އިންޗިއެއްވެސް ދޫނުކުރާތި!

ދިވެހިރާއްޖޭގެ ތާރީޚުގައި ޤައުމުގެ މިނިވަންކަމާއި ސިޔާދަތު ދެމެހެއްޓުމަށްޓަކައި ކާބަފައިން ވަނީ މަތިވެރި ޤުރުބާނީތަކެއް ވެފައެވެ. ސައްތައިން ސައްތަ މުސްލިމް މި ކުޑަ ޖަޒީރާ ޤައުމުގެ އެންމެ އަގުބޮޑު ރައުސްމާލަކީ މި ފަސްގަނޑާއި، އަޅުގަނޑުމެންގެ މާތްވެގެންވާ އިސްލާމްދީނެވެ. ނަމަވެސް، ފަހަކަށް އައިސް ފެންމަތިވަމުންދާ ބޮޑެތި މަޝްރޫޢުތަކުގެ ތެރެއިން، ދިވެހިންގެ މި އަގުހުރި ވަޒަނާއި ވަޒަންވެރިކަމަށް މިވަނީ ސީދާ ނުރައްކާ ކުރިމަތިވެފައެވެ. އޭގެ ތެރެއިން އެންމެ ބޮޑު ކަންބޮޑުވުމެއް އުފެދިފައިވާ އެއް މައްސަލައަކީ ރަސްމާލެ މަޝްރޫޢުގެ ތެރެއިން ބޭރުގެ ކުންފުންޏެއް ކަމަށްވާ އީގަލް ހިލްސްއަށް 500 ހެކްޓަރުގެ ބިން ހިލޭ ދޭން ނިންމި ކަމަށް ބުނާ މައްސަލައެވެ.

ރަސްމާލެއިން 500 ހެކްޓަރުގެ ބޮޑު ބިމެއް ބޭރުގެ ފަރާތަކަށް މިލްކުވާ ގޮތަށް ނުވަތަ ދިގު މުއްދަތަކަށް ހިލޭ ދޫކޮށްލުމަކީ ދިވެހިރައްޔިތުންގެ ޙައްޤުތަކަށް އަރައިގަތުމެކެވެ. މާލެ ސަރަޙައްދުގައި ބޯހިޔާވަހިކަމެއް ނެތި، ކުދިކުދި ގޮޅިތަކުގައި އެތައް ޖީލެއް ހާލުގައި އުޅެމުންދާއިރު، ދިވެހި ރައްޔިތުންގެ މުސްތަޤްބަލާ ގުޅިފައިވާ މިފަދަ އަގުބޮޑު ބިންތައް ބޭރުގެ ވިޔަފާރިވެރިންނަށް ދީލައިލުމަކީ ބަލައިގަނެވޭނެ ކަމެއް ނޫނެވެ. މިއަދު މިއީ ހަމައެކަނި ގޭގައި ތިބެގެން ޝަކުވާކުރަންވީ ވަގުތެއް ނޫނެވެ. ދިވެހި ލޮބުވެތި ރައްޔިތުން އެއްއަޑަކުން ނުކުމެ، މި ބޭއިންސާފާ ދެކޮޅަށް ސުލްޙަވެރިކަމާއެކު އިޙްތިޖާޖުކޮށް އަޑުއުފުލަންޖެހެއެވެ. ޤައުމުގެ ދިފާޢުގައި މަގުމައްޗަށް ނުކުމެ، މި ފަސްގަނޑުން އިންޗިއެއްވެސް ދޫނުކުރާނޭ ބުނެ އަޑުގެ ކޮޅަށް ގޮވާލަންޖެހެއެވެ.

މިފަދަ ބިޔަ ބިންތައް ބޭރުގެ ފަރާތްތަކަށް ހުޅުވާލުމުން ކުރިމަތިވާ އެންމެ ބޮޑު އެއް ބިރަކީ، ދިވެހިރާއްޖޭގެ ދީނީ އެއްބައިވަންތަކަން ގެއްލި، އެހެން ދީންތަކުގެ މީހުންނަށް ރާއްޖޭގައި ވަޒަންވެރިވުމުގެ ފުރުޞަތު ފަހިވެގެން ދިޔުމެވެ. ވަކިން ޚާއްޞަކޮށް، ބައިނަލްއަޤްވާމީ ގޮތުން ވިޔަފާރީގެ ނިވަލުގައި ހަރަކާތްތެރިވާ ޒަޔަނިސްޓް ޔަހޫދީންގެ ނުފޫޒު މިފަދަ މަޝްރޫޢުތަކުގެ ތެރެއިން ރާއްޖެއަށް ވަދެގެންދިޔުމަކީ ދިވެހިން ނުހަނު ކަންބޮޑުވާންޖެހޭ ކަމެކެވެ. ފަލަސްޠީނުގެ ބިންތައް ފޭރިގަނެ، މުސްލިމުންނާ ދެކޮޅަށް ލާއިންސާނީ ޖަރީމާތައް ހިންގަމުންދާ އަނިޔާވެރި ޒަޔަނިސްޓުންނަށް ދިވެހި ފަސްގަނޑުން ޖާގަ ލިބުމަކީ މި ޤައުމުގެ އިސްލާމީ ޝަޚްޞިއްޔަތަށާއި ޤައުމީ ސަލާމަތަށް އޮތް ފާޅުކަން ބޮޑު ނުރައްކަލެކެވެ.

ދިވެހިރާއްޖެއަކީ ޒަމާނުއްސުރެ އިސްލާމީ ރިވެތި އުޞޫލުތަކާއި، އަޚްވަންތަކަމާއި، ވަކި ޚާއްޞަ ސަޤާފަތެއްގެ މައްޗަށް ބިނާވެފައިވާ މުޖުތަމަޢެކެވެ. ނަމަވެސް ބޭރުގެ ބޮޑެތި އިންވެސްޓްމަންޓްތަކުގެ ނަމުގައި ބޭރު މީހުންނަށް ދާއިމީކޮށް މި ފަސްގަނޑުގައި ވަޒަންވެރިވެ އުޅުމުގެ ދޮރު ހުޅުވިއްޖެނަމަ، ދިވެހިންގެ އަމިއްލަވަންތަކަމާއި ސަޤާފީ އާދަކާދަތައް ފަނޑުވެ، ބޭރުގެ ނޭދެވޭ ސަޤާފަތްތައް މުޖުތަމަޢުގައި އަށަގަންނާނެއެވެ. އަދި ޤާނޫނުއަސާސީން ކަށަވަރުކޮށްދޭ އިސްލާމީ އެއްބައިވަންތަކަމުގެ ބިންގާ ގުޑައި، އިޤްތިޞާދީ ގޮތުންނާއި އިޖްތިމާޢީ ގޮތުން ދިވެހި ރައްޔިތުންނަކީ އަމިއްލަ ޤައުމުގައި ދެވަނަ ދަރަޖައިގެ ބަޔަކަށް ވެގެންދާނެއެވެ.

ދިވެހި ބިމަކީ ދިވެހި ރައްޔިތުންގެ ޙައްޤެކެވެ. އެއީ ވިޔަފާރީގެ މަންފާއަށްޓަކައި ނުވަތަ ވަގުތީ ފައިދާއަކަށްޓަކައި ބޭރުގެ ނުފޫޒުތަކަށް ވިއްކާލެވޭނެ އެއްޗެއް ނޫނެވެ. ރަސްމާލެއިން ނުވަތަ ރާއްޖޭގެ އެހެން އެއްވެސް ތަނަކުން ވިޔަސް، ބޭރުގެ ފަރާތްތަކަށް ބިން މިލްކުވާ ގޮތަށް ނުވަތަ މި ޤައުމުގެ ދީނާއި މިނިވަންކަމަށް ބުރޫއަރާ ގޮތަށް ހިންގާ ކޮންމެ މުޢާމަލާތަކާ ދެކޮޅަށް ރައްޔިތުން ތެދުވެ ވަކާލާތު ކުރަންޖެހެއެވެ. މިއަދު އަޅުގަނޑުމެން އަޑުނުއުފުލައިފިނަމަ، މާދަމާ މި ބިމުގައި ހިނގާނީ ބޭރު މީހުންގެ އަމުރެވެ. އަންނަން އޮތް ޖީލުތަކަށްޓަކައި، މި ޤައުމުގެ އިސްލާމީ ވަންތަކަން ހިމާޔަތްކުރުމަށްޓަކައި، ދިވެހި ފަސްގަނޑުން އެންމެ އިންޗިއެއްވެސް ދޫނުކުރުމަށް އެންމެހައި ދިވެހިން އިހްތިޖާޖުގެ ސަފުތަކަށް ނުކުމެ ވަރުގަދަ އަޑަކުން ގޮވާލަން މިއަދު މިވަނީ މަޖުބޫރުވެފައެވެ.