ދިވެހިރާއްޖޭގެ ނަސްރުގެ ދުވަހުގެ މުނާސަބާ ފާހަގަ ކުރުމަށް، ދިވެހި ގައުމީ ދިފާއީ ބާރު (އެމްއެންޑީއެފް) އިން އަސްކަރީ ހުށަހެޅުމުގެ ހަރަކާތެއް ކުރިއަށްގެންގޮސްފި އެވެ.
ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުހައްމަދު މުއިއްޒުއާއި އެމަނިކުފާނުގެ އަނބިކަނބަލުން މެޑަމް ސާޖިދާ މުހައްމަދު ބައްލަވާލެއްވުމަށް ވަޑައިގެންނެވި މި ހަރަކާތް މިއަދު ހަވީރު ބޭއްވީ ޖުމްހޫރީ މައިދާނުގަ އެވެ.
ރައީސްގެ ދެކަނބަލުން ޖުމްހޫރީ މައިދާނަށް ވަޑައިގެންނެވުމުން، އިސްތިގްބާލު ކުރެއްވީ މިނިސްޓަރ އޮފް ޑިފެންސް މުހައްމަދު ޣައްސާން މައުމޫނާއި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީއެވެ. އަސްކަރީ ހުށަހެޅުމުގެ ހަރަކާތް ފެށުމުގެ ކުރިން ދިވެހި ސިފައިންގެ ފަރާތުން ރައީސް މުއިއްޒުއަށް އަސްކަރީ ކުރުނީހެއް އަރުވާފައެވެ އެވެ.
ދިފާއީ ބާރުގެ ހާއްސަ އަސްކަރީ ހުށަހެޅުންތަކުގައި ދިވެހި ސިފައިންގެ ސްޕެޝަލް ބޯޓް ސްކޮޑްރަން ހަރަކާތްތެރިވާ ގޮތާއި، ސްޕެޝަލް ބޯޓް ސްކޮޑްރަންގެ އަންޑަރ ވޯޓަރ ޑިމޮލިޝަން ވީޑިއޯއެއްގެ އިތުރުން، ސްޕެޝަލް ފޯސަސްގެ ހަރަކާތްތަކާއި، ރެޕަލިންގްގެ ޙަރަކާތްތަކާއި ކައުންޓަރ އެޓޭކެއްގެ މައިދާނީ ހަރަކާތްތަކެއް ދައްކުވައިދީފައިވެ އެވެ. ހަމައެއާއެކު، އެއަރ ފޯސް ކޭޕަބިލިޓީސް، މެރިޓައިމް ކޭޕަބިލިޓީސް އަދި ލޭންޑް ފޯސް ކޭޕަބިލިޓީސްގެ އަސްކަރީ އަދި ހެވިކަމުގެ ހަރަކާތްތައް ވެސް ކުރިއަށް ގެންގޮސްފައިވެ އެވެ.
އަސްކަރީ ހަރަކާތްތައް ނިންމާލާފައި ވަނީ، މިލިޓަރީ ބޭންޑްގެ ފަރާތުން ހުށަހަޅައިދިން ލަވަޔަކުންނެވެ. އެއަށްފަހު، ސްޕެޝަލް ބޯޓް ސްކޮޑްރަންއާއި ސްޕެޝަލް ފޯސަސްގެ ކޯހުން ގްރެޖުއޭޓްވި ދަސްވެނިންނަށް ބެރޭ ހަވާލުކޮށްދެއްވުން އޮތެވެ. ދަސްވެނިންނަށް ބެރޭ ހަވާލުކޮށްދެއްވީ ރައީސް މުއިއްޒު އެވެ.
މި ރަސްމިއްތާތުގައި ސްޕެޝަލް ބޯޓް ސްކޮޑްރަން އިފްތިތާހުކޮށް، ސްޕެޝަލް ބޯޓް ސްކޮޑްރަންއާއި ސްޕެޝަލް ފޯސަސްގެ އަޒުމް ލައިދިނުންވެސް އޮތެވެ.
