އަހަރުތަކެއްގެ މެދުކެނޑުމަކަށް ފަހު ރައީސް ޔާމީންގެ ޝަރީއަތް މިއަދު ފަށައިފި!

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ދައުވާ އުފުލައިގެން ކްރިމިނަލް ކޯޓުގައި ކުރިއަށްދާ މައްސަލަތަކުގެ އަޑުއެހުމެއް ނުބާއްވާތާ އަހަރެއްހާ ދުވަސް ފަހުން، މިއަދު އެމަނިކުފާނު ޝަރީއަތްތައް ފަށައިފިއެވެ.

މި މައްސަލަ އަކީ ވ. އާރަށުގެ މައްސަލަ އާއި، ގުޅިގެން ރައީސް ޔާމީންގެ މައްޗަށް އުފުލާފައިވާ މަނީ ލޯންޑާ ކުރި ކަމަުގެ ކުށުގެ ދައުވާ އެކެވެ.

ވ. އާރަށު މައްސަލައިގެ ޝަރީއަތް މީގެ ކުރިން ކްރިމިނަލް ކޯޓުން މަޑުޖައްސާލީ، އެ މައްސަލަ އަލުން ބަލާއިރު ދައުލަތުން ހުށަހެޅި އާ ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމުގެ ބައި ދައުލަތުން ސުޕްރީމް ކޯޓުގައި އިސްތިއުނާފު ކުރުމުންނެވެ.

ނަމަވެސް، ހައި ކޯޓުން ނިންމި ގޮތަށް އެ ހެކިތައް ބަލައިނުގަނެވޭނެ ކަމަށް ސުޕްރީމް ކޯޓުން ވަނީ މިދިޔަ ޖުލައި މަހު ހުކުމްކޮށްފައެވެ.

މި ހެކިތަކުގެ ތެރޭގައި ޔާމީންގެ ދިފާއީ ހެކިވެރިއެއް ކަމަށްވާ އަހުމަދު ނަރީޝްގެ އެމްއެންޑީއެފް ހާޒިރީއާއި، އިކޮނޮމިކް ޔޫތު ކައުންސިލްގެ ޖަލްސާތަކެއްގެ ޔައުމިއްޔާ ހިމެނެއެވެ.

މިއަދުގެ އަޑުއެހުމުގައި އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީ ލޯންޑާ ކުރެއްވި ކަމަށް ތުހުމަތުކުރާ މައްސަލައިގައި، ކުރީގެ މަޖިލިސް މެންބަރު ޔޫސުފް ނައީމާއެކު ކުރިއަށްދާ ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭގޮތުން ވާހަކަދެއްކުމަށް ވަނީ ތާވަލް ކުރެވިފަ އެވެ.

މީގެ އިތުރުން ޔާމީންގެ މައްޗަށް ތުހުމަތު ކުރެވޭ ރ. ފުއްގިރި ކުއްޔަށް ދިން މައްސަލައިގައި ދައުލަތުން އުފުލާފައިވާ ދައުވާ އާއި ގުޅިގެން އެންމެ ފަހުން ބާއްވަން ތާވަލް ކުރި އަޑު އެހުން ވެސް ވަނީ ދައުލަތުގެ ވަކީލުން ބަލިވުމުގެ ސަބަބުން ކެންސަލް ކޮށްފަ އެވެ.

ފާހަގަކުރެވޭ ގޮތުގައި ވ. އާރަށް ކުއްޔަށް ދޫކުރުމުގައި ޚިޔާނާތްވެފައިވާ ކަމަށް ތުހުމަތުކުރާ މައްސަލައިގައި ޔާމީންގެ މައްޗަށް އެ މައްސަލަ ސާބިތުވާ ކަމަށް ކަނޑައެޅީ ޑިސެންބަރު 25، 2022ގައެވެ. ނަމަވެސް ދިގުދެމިގެންދިޔަ ޝަރީއަތަކަށް ފަހު 2023 ވަނަ އަހަރުގެ ފަހުކޮޅު ހައިކޯޓުން ވަނީ އެ މައްސަލައިގައި ޔާމީންގެ މައްޗަށް ސާބިތުވި ހުކުމް ބާތިލުކޮށް، މައްސަލަ އަލުން ބަލަން އަންގައިފައެވެ.

އޭރު ހައިކޯޓުން ނިންމީ މައްސަލަ އަލުން ބަލާއިރު ޔާމީނާ ދެކޮޅަށް ދައުލަތުން ހުށަހެޅި އާ ހެކި ބަލައިނުގަނެވޭނެ ކަމަށެވެ. އާރަށު މައްސަލައިގައި ޚިޔާނާތާއި މަނީ ލޯންޑްރިންގެ ކުށް ޔާމީންގެ މައްޗަށް ސާބިތުވާ ކަމަށް ދަށު ކޯޓުން ހުކުމްކުރީ އައު ހެކިތައް ބަލައިގަތުމަށް ފަހެވެ.