ކުޅުދުއްފުށީގައި ބާއްވާ އައިލޭންޑް ކާނިވަލްގައި އެސްއެމްއީ ޑިޖިޓަލް އިން ބައިވެރިވަނީ

ސެޕްޓެމްބަރު 30 އިން އޮކްޓޫބަރު މަހުގެ 4 ވަނަ ދުވަހުގެ ނިޔަލަށް ހދ. ކުޅުދުއްފުށި ސިޓީގައި ބާއްވާ އައިލޭންޑް ކާނިވަލްގައި އެސްއެމްއީ ޑިޖިޓަލް އިން ބައިވެރިވުމަށް ނިންމައިފި އެވެ.

މި ކާނިވަލަކީ ކުޅުދުއްފުށީ ކައުންސިލް އާއި އެޑްވެންޗަރ އަޕް ގުޅިގެން ބާއްވާ ކާނިވަލެކެވެ. މި ކާނިވަލުގެ މަގުސަދަކީ ހއ.ހދ. އަށި ށ އަތޮޅުގެ ކުދި ވިޔަފާރިތައް ހާއްސަކޮށް އެމީހުންގެ އުފެއްދުންތައް މާކެޓްކުރުމުގެ ފުރުސަތު ހުޅުވާލުމާ އެކު އިޖްތިމާއީ ގުޅުން ބަދަހި ކުރުމަށް އާއިލީ ހަވީރާއި، ތަފާތު އެކި ކަހަލަ ކާނިވަލް ގޭމްތައް ކުޅުމުގެ މަގު ފަހިކޮށްދިނުމެވެ.

މި ކާނިވަލުގައި އެސްއެމްއީ ޑިޖިޓަލް އިން ހަރަކާތްތެރިވާނީ، ކުދި އަދި މެދުފަންތީގެ ވިޔަފާރިތައް ތަރައްގީކޮށް އަދި ގޭބިސީގައި އަންހެނުން، ޒުވާނުން އަދި މީގެ އިތުރުން ރާއްޖޭގެ އިގްތިސާދުގައި މުހިއްމު ދާއިރާތައް ކަމުގައިވާ މަސްވެރިކަމާއި. ޓުއަރިޒަމް، ދަނޑުވެރިކަން ފަދަ ދާއިރާތަކަށް އެސްއެމްއީ ޑިޖިޓަލް އިން ފޯރުކޮށްދޭ ފައިނޭންސިންގ އާ ގުޅޭ މައުލޫމާތުފޯރުކޯށްދީ ހޭލުންތެރި ކުރުމަށެވެ.

އަދި އެސްއެމްއީ ޑިޖިޓަލްގެ ހިދުމަތްތަކަށް އެޕްލިކޭޝަން ހުށެހެޅުމަށް ބޭނުންވާ ފަރާތްތަކަށް ބޭނުންވާ ލިޔެކިޔުންތައް ތައްޔާރުކުރުމުގައި އެހީތެރިކަން ފޯރުކޮށްދިނުމަށް އެސްއެމްއީ ޑިޖިޓަލްގެ މުވައްޒަފުން ހަމަ މި މުއްދަތުގައި ކުޅުދުއްފުށީ ސިޓީގައި ހަރަކާތްތެރިވާނެއެވެ.

މީގެ އިތުރުން އެސްއެމްއީ ޑިޖިޓަލް އިން ދޫކޮށްފައިވާ ކޮންވެންޝަނަލް ލޯނުތައް އިސްލާމިކް ފެސިލިޓީތަކަށް ބަދަލުކުރުމަށް، ހއ، ހދ، އަދި ށ މި ސަރަހައްދުގެ ކަސްޓަމަރުންނަށް އެހީތެރިކަން ފޯރުކޮށްދިނުމަށް މުވައްޒަފުން ހަރަކާތްތެރިވާނެއެވެ.

އެސްއެމްއީ ޑިޖިޓަލް އަކީ އެޑްވެންޗަރ އަޕް އިން ބާއްވާ މި ކާނިވަލުގެ އެއް ސްޕޮންސަރުވެސްމެއެވެ. އައިލެންޑް ކާނިވަލަކީ މުޖުތަމަޢުގެ ގުޅުން ބަދަހިކޮށްދީ، ކުޑަކުދިންނަށް އުފާވެރި މާހައުލެއް ހޯދައިދިނުމުގެ އިތުރުން ކުދި ވިޔަފާރިތަކަށް މާކެޓް ފުރުސަތުތައް ފަހިކޮށްދޭ ހަރަކާތަކަށްވާތީ، އެސްއެމްއީ ޑިޖިޓަލް އިން މިފަދަ ހަރަކާތްތަކުގައި މުހިންމު ދައުރެއް އަދާކުރަނީ މުޖުތަމައަށް އަނބުރާ ދިނުމުގެ ބޭނުމުގައިއެވެ.