ހުޅުމާލެ ހޮސްޕިޓަލުގައި އަލަށް ތަޢާރަފްކުރެވޭ ޚިދުމަތްތަކާއެކު، ޓަރޝަރީ ފެންވަރަށް ޚިދުމަތްދޭ ހޮސްޕިޓަލެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެ ހޮސްޕިޓަލް ހުޅުއްވައިދެއްވައިފިއެވެ.
ހުޅުމާލެ ހޮސްޕިޓަލުގެ ޚިދުމަތް ޓާރޝަރީ ފެންވަރަށް ބަދަލުކޮށް، ހޮސްޕިޓަލުގެ އައު އިންޓެންސިވް ކެއަރ ޔުނިޓު (އައިސީޔޫ)، ނިއޯނެޓަލް އިންޓެންސިވް ކެއަރ ޔުނިޓު (އެންއައިސީޔޫ) އޮޕަރޭޝަން ތިއޭޓަރ ކޮމްޕްލެކްސް (އޯޓީސީ) އަދި ސެންޓްރަލް ސްޓެރައިލް ސަރވިސަސް ޑިޕާޓްމަންޓް (ސީއެސްއެސްޑީ) ވެސް ރައީސް ވަނީ ހުޅުވާދެއްވާފައެވެ.
އެކަމަށްޓަކައި މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ޢަބްދުއްރައްޒާގު ހަލީމް ވިދާޅުވީ ހުޅުމާލެ ހޮސްޕިޓަލު ލެވެލް ދޭއްގެ ހޮސްޕިޓަލެއްގެ ގޮތުގައި ހިންގަމުންދިއަ ނަމަވެސް އެ ހޮސްޕިޓަލަކީ ހުޅުމާލޭގެ ރައްޔިތުންނަށް ޚިދުމަތް ދެމުންދާ ހަމައެކަނި ސަރުކާރު ހޮސްޕިޓަލަށް ވުމާއެކު އެ ހޮސްޕިޓަލަށް ޚާއްސަ އިސްކަމެއް ރައީސް ދެއްވާ ކަމަށެވެ.
އަބްދުއްރައްޒާގު ވިދާޅުވީ މިއަދު ހުޅުމާލޭ ހޮސްޕިޓަލް ޓަރޝަރީ ފެންވަރަށް ތަރައްޤީކުރެވި ހުޅުވިގެން ގޮސްފައިމިވަނީ ރައީސް ދެއްވި އެ އަހަންމިއްޔަތުގެ ސަބަބުން ކަމަށެވެ.
ރާއްޖޭގެ ސިއްހީ ނިޒާމަށް އިންގިލާބީ ބަދަލެއް ގެނަސް، އެ ނިޒާމު އައު ހަރުފަތަކަށް ގެންދިޔުމަކީ ރައީސް އެންމެ އިސްކަމެއް ދެއްވާ އެއް ކަންތައްކަން ފާހަގަކުރައްވާ އަބްދުއްރައްޒާގު ވިދާޅުވީ ކުރިއަށް އޮތީ ރާއްޖޭގެ ސިއްހީ ދާއިރާއަށް ފަހި މުސްތަގުބަލެއް ކަމަށެވެ.
މިއަދު މިފެށުނީ އާ ސަފުހާއެއް. މާދަމާ އަންނާނީ މިއަށް ވުރެ ފަހި މުސްތަގުބަލަކާ އެކުގައިކަން މި ހޮސްޕިޓަލުތައް ހިންގުމަށް ހަވާލުވެ ހުރި މީހެއްގެ ހައިސިއްޔަތުން އަޅުގަނޑު ޔަގީންކަމާ އެކު ދަންނަވަން، - ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ޢަބްދުއްރައްޒާގު ހަލީމް
ހުޅުމާލެ ހޮސްޕިޓަލުން ބުނީ، އަލަށް ޤާއިމްކޮށްފައިވާ، ސެންޓްރަލް ސްޓެރައިލް ސަރވިސް ޑިޕާޓްމަންޓްއަކީ މެޑިކަލް އާލާތްތައް ބައިނަލް އަގްވާމީ ސްޓޭންޑަރޑް ތަކާއި އެއްގޮތްވާގޮތަށް ޖަރާސީމު ނައްތާލައި، އިންފެކްޝަންތައް ކޮންޓްރޯލްކޮށް، ބަލިމީހުންގެ ރައްކާތެރިކަން ކަށަވަރުކޮށްދޭ މުހިންމު ޑިޕާޓްމަންޓެއް ކަމަށެވެ.
އަދި އަލަށް ޤާއިމުކުރެވުނު 10 އެނދުގެ އައިސީޔޫގެ ސަބަބުން، ކްރިޓިކަލް ކޮންޑިޝަންގައި ތިބޭ ބަލިމީހުންނަށް ވަގުތުން ފަރުވާ ދެވި، ފުރާނައަށް ކުރިމަތިވެދާނެ ނުރައްކާތައް ކުޑަކުރެވޭނެ. އަދި ހާލުބޮޑުވާ ހާލަތްތަކުގައި ރިފާ ކުރަންޖެހޭ ރިފާކުރުންތަކަށް ހައްލު ލިބިގެންދާނެ ކަން އެ ހޮސްޕިޓަލުން ފާހަގަކުރެއެވެ.
މީގެ އިތުރުން އަލަށް ޤާއިމުކުރެވުނު 14 އެނދުގެ އެންއައިސީޔޫގައި، ނިއޯނޭޓަލް ވެންޓިލޭޓަރތަކާއި، އިންކިއުބޭޓަރތަކާއި، ފޮޓޯތެރަޕީ ޔުނިޓްތައް ހުންނާނެ ކަން ފާހަގަކޮށް ހުޅުމާލެ ހޮސްޕިޓަލުން ބުނީ، މުޅިން އަލަށް ގާއިމު ކުރެވުނު ހަތަރު އޮޕަރޭޝަން ތިއޭޓަރ ކޮމްޕްލެކްސްގައި ހިމެނެނީ ކަށީގެ ޚާއްޞަ ތިއޭޓަރަކާއި، ލޮލުގެ ޚާއްޞަ ތިއޭޓަރަކާއި، އަންހެނުންގެ ޚާއްޞަ ތިއޭޓަރަކާއި، އަދި ޖެނެރަލް ސާރޖަރީތަކަށް ޚާއްސަ ތިއޭޓަރެއް ކަމަށެވެ.
މިއަދުގެ ރަސްމިއްޔާތުގައި ހުޅުމާލެ ހޮސްޕިޓަލް ޓަރޝަރީ ފެންވަރުގައި ހިންގުމުގެ ރެޖިސްޓްރޭޝަން އަދި އޮޕަރޭޓިންގ ލައިސަންސް އެ ހޮސްޕިޓަލާ ވަނީ ހަވާލުކޮށްފައެވެ.
