މާލޭގައި ދިމާވެފައިވާ ޕާކިންގ މައްސަލަތަކަށް ޕާކިންގ ބިލްޑިންގތަކުގެ ސަބަބުން ދާއިމީ ހައްލެއް ލިބޭނެކަމަށް ޓްރާންސްޕޯޓް މިނިސްޓަރ މުޙައްމަދު އަމީން ވިދާޅުވެއްޖެއެވެ.
މިނިސްޓަރމިފަދައިން ވިދާޅުވެފައިވަނީ ޕާކިންގ ބިލްޑިންގތައް އެޅުމަށް އެ މިނިސްޓްރީއާއި، ހައުސިންގ ޑިވެލޮޕްމެންޓް ކޯޕަރޭޝަން (އެޗް.ޑީ.ސީ) އާއި ދެމެދު ފަހުމުނާމާގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
އޮގަސްޓް 15 ވަނަ ދުވަހު މިނިސްޓްރީއިން ވަނީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް ޕޮލިސް ސަރވިސް އަދި މާލެ ސިޓީ ކައުންސިލާއެކު ބައްދަލުވުމެއް ބާއްވައި މަޝްވަރާތަކެއް ބާއްވާފައެވެ. މި މަޝްވަރާގައި މާލެއަށް ދިމާވެފައިވާ ތޮއްޖެހުމުގެ މައްސަލައާއި ޕާކިންގގެ މައްސަލަތަކަށް ހައްލެއް ހޯދާނެ ގޮތްތަކާއި، ޕާކިންގ ބިލްޑިންގތައް އެޅުމަށް ވަނީ މަޝްވަރާ ކުރައްވާފައެވެ.
މިނިސްޓްރީން ބުނީ، މި މަޝްރޫޢުގެ ދަށުން އަޅާ ޕާކިންގ ބިލްޑިންގތަކުގެ ސަބަބުން މާލޭގެ މަގުތަކުގައި ޕާކުކުރާ އުޅަނދުތަކުގެ އަދަދު މަދުވެ، މަގުތަކުގައި ދުއްވާ އުޅަނދުތަކަށް ފަސޭހަވެގެންދާނެ ކަމަށެވެ. އަދި މިކަމުގެ ސަބަބުން މާލޭގެ ޓްރެފިކް މައްސަލަތަކަށްވެސް ހައްލެއް ލިބިގެންދާނެ ކަމަށެވެ.
ފޮޓޯ: ޓްރާންޕޯޓް މިނިސްޓްރީ
ބުރާސްފަތި ދުވަހު ސޮއި ކުރެވުނު ފަހުމުނާމާގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ މުހައްމަދު އަމީންއެވެ. ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ފަރާތުން ސޮއިކުރެއްވީ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ.
މި އެމްއޯޔޫގައި ސޮއިކުރެވުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މާލެ ސަރަޙައްދުގެ ޕާކިންގގެ ދަތިކަމަށް އެކަށީގެންވާ އަވަސް ހައްލެއް ހޯދުމަށްޓަކައެވެ. މި އިމާރާތްތައް ބޭނުންކުރަން ފެށުމުން، މާލެ ސަރަޙައްދުގައި ދިރިއުޅޭ ރައްޔިތުންނަށް ދިމާވެފައިވާ ޕާކިންގގެ ދަތިކަމަށް އެކަށީގެންވާ ހައްލެއް ލިބިގެންދާނެއެވެ.
މިނިސްޓްރީން ބުނިގޮތުގައި އަލަށް ޢިމާރާތްކުރެވޭ 15 ޕާކިންގ ބިލްޑިންގތަކުގައި ޖުމްލަ 7,346 އުޅަނދު ބޭއްވޭނެ ޖާގަ ހަމަޖެހިގެންދާނެ ކަމަށެވެ. މީގެ ތެރޭގައި ހިމެނެނީ 3,920 ހަތަރުފުރޮޅުލީ އުޅަނދާއި 3,426 ދެފުރޮޅުލީ އުޅަނދެވެ.
މި ޖާގަތަކުގެ 90 އިންސައްތަ، ދޫކުރެވޭނީ އާންމު އުސޫލުން ހުޅުވާލެވޭ ބީލަމަކުންނެވެ. އެހެންނަމަވެސް، 10 އިންސައްތަ ޖާގަ ރިޒާވްކުރެވނީ ޢިމާރާތްތަކުގެ އެންމެ ދަށު އަދި އެންމެ މަތީ ފަންގިފިލާގައި ގާއިމުކުރެވޭ ސައިހޮޓާ، ކެއިންބުއިމުގެ ޚިދުމަތްދޭ ތަންތަނާއި، ކުޅިވަރު ކުޅޭ މަރުކަޒުތަކަށް ޒިޔާރަތްކުރާ ފަރާތްތަކަށް ކަމަށް މިނިސްޓްރީން ބުނެއެވެ.
