ފްލެމިންގޯ ގޭގައި އަލިފާން ހިފާފައިވަނީ އޭސީ އިންޑޯ ޔުނިޓްގައި ރޯވެގެން: އެންޑީއެމްއޭ

މާފަންނު ފްލެމިންގޯ ގޭގެ އެޕާޓްމަންޓެއްގައި މިއަދު ހިނގި އަލިފާނުގެ ހާދިސާއަކީ އެ ތަނުގެ ކޮޓަރިއެއްގައި ހުރި އޭސީ ޔުނިޓެއްގައި ރޯވުމުގެ ސަބަބުން ދިމާވި ހާދިސާއެއް ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެން.ޑީ.އެމް.އޭ) އިން ހާމަކޮށްފިއެވެ.

މިއަދު ހަވީރު ހިނގި މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވާއިރު، އަލިފާން ރޯވި އެޕާޓްމަންޓަކީ މިވަގުތު މީހުން ދިރިނޫޅޭ، ހުސްކޮށް ހުރި ތަނެއް ކަމަށް އެން.ޑީ.އެމް.އޭ އިން މައުލޫމާތު ދެއެވެ.

މި ހާދިސާގެ މައުލޫމާތު ލިބުމާއެކު އެމް.އެން.ޑީ.އެފް ފަޔަރ އެންޑް ރެސްކިއު ސަރވިސްއިން ވަނީ އަލިފާން ނިއްވާލުމުގެ މަސައްކަތް ކާމިޔާބުކަމާއެކު ނިންމާލާފައެވެ. އެން.ޑީ.އެމް.އޭ އިން ބުނި ގޮތުގައި އެ އޮތޯރިޓީގެ މުއައްޒަފުން މިހާރު ދަނީ ހާދިސާ ހިނގި ތަނުގައި ހަރަކާތްތެރިވަމުން، ލިބުނު ގެއްލުންތައް ވަޒަންކުރުމުގެ މަސައްކަތް ކުރަމުންނެވެ.

މިފަދަ ހާދިސާތަކުން ރައްކާތެރިވުމުގެ ގޮތުން، ބޭނުންނުކޮށް ހުންނަ އެޕާޓްމަންޓްތަކުގައި ހުންނަ އޭސީ ޔުނިޓްތަކާއި އެނޫންވެސް ކަރަންޓު އާލާތްތައް ނިއްވާލާފައި ބެހެއްޓުމަށް ކަމާބެހޭ އިދާރާތަކުން އަބަދުވެސް އިލްތިމާސްކުރެއެވެ.