ފަތުރުވެރިންނަށް އެހީތެރިވަނީ ވަކި ބަޖެޓެއް އޮވެގެނެއް ނޫން: މިނިސްޓަރ

މެދުއިރުމަތީގެ ހަނގުރާމަ އާއި ގުޅިގެން ރާއްޖޭގައި މިވަގުތު ތިބި ފަތުރުވެރިންނަށް އެހީތެރިކަން ފޯރުކޮށްދެއްވަމުން އަންނަނީ ވަކި ބަޖެޓެއް އޮވެގެން ނޫން ކަމަށް ޓްރާންސްޕޯޓް މިނިސްޓްރީން ބުނެފި އެވެ.

ރައީސުލް ޖުމްހޫރިއްޔާގެ އޮފީހުގައި މިއަދު މެންދުރު ފަހު ނޫސްވެރިންނާ ބައްދަލުކުރައްވައި ޓްރާންސްޕޯޓް މިނިސްޓަރ މުހައްމަދު އަމީން ވިދާޅުވީ ހަނގުރާމަ އާއި ގުޅިގެން މެދުއިރުމަތީގެ ގިނަ އެއާލައިންތަކެއް ކެންސަލް ކޮށްފައިވާތީ ގިނަ ފަތުރުވެރިން ތަކެއް ރާއްޖެއިން ނުފުރި އެނބުރި ގައުމަށް ނުދެވިފައި އެބަހުރި ކަމަށެވެ.

މިނިސްޓަރ އަމީން ވިދާޅުވީ މިއަދާ ހަމައަށް ގާތްގަނޑަކަށް 397 ފަތުރުވެރިއަކު ރާއްޖެ ނުފުރި މަޑުކުރަން ޖެހިފައި އެބަތިބި ކަމަށެވެ.

ފަތުރުވެރިންނަށް އެހީތެރިވުމުގެ ގޮތުން ސަރުކާރުން ދަނީ އެ ފަރާތްތަކަށް އެކޮމަޑޭޝަން ހިދުމަތް ފޯރުކޮށްދެއްވަމުންނެވެ.

ނޫސްވެރިންގެ މި ބައްދަލުވުމުގައި "އަސްލު ޓީވީ" އިން ކުރި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ މިވަގުތު އެއާޕޯޓުގައި 110 ފަތުރުވެރިއަކު އެބަހުރި ކަމަށާއި، އެ ފަރާތްތަކަށް ސަރުކާރުން އެހީތެރިވަމުން އަންނަ ކަމަށެވެ.

މިނިސްޓަރ ވިދާޅުވީ ޝެޑުއލް ފްލައިޓްތަކެއް ރާއްޖެއަށް ދަތުރު ކުރަމުން އަންނަ އިރު މިކަމާއި ގުޅިގެން 53 ޝެޑިއުލް ފްލައިޓުގެ ތެރެއިން 18 ފްލައިޓެއް ކެންސަލް ވެފައިވާ ކަމަށާއި، މިއީ މުޅި އިންޑަސްޓްރީއަށް ލިބެމުން އަންނަ ބޮޑު ގެއްލުމެއް ކަމަށެވެ.