އުމުރުން 16 އަހަރުން ފެށިގެން ސިފައިންނާއި ފުލުހުންގެ ވަޒީފާއަށް ވަދެވޭނެ ޕްރޮގްރާމެއް އަންނަ އަހަރުން ފެށިގެން ކުރިއަށް ގެންދަން ނިންމަވާފައިވާ ކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒުމިރޭ އިއުލާން ކުރައްވައިފިއެވެ.
މިރޭ ބޭއްވި ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސްް އިއުލާން ކުރެއްވީ ސިފައިންނާއި ފުލުހުންގެ ހިދުމަތައް މީހުން އިތުރު ކުރުމަށް "ގައުމީ ހިދުމަތުގެ ނަމުގައި ޕްރޮގްރާމެއް ހިންގަވަން ނިންމަވާފައިވާ ކަމަށެވެ. ރައީސް ޑރ.މުއިއްޒު ވިދާޅުވީ މަތީ ތައުލީމުގެ ފުރުސަތު ނެތް ކުދިންނާއި އަދި ވަޒީފާގެ ފުރުސަތު ނެތް ކުދިން މި ޕްރޮގްރާމްގައި ބައިވެރިވާން ޖެހޭނެ އެވެ. އަދި ވިދާޅުވީ މި ޕްރޮގްރާމްގެ ނަތީޖާއަކަށްވާނީ ކުރިއަށް އޮތް ހަތަރު އަހަރުގެ ތެރޭގައި ސިފައިންގެއަށް 4000 ކުދިން އަދި ފުލުހުންގެ މުވައްސަސާއަށް 1000 ކުދިން އިތުރުވެގެން ދިއުން ކަަމަށެވެ. އެއީ އަންނަ އަހަރުން ފެށިގެން ސިފައިންގެ ހިދުމަތައް އަހަރަކު 1000 ކުދިން އަދި ފުލުހުންގެ ވަޒީފާއަށް އަހަރަކު 250 ކުދިން ކަމަށް ރައީސް ފާހަގަ ކުރެެއްވިއެވެ.
"ސޯޅައަހަރުވެގެން އޯލެވެލް ނިންމާފައި ނޫނިއްޔާ އެ ތައުލީމު ހާސިލް ކުރެވުނު ހިސާބެއް ނިންމާފައި މަތީ ތައުލީމުގެ ފުރުސަތު ނުލިބޭ ކުދިންނާ އަދި ވަޒީފާއެއްވެސް ނުލިބޭ ކުއްޖަކު ވެއްޖެއްޔާ މި ޕްރޮގްރާމްގައި ބައިވެރިވާން ޖެހޭނެ. އެ ޕްރޮގްރާމްގައި ބައިވެރިވެގެން މިލިޓްރީ ތަމްރީން ހޯދަން ޖެހޭނެ. ހޯދައިގެން ރެކްރޫޓް ޕްރޮގުރާމް ނިންމާ ފުލް އޮފިސަަރަކަށް، ސިފައިންގެ މީހަކަށް ބަދަލުވާނެ. އަދި ފުލުހުންގެ ހިދުމަތައް ދާކަމުގައިވާނަމަ ފުލުހުންގެ ހިދުމަތައް ދާކަމުގައިވާނަމަ ފުލުހުންގެ މީހަކަށްވާނެ" ރައީސް ވިދާޅުވިއެވެ.
ރައީސް ވިދާޅުވީ މި ޕްރޮގުރާމް ކުރިއަށްދާނީ ގާނޫނަށް ގެންނަން ޖެހޭ ބަދަލުތައް ގެނެސްގެނެވެ. އަދި ވިދާޅުވީ އަންނަ އަހަރުގެ ދައުލަތުގެ ބަޖެޓުގައި މި ޕްރޮގްރާމަށް 400 މިލިއަން ރުފިޔާ ހާއްސަކުުރައްވާނެ ކަަމަށާއި އޭގެ ފަހުން ކޮންމެ އަހަރަކު 400 މިލިއަން އިތުރުކުރައްވާނެ ކަމަށެވެ. މީގެ އިތުރުން މި ޕްރޮގްރާމް ހިންގުމަށް ސިފައިންގެ ޓްރޭނިންނަށް ބޭނުންކުރާ ގިރިފުށީގެ ޖާގަ އިތުރުކުރުމަށް އެރަށުން ފަޅުން ބައެެއް ހިއްކަން ނިންމާފައިވާ ކަމަށްވެސް ރައީސް ވިދާޅުވިއެވެ.
