ވަގަށް ރާއްޖެ އެތެރެކުރަން އުޅުނު8 މިލިއަން ސިނގިރޭޓް އަތުލަގެންފި!

ގަވައިދާ ޙިލާފަށް ސިއްރުން ކަނޑުމަގުން ރާއްޖެ އެތެރެކުރަން އުޅުނު 8 މިލިއަން ސިނގިރޭޓް މޯލްޑިވްސް ކަސްޓްމްސް ސާވިސް އިން އަތުލައިގަނެ އެތަކެތި ކަސްޓަމްސްގެ ބެލުމުގެ ދަށަށް ގެނެސްފި އެވެ.

ކަސްޓަމުން ބުނީ ކަނޑުމަގުން ރާއްޖެ ގެނައި ޝިޕްމަންޓެއްގައި ގަވާއިދާ ހިލާފު ތަކެތި ހުރެދާނެ ކަމަށް ބެލެވިގެން ހިންގި އޮޕަރޭޝަނުގައި "ޖެނެރަލް ކާގޯ" ގެ ގޮތުގައި ޑިކްލެއާ ކޮށްފައިވާ ޝިޕްމަންޓް ބަލައި ފާސްކުރިއިރު އޭގެ ތެރޭގައި ފޮރުވާފައި ހުއްޓާ ފެނުނީ 8،527،480 ސިނގިރޭޓް ސްޓިކް ކަމަށެވެ.

މި މައްސަލައިގައި ހިމެނޭ ސިނގިރޭޓުތައް ކަސްޓަމުގެ ބެލުމުގެ ދަށަށް ގެނެސް މައްސަލަ އިތުރަށް ތަހުގީގު ކުރަމުންދާ ކަމަށް ކަސްޓަމުން ބުންޏެވެ.

ކަސްޓަމްސް އިން ބުނީ މި ތަކެތި އަތުލައިގަނެފައި ވަނީ މިދިޔަ އާދީއްތަ ދުވަހުގެ ވަގުތެއްގައި މާލޭ ވިޔަފާރި ބަނދަރުގައި ކުރިއަށް ގެންދިޔަ ހާއްސަ އޮޕަރޭޝަނެއްގެ ތެރެއިން ކަމަށެވެ.

މި ސަރުކާރުން ވަނީ ދުންފަތުގެ އިސްތިއުމާލު ކުރުމާ ދެކޮޅަށް މީގެ ކުރިން ހަރުކަށި ފިޔަވަޅުތަކެއް އަޅައިފައެވެ. އޭގެ ތެރޭގައި 2024ގައި ވޭޕް މަނާކުރުން ހިމެނެއެވެ. އަދި 2007އިން ފެށިގެން، އޭގެ ފަހަށް ރާއްޖޭގައި އުފަންވެފައިވާ ހުރިހާ ކުދީންނަށް، އަދި މީގެ ފަހުން އުފަންވާނެ ހުރިހާ ކުދީންނަށް ވެސް، ދުންފަތުގެ އިސްތިޢުމާލު ކުރުމާއި ދުންފަތް ގަނެވިއްކުން ވެސް ވަނީ މަނާކޮށްފައެވެ.

މި ސަރުކާރުން ނޮވެންބަރު 2024އިން ފެށިގެން ދުންފަތުން ނަގާ ޑިއުޓީ ބޮޑުކުރި ނަމަވެސް، އެ ނިންމުން ބަދަލުކޮށް، މިދިޔަ ޖުލައި މަހު ޑިއުޓީ ވަނީ ކުޑަކޮށްފައެވެ. އެ ބަދަލު ގެނައީ ދުނިޔޭގެ ސިއްހަތު ޖަމިއްޔާގެ ލަފަޔާއެކު ކަމަށް ސަރުކާރުން ވަނީ ބުނެފައެވެ.