އީގަލް ހިލްސް އެއްބަސްވުން މަޖިލީހަށް ފޮނުވަން ރައީސް ނަޝީދު ގޮވާލައްވައިފި

ރާއްޖޭގައި ރެސިޑެންސީ ޕްރޮގްރާމެއް ތައާރަފުކުރުމަށް އުސޫލީ ގޮތުން ތާއީދުކުރެއްވި ނަމަވެސް، ޔޫއޭއީގެ އީގަލް ހިލްސް ކުންފުންޏާއެކު ހަދާފައިވާ އެއްބަސްވުމާ މެދު ދެ ކަންބޮޑުވުމެއް އެބައޮތް ކަމަށް ވިދާޅުވެ، އެ އެއްބަސްވުން އަވަހަށް ރައްޔިތުންގެ މަޖިލީހަށް ފޮނުވުމަށް ކުރީގެ ރައީސް މުޙައްމަދު ނަޝީދު ސަރުކާރަށް ގޮވާލައްވައިފިއެވެ.

ރައީސް ނަޝީދު މިއަދު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، ރާއްޖެއަށް އިންވެސްޓްމަންޓް ގެނައުމަށްޓަކައި ރެސިޑެންސީ ޕްރޮގްރާމަކަށް ހުޅުވާލުމަކީ އުސޫލީ ގޮތުން ރަނގަޅު ކަމެއް ކަމަށެވެ. ނަމަވެސް، އީގަލް ހިލްސް ކުންފުންޏާއެކު ވެފައިވާ ކޮންޓްރެކްޓް އަދިވެސް ހާމަކޮށްފައި ނުވާތީ، އެ އެއްބަސްވުން ފެންނަން ނެތް ކަމަށް އެމަނިކުފާނު ވިދާޅުވިއެވެ.

މި މަޝްރޫއާ ގުޅޭގޮތުން މިހާތަނަށް ލިބިފައިވާ މައުލޫމާތުތަކަށް އަލިއަޅުއްވާލައްވަމުން ރައީސް ނަޝީދު ވަނީ މައިގަނޑު ދެ މައްސަލައެއް ފާހަގަކުރައްވާފައެވެ.

ފުރަތަމަ ކަމަކީ، މި މަޝްރޫއުގެ ދަށުން ދައުލަތަށް އެޑްވާންސް ފައިސާއެއް ނުލިބޭ ކަމަށް އަޑުއިވިފައިވާ މައްސަލައެވެ.

ދެވަނަ ކަމެއްގެ ގޮތުގައި ފާހަގަކުރެއްވީ، މި މަޝްރޫއު ތަރައްގީކުރުމަށް މާލެ ސަރަހައްދު ހަމަޖައްސާފައިވާ ކަމަށް ބުނާ މައްސަލައެވެ.

ރައީސް ނަޝީދު ވިދާޅުވީ ސަރުކާރަށް މިވަގުތު އެންމެ ރަނގަޅު ގޮތަކަށް ވާނީ މި އެއްބަސްވުން ވީހާވެސް އަވަހަކަށް ރައްޔިތުންގެ މަޖިލީހަށް ފޮނުވުން ކަމަށެވެ. އަދި މިހާރުގެ ސަރުކާރަށް ރައްޔިތުންގެ މަޖިލީހުގެ ސުޕަ މެޖޯރިޓީ ލިބިފައިވާތީ، ސަރުކާރުގެ އަޣުލަބިއްޔަތުން މި މަޝްރޫއަށް ބޭނުންވާ ގާނޫނީ އޮނިގަނޑު ފާސްކޮށްގެން ކުރިއަށް ގެންދިއުމަކީ އެންމެ އިންސާފުވެރި އަދި ދެފުށް ފެންނަ ގޮތް ކަމަށް ވެސް އެމަނިކުފާނު ފާހަގަކުރެއްވިއެވެ.

ރާއްޖޭގެ އިގްތިސާދީ ހާލަތު ރަނގަޅުކޮށް، ބޭރު ފައިސާ ވަންނާނެ އައު ދޮރުތައް ހުޅުވުމުގެ ގޮތުން ސަރުކާރުން އަންނަނީ އިގްތިސާދީ ބޮޑެތި އިސްލާހީ ފިޔަވަޅުތަކެއް އަޅަމުންނެވެ. އޭގެ ތެރޭގައި ދުނިޔޭގެ މަޝްހޫރު ޑިވެލޮޕަރުންނާ ގުޅިގެން ރާއްޖޭގައި މަތީ ފަންތީގެ ރިއަލް އެސްޓޭޓް މަޝްރޫއުތައް ހިންގުމާއި، ވަކި މިންވަރަކަށް އިންވެސްޓްކުރާ ބޭރުގެ ފަރާތްތަކަށް ރެސިޑެންސީ ވިސާ ދޫކުރުމުގެ ޕްރޮގްރާމްތައް ހިމެނެއެވެ.

މި ސިޔާސަތުގެ ދަށުން، ދުނިޔޭގެ އެންމެ އުސް އިމާރާތް ކަމަށްވާ ބުރުޖު ޚަލީފާ ތަރައްގީކުރި ކުންފުނި ކަމަށްވާ އެމާރ ޕްރޮޕަޓީސްގެ ފައުންޑަރ މުހައްމަދު އަލައްބާރުގެ އީގަލް ހިލްސް ކުންފުންޏާއެކު ދިވެހި ސަރުކާރުން ވަނީ މާލެ ސަރަހައްދުގައި ފަތުރުވެރިކަމާއި ރިއަލް އެސްޓޭޓްގެ ބޮޑު މަޝްރޫއެއް ހިންގުމަށް ފަހުމުނާމާއެއްގައި ސޮއިކޮށްފައެވެ. ނަމަވެސް، މި އެއްބަސްވުމުގެ ތަފްސީލުތަކާއި މާލީ މަންފާތައް ދައުލަތަށް ލިބޭނެ ގޮތްތަކާ މެދު އިދިކޮޅު ފަރާތްތަކާއި ބައެއް އާންމުން ދަނީ ކަންބޮޑުވުން ފާޅުކުރަމުންނެވެ.

މީގެ އިތުރުން، ރާއްޖޭގެ ބިން ކުޑަވުމާއި މާލެ ސަރަހައްދުގެ ތޮއްޖެހުން ބޮޑުވެފައިވާ ދަނޑިވަޅެއްގައި، މިފަދަ ބިޔަ މަޝްރޫއުތައް މާލެ ސަރަހައްދުގައި ހިންގުމުގެ ބަދަލުގައި އެހެން ސަރަހައްދުތަކަށް ގެންދިއުމަކީ އިގްތިސާދީ ގޮތުން ލާމަރުކަޒުވުމަށް މުހިންމު ކަމެއް ކަމަށް ގިނަ ފަރާތްތަކުން ދެކެއެވެ.

ރައީސް ނަޝީދު މިފަދައިން ގޮވާލައްވާފައިވާއިރު، ރައީސް ޑރ. މުއިއްޒުގެ ސަރުކާރުން ބުނަމުންދަނީ ބޭރުގެ އިންވެސްޓްމަންޓްތަކަށް ރާއްޖެ ހުޅުވާލައި، ގާނޫނީ ހަމަތަކުގެ މަތިން އިގްތިސާދު ސިންދަފާތު ކުރުމަކީ ގައުމަށް އެންމެ ފައިދާހުރި މަގު ކަމަށެވެ. އެހެންކަމުން މަޖިލީހުގެ ތެރެއިން މިކަމަށް ބޭނުންވާ ގާނޫނުތައް ހެދުމުގެ މަސައްކަތް ކުރިއަށް ގެންދިއުމުގެ ވިސްނުން ސަރުކާރުން ގެންގުޅޭ ކަމަށް ބެލެވެއެވެ.