އެމްޑީޕީގެ ޤައުމީ މަޖިލިސް ނުނިމެނީސް ރައީސް ނަޝީދުގެ ފެކްޝަނުގެ ބޭފުޅުން ނިކުމެވަޑައިގެންފި

އެމްޑީޕީގެ ޤައުމީ މަޖިލިސް ބައްދަލުވުން ނުނިމެނީސް އެ ޕާޓީގެ ރައީސް އަދި ރައްޔިތުންގެ މަޖަލީހުގެ ރައީސް މުޙައްމަދު ނަޝީދަށް ތާއީދު ކުރައްވާ ހުރިހާ މެންބަރުން ބައްދަލުވުން ދޫކުރައްވައި ވަޑައިގެންފިއެވެ. އެމްޑީޕީގެ ޤައުމީ މަޖިލީހުގެ ޖަލްސާއެއް ހޯމަ ދުވަހުގެރޭ ބޭއްވީ، އެ ޕާޓީގެ ރިޔާސީ ޕްރައިމަރީއަށް ޤައުމީ މަޖިލީހުން ރުހުންދީގެން ފަސް މެންބަރުންގެ ކޮމިޓީއެއް ނެގުމުގެ އިތުރުން ޤައުމީ މަޖިލިސް ރިޔާސަތުން މައުލޫމާތު ދިނުމަށެވެ. އެހެން ނަމަވެސް ޤައުމީ މަޖިލިސް ބައްދަލުވުމުގެ ތެރެއިން ވަނީ ދެ ފެކްޝަނުގެ މެދުގައި ޚިޔާލު ތަފާތުވުން އުފެދި ބައްދަލުވުން ދިގުލައިގެން ގޮސްފައެވެ.

" ޕްރައިމަރީ ވާދަވެރިއެއް ނުވާނެ": އަނދުން ޙުސައިން

އެމްޑީޕީގެ ރިޔާސީ ޕްރައިމަރީ ވާދަވެރިއެއް ނުވާނެކަން ވަރަށް ޔަޤީން ކަމަށާ، އެހެން ނަމަވެސް ފޯރިގަދަވާނެ ކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ޙުސައިން ޝަހީމްވަނީ ޤައުމީ މަޖިލިސް ބައްދަލުވުމުގައި ވިދާޅުވެފައެވެ. "އަޅުގަނޑަށް ހަމަ ވަރަށް ޔަޤީން މި އިންތިޚާބު ވާދަވެރިއެއް ނުވާނެ. ފޯރިގަދަ ވާނީ" ޙުސައިން ޝަހީމް ވިދާޅުވިއެވެ. އެމްޑީޕީގެ ރޫޙުގައި ރަނގަޅަށް ކެމްޕޭންކޮށް، ޕާޓީގެ އެތެރޭގެ މަސްލަޙަތު ނުގެއްލޭ ގޮތަކަށް ކަންކަން ގެންދިއުމަށް އޭނާ އެދިވަޑައިގެންނެވިއެވެ.

ޕްރައިމަރީއަށް ފަސް މެންބަރުންގެ ކޮމިޓީއެއް ނެގުމަށްޓަކައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދުގެ ފެކްޝަނުން ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމް ދެ މެންބަރެއްގެ ނަން ހުށަހެޅުއްވިއެވެ. އެއީ ކުރީގެ ވިލިނގިލީ ދާއިރާގެ މެންބަރު މުހައްމަދު އިބްރާހީމް މަނިކުގެ އިތުރުން ނޫނު އަތޮޅު ކައުންސިލްގެ ރައީސް މުޙައްމަދު ބަޝީރުގެ ނަމެވެ.

އޭނާ އެދިވަޑައިގަތީ ރައީސް މުޙައްމަދު ނަޝީދުގެ ފަރާތްޕުޅުން ދެ ބޭފުޅެއްގެ ނަމާއި، ރައީސް އިބްރާހީމް މުހައްމަދު ޞާލިޙުގެ ފަރާތްޕުޅުން ދެ ބޭފުޅެއްގެ ނަން ހުށަހަޅައިގެން ޕްރައިމަރީއަށް ކޮމިޓީ ނެގުމަށެވެ. އަދި އޭގެ އިތުރުން ދެ ފަރާތުން އެއްބަސްވާ މެންބަރަކު ކޮމިޓީއަށް ނަގައި ފަސް މެންބަރުން ހަމަޖެއްސުމަށެވެ. އެހެން ނަމަވެސް އަލީ އާޒިމް ދެ ނަމެއް ހުށަހެޅުއްވުން އެމްޑީޕީގެ ޤައުމީ މަޖިލީހުގެ ރިޔާސަތު ބަލަހައްޓަވާ ސަރުކާރުގެ އިކޮނިމިކް މިނިސްޓަރ އަދި އެމްޑީޕީގެ ޗެއާ ޕާސަން ފައްޔާޒު އިސްމާޢީލް އެދިވަޑައިގަތީ ދެ ނަމެއް ހުށަހެޅުއްވުމުގެ ބަދަލުގައި ފަސް މެންބަރެއްގެ ނަން ހުށަހަޅުއްވައިދެއްވުމަށެވެ. ފައްޔާޒު އިސްމާޢީލް ވިދާޅުވީ ކޮމިޓީއަށް މެންބަރުން ނެގޭނީ އެ ޕާޓީގެ އަސާސީ ޤަވާއިދުގައިވާ ގޮތުގެ މަތިން ކަމަށެވެ.

އަދި ކޮމިޓީއަށް ނެގުމަށް ތިން މެންބަރުންގެ ޕްރޮޕޯޒަލެއް ހުށަހެޅުއްވުމުން، ބަލައިނުގަނެވޭނެ ކަމުގައި ވެސް ފައްޔާޒު އިސްމާޢީލް ވިދާޅުވިއެވެ.

ޤައުމީ މަޖިލިސް ބައްދަލުވުމުގައި އެމްޑީޕީގެ ޕްރައިމަރީގައި ވާދަ ކުރައްވާ ދެ ބޭފުޅުންގެ ކެމްޕޭން މެނޭޖަރު ވެސް ތިއްބެވުމުން ޤައުމީ މަޖިލިސް ރިޔާސަތުން ދެ ފަރާތުން މަޝްވަރާ ކުރުމަށް ފަހު ނަން ހުށަހެޅުމަށް ފުރުސަތު އެރުވިއެވެ. އެ ގޮތުން ރިޔާސަތުން ވަނީ މަޝްވަރާ ކުރުމަށް ދިހަ މިނެޓުގެ ވަގުތުކޮޅެއް އަރުވާފައެވެ.

"އަޅުގަނޑު ފުރުސަތު އަރުވާނަން ދިހަ މިނެޓުގެ ފުރުސަތެއް، ތި ބޭފުޅުންނާ ތި ބޭފުޅުންގެ ތެރޭގަ ދެ ކެންޑިޑޭޓުންގެ މެނޭޖަރުންނާ ވާހަކަ ދައްކައިގެން އެއް ގޮތް ކުރެވޭތޯ. އެއް ގޮތް ނުކުރެވޭ ކަމަށް ވެއްޖިއްޔާމުން މި ތަނަށް ހުށަހެޅިފައިހުރި ގޮތަށް ވޯޓަށް އަހާނެ ވާހަކަ ދަންނަވަމުން....." ފައްޔާޒު އިސްމާޢީލް ވިދާޅުވިއެވެ.

މަޝްވަރާއަށް ފަހު އެމްޑީޕީގެ ޤައުމީ މަޖިލިސް މެންބަރ އަންވަރު އިބްރާހީމް ހުށަހެޅުއްވީ ޤައުމީ މަޖިލީހުން ޕްރައިމަރީ ކޮމިޓީއަށް ނަގާނެ މެންބަރުންގެ ނަންތައް ހުށަހެޅުމަށެވެ.

"ރިޔާސަތަކުނެއް ނޫން ފަސް ނަން ހުށަހަޅަން ޖެހޭނީ" ވިދާޅުވިއެވެ.

އަންވަރު އިބްރާހީމްގެ ހުށަހެޅުމަށް ރިޔާސަތުން ދިން ޖަވާބަކީ އެ ވިދާޅުވީ އެ ބޭފުޅާ އަމިއްލަ ރައުޔު ކަމުގައެވެ. އަދި އަސާސީ ޤަވާއިދުގައިވާ ގޮތުން ނަމަ ސެކެޓަރިއޭޓުން ނަންތައް ހުށަހެޅޭނެ ކަމަށް ރިޔާސަތުން ފާހަގަކުރިއެވެ.

ޑިމޮކްރަޓިކް ހަމައަކީ އާޒިމާއި އީވާގެ އިތުރުން ޝާތިރުގެ ނަން ފާސް ކުރުން: މޫކޭ

ޤައުމީ މަޖިލިސް ބައްދަލުވުމުގައި ރޯޑް ޑިވަލޮޕްމެންޓް ކޯޕަރޭޝަންގެ މެނޭޖިންގ ޑައިރެކްޓަރ މޫސާ އަލިމަނިކު ވިދާޅުވީ ޑިމޮކްރަޓިކް ހަމައިން ޕްރައިމަރީއަށް ފަސް މެންބަރުންގެ ކޮމީޓީ ނެގުމަށް އަލީ އާޒިމާއި ގަލޮޅު އުތުރު ދާއިރާގެ މެންބަރު އީވާ އަބްދުﷲގެ ނަން ހުށަހަޅުއްވާ ކަމަށެވެ.

"ޑިމޮކްރަޓިކް ހަމައަކީ އެއީ މިގޮތަށް ފާސްވުން ކަމަށް އަޅުގަނޑު މި ބަލަނީ" މޫކޭ ވިދާޅުވިއެވެ.

މިއާ އެކު ޤައުމީ މަޖިލިސް ރިޔާސަތުން ވަނީ އެއްވެސް ބޭފުޅަކު އެހާ ބޮޑަށް ސަމާސާ ކުރަން ނޫޅުއްވުމަށް އެދިފައެވެ.

"ފަސް ނަމާ އެއްކޮށް ހުށަހަޅުއްވަންވީ. އެހެން ނޫނީ މިހާރު އޮތް އެއްޗަކާ އެކު އަޅުގަނޑު ވޯޓަށް އަހާނަން." ރިޔާސަތު ބަލަހައްޓަވާ ފައްޔާޒު އިސްމާޢީލް ވިދާޅުވިއެވެ.

އަނެއްކާ ވެސް ފުރުސަތު ހޯއްދަވައި އަލީ އާޒިމްވަނީ އިންސާފުވެރިކަމާ އެކު ކޮމިޓީއަށް މެންބަރުން ނެގުމަށް އެދިވަޑައިގަންނަވާފައެވެ.

"ފަސް ނަން ހުށަހެޅީމަ އެކަން އެ ނިމުނީއޭ. ދެން މީ އެހާ ބޮޑު ކަމަކަށް ހަދައިގެން ބާރު އޮތީތީވެ ކަންކަން ކުރާ އުސޫލުން ކުރުމަކީ އެންމެ ފައިދާހުރި ގޮތެއް ނޫނޭ އިނގޭތޯ" އަލީ އާޒިމް ވިދާޅުވިއެވެ.

"ކިހިނެއްތޯ އިޢުލާންކޮށް ކެންޑިޑޭޓުން ނާންނަނީސް އެހެންމާ ކޮމިޓީ ނަގާނީ؟ ތި ވިދާޅުވާ އެއްޗެއްގެ އެއްވެސް އޮއްޓަރެއް ނެތެއް ނޫންތޯ؟" ފައްޔާޒު އިސްމާއީލް ރައްދު ދެއްވިއެވެ.

މި ކަމާ ގުޅިގެން އީވާ އަބްދުﷲ އެދިވަޑައިގަތީ އިންސާފުވެރިކަމާ އެކު ރައީސް ނަޝީދަށް ތާއީދު ކުރާ މެންބަރުންގެ ވެސް އަޑު އައްސަވައިގެން އަދި ދައްކަން ހުރި ވާހަކައަށް ފުރުސަތު ވެސް ދެއްވައިގެން ރިޔާސަތުން ކުރިޔަށް ގެންދިއުމަށެވެ.

އެއާއެކު އެދުނު ވަރަކަށް ފުރުސަތު ދޭނެ ކަމަށް ރިޔާސަތުން ވަނީ އަންގާފައެވެ. މިއާ އެކު ކޮންމެވެސް ވަރަކަށް ޚިޔާލު ތަފާތުވިއެވެ. ރިޔާސަތުން އެދެނީ ފަސް މެންބަރުންގެ ލިސްޓެއް ހުށަހެޅުމަށެވެ. އެހެން ނަމަވެސް ރައީސް މުޙައްމަދު ނަޝީދަށް ތާއީދު ކުރާ މެންބަރުން އެދިވަޑައިގަތީ ކޮންމެ ފަޅިއަކުން ދެ މެންބަރުން ނެގުމަށް ފަހު، ދެ ފަޅިން އެއްބަސްވާ ފަރާތަކު އައްޔަންކޮށް ކޮމިޓީ އެކުލަވާލުމަށެވެ.

މި އާ އެކު އަނެއްކާ ވެސް ރިޔާސަތުން ވަނީ މަޝްވަރާ ކުރުމަށް ފަނަރަ މިނެޓުގެ ވަގުތުކޮޅެއް ދީފައެވެ.

ޗެއާގެ ޤާބިލްކަމާ މެދު ޝައްކެއް ނުކުރަން: ޙަސަން ލަތީފް

ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް އެދިވަދައިގަތީ ޗެއާޕާސަން ފައްޔާޒު އިސްމާޢީލް އެ ޕާޓީގެ އިސް ލީޑަރު ރައީސް އިބްރާހީމް މުޙައްމަދު ޞާލިޙާއި، އެ ޕާޓީގެ ރައީސް މުޙައްމަދު ނަޝީދުގެ މަޝްވަރާއެއް ވެސް ހޯއްދެވުމަށް ފަހު ކޮމިޓީއަށް މެންބަރުން ނެގުމަށެވެ. އަދި އަޣުލަބިއްޔަތު އޮތީތީވެ، ފަސް މެންބަރުންގެ ކޮމިޓީއެއް ނަގާ އިރު، މައި އިންތިޚާބާ ކުރިމަތިލާ އިރު، ޕާޓީއަށް ވެދާނެ ގޮތަކާ މެދު ކަންބޮޑުވާ ކަމަށް ވެސް ޙަސަން ލަތީފްވަނީ ވިދާޅުވެފައެވެ.

ކުރެންދޫ ދާއިރާގެ މެންބަރު އަބްދުލް ޣަނީ އަބްދުލް ޙަކީމް ހުށަހެޅުއްވީ ވަކިވަކި މެންބަރުންގެ ނަންތަކަށް ވޯޓަށް އެހުމަށެވެ. އެހެން ނަމަވެސް އެ ހުށަޅުމަށް ތާއީދު ލިބިފައެއް ނުވެއެވެ. މި އާ އެކު ރައީސް މުޙައްމަދު ނަޝީދަށް ތާއީދު ކުރާ ހުރިހާ މެންބަރުން ޤައުމީ މަޖިލިސް ބައްދަލުވުން ދޫކުރައްވައި ވަޑައިގަތީއެވެ.

އެ އާ އެކު ޤައުމީ މަޖިލީހުން ފާސްކުރީ ހެންވޭރު ދެކުނު ދާއިރާގެ މެންބަރު ޙުސައިން ޝަހީމް ހުށަހެޅުއްވާފައިވާ ލިސްޓެވެ. އެ ލިސްޓުގައި ހިމެނިވަޑައިގަންނަވީ އިބްރާހީމް ވަޙީދު، އަނަސް އަބްދުއްސައްތާރު، އަކްރަމް ކަމާލުއްދީން އަދި އަޙުމަދު އަބްދުﷲ އަފީފްގެ އިތުރުން މުޙައްމަދު އީމާނެވެ.

ޤައުމީ މަޖިލީހުގެ އަޣުލަބިއްތަކާ އެކު ވަނީ މި ފަސް ބޭފުޅުން ޕްރައިމަރީ ކޮމިޓީއަށް ނެގުމަށް ފާސްކޮށްފައެވެ.

އެމްޑީޕީގެ ޕްރައިމަރީ އޮންނާނީ ޖެނުއަރީ މަހުގެ އަށާވީސްވަނަ ދުވަހުއެވެ.