ދެވަނަ ވިސްނުމަކަށް ރައްޔިތުން ވަޑައިނުގަންނަވާ، ބޭނުންވާ ހުރިހައި ކަމެއް މި ސަރުކާރުން ވާނެ: ޑރ ޙަލީލް

ކުރިއަށް އޮތް ލޯކަލް ކައުންސިލް އިންތިޙާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޙާބުގައި ރައްޔިތުން ދެވަނަ ވިސްނުމަކަށް ނުދިއުމަށާއި، މި ސަރުކާރުން ރައްޔިތުންނަށް ބޭނުންވާ ކަންކަން އަބަދުވެސް ފުއްދަވައިދެއްވަމުން އަންނަ ކަމަށް ފޮރިނ މިނިސްޓަރު ޑރ.އަބުދުﷲ ޙަލީލް ވިދާޅުވެއްޖެ އެވެ

ޙަލީލް ވިދާޅުވީ ރައީސުލް ޖުމްހޫރިއްޔާ ރައްޔިތުންނަށް ވިދާޅުވީ ކަންތައްތަކުގެ ތެރެއިން ގިނަ ކަންކަން ފުއްދަވައި ނިންމަވާފައިވާ ކަމަށާއި، މާލެ ސަރަހައްދާއި އަތޮޅުތެރެއަކަށް ވަކި ތަފާތުކުރުމެއް އެމަނިކުފާނު ނުގެންގުޅުއްވާ ކަމަށެވެ.

ޙަލީލް ވިދާޅުވީ ބޯހިޔާވަހިކަމުގެ މެގަ ޕްރޮޖެކްޓުގެ ތެރެއިން ފޭސް ތިނެެއް ހިއްކައި ނިންމާފައިވާ ކަމަށާއި، ގުޅީފަޅުގެ ބޮޑު އިންސައްތައެއް ނިމިފައިވާ ކަމަށާއި، ކައިރި މުސްތަގުބަލެއްގައި ގިރާވަރު ފަޅުވެސް ހިކިގެންދާނެ ކަމަށެވެ.

އަދި މީގެ އިތުރުން މި މާލޭގައި ދިރިއުޅޭ ރައްޔިތުންނަށްޓަކައި މާލެ ކައިރިން އިތުރު ފަޅެއް ހިއްކަވަން ފަށްޓަވާފައިވާ ކަމަށެވެ. އެފަޅުގެވެސް 340ހަކަށް ހެކްޓަރުގެ ބިން ހިއްކާ ނިމިފައިވާ ވާހަކަ ހަލީލް ފާހަގަ ކުރެއްވެވި އެވެ.

ރައީސުލް ޖުމްހޫރިއްޔާ ވައިދުވެވަޑައިގެންފައި ވަނީ ކަނޑުން ގޯތި ދޫކުރާ ގޮތަށް ނޫން ކަމަށާއި، ގޯއްޗާއި ފުލެޓު ދޫކުރުމަށް އެ މަސައްކަތުގެ އަމަލީ މަސައްކަތް މިއަދު ހުއްޓުމެއްނެތި ކުރިއަށްދަނީ މި ސަރުކާރުން ކަމަށެވެ.

ޙަލީލް ވަނީ ކުރިއަށް އޮތް ލޯކަލް ކައުންސިލް އިންތިޙާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައިވެސް ރައްޔިތުން ޕީއެންސީގެ ޓިކެޓަށް ވާދަކުރައްވާ ހުރިހައި ފަރާތްތަކަށްވެސް ވޯޓު ދެއްވުމަށް އެދިވަޑައިގެންފަ އެވެ.