަކަތައް ދެކެވެމުން އަންނަ ދަނޑިވަޅެއްގައި ރައީސުލް ޖުމްހޫރިއްޔާ އަމިއްލަ ދަތުރުފުޅެއްގައި ސިންގަޕޫރަށް ވަޑައިގެންނެވުމުން ދީދީ ވަނީ އެކަމަކީ ދިވެހި ރައްޔިތުންނަށް ފައިދާ ވާނެ ކަމެއް ނޫން ކަމަށް ސިފަ ކުރައްވާފަ އެވެ.

ދީދީ ވިދާޅުވީ އޭގެ ބަދަލުގައި މިދަނޑިވަޅުގައި ބަލަންވީ ވީހާވެސް ޙަރަދުތައް ކުޑަ ކުރުން ކަމަށާއި، ރައްޔިތުންނަށް އެންމެ ފައިދާވާނެހެން ސަރުކާރާއި ރައީސުލް ޖުމްހޫރިއްޔާގެ ކަންކަން ވެސް ބެހެއްޓެވުން ކަމަށެވެ.

ރާއްޖޭގައި އޮތް ޑޮލަރުގެ މައްސަލަ އަށް އިޝާރާތް ކުރައްވައި ކުރީގެ ރައީސް މުހައްމަދު ނަޝީދު ވެސް ވަނީ ރައީސް ޑރ މުހައްމަދު މުއިއްޒު އަށް ރައްދެއް ދެއްވާފަ އެވެ.

ރައީސް ނަޝީދު ވިދާޅުވީ ބޭރުގެ އެއްވެސް ފަރާތަކުން ސަރުކާރަށް ޑޮލަރެއް ވެސް އަދި ބޭރު ފައިސާ އެއްވެސް ނުހޯދުނު ކަމަށާއި، އެފަދަ ކަމެއް ކުރަންވެސް ސަރުކާރުގެ ވެރިންނަށް ވެސް ނޭނގެނީ ކަމަށެވެ.