މިއަދާއި މިރޭވެސް ރާއްޖެއަށް މޫސުން ގޯސްވާނެ! - މެޓް އޮފީސް

މިއަދާއި މިރޭވެސް ރާއްޖޭގެ އެކި ހިސާބުތަކަށް ގުގުރުމާއި އެކު ބޯކޮށް ވާރޭވެހޭނެ ކަމަށް ލަފާކޮށް، އެކަމަށް ސަމާލުވުމަށް މޫސުމާއި ބެހޭ ގައުމީ އިދާރާއިން އިލްތިމާސް ކޮށްފިއެވެ.

މެޓް އޮފީހުން ކުރިއަށް އޮތް 24 ގަޑިއިރަށް ރާއްޖޭގެ މޫސުން ލަފާކުރާ ގޮތުގައި، އެކި ހިސާބުތަކަށް ގުގުރުމާއި އެކު ބޯކޮށް ވާރޭ ވެހޭނެ ކަމަށާއި، ބައެއް ސަރަހައްދުތަކަށް ވައި ގަދަވުން އެކަށީގެންވާ ކަމަށް ވަނީ ބުނެފައެވެ.

އެގޮތުން އުތުރާއި އިރުއުތުރުން ގަޑިއަކު ފަސް މޭލާއި 15 މޭލާއި ދެމެދުގެ ބާރުމިނެއްގައި ވައިޖެހޭނެ ކަމަށް ލަފާކޮށްފައި ވާއިރު، ވިލާގަނޑުގައި އިތުރަށް ވައި ބާރުވެ ގަޑިއަކު 35 މޭލަށް ވައި ޖެހުން އެކަށީގެންވާ ކަމަށް އެއިދާރާއިން ވަނީ ލަފާ ކޮށްފައެވެ.

މީގެ އިތުރުން ރާއްޖޭގެ ބައެއް ސަރަހައްދުތަކުގެ ކަނޑުތައް އާދައިގެ ވަރަކަށް ގަދަވާނެ ކަމަށާއި، އަދި ވިލާގަނޑުގައި އިތުރަށް ގަދަވާނެ ކަމަށްވެސް މެޓް އޮފީހުން ވަނި ބުނެފަ އެވެ.

މިއާއެކު އެއިދާރާއިން ލަފާ ކުރާ ގޮތުގައި، ރާޅުގެ އުސްމިން ދެކުނުގެ ސަރަހައްދު ތަކުގައި ދެ ފޫޓާއި ފަސް ފޫޓާއި ދެމެދު ހުންނާނެ ކަމަށާއި، މެދުރާއްޖެތެރެއާއި އުތުރުގެ ސަރަހައްދު ތަކުގައި ރާޅުގެ އުސްމިން ތިން ފޫޓާއި ހަ ފޫޓާއި ދެމެދުގައި ހުންނާނެއެވެ.

ރާއްޖޭގެ އެކި ސަރަހައްދު ތަކަށް މޫސުން ގޯސްވެފައި ވާއިރު، މުޅި ރާއްޖެއަށް އިއްޔެ މެޓް އޮފީހުން ވަނީ އެލާޓްވެސް ނެރެފައެވެ.

މެޓް އޮފީހުން މައުލޫމާތު ދެއްވާގޮތުގައި، ރާއްޖޭގެ މޫސުން ރަނގަޅުވާން ފަށާނެ ކަމަށް ލަފާކުރެވެނީ އަންނަ ބުރާސްފަތި ދުވަހުން ފެށިގެންނެވެ.