މަޖިލީހުގެ ނައިބު ރައީސް ކަމުން ނާޒިމް ވަކިކުރުމުގެ ބަހުސްގައި 10 މިނެޓް ދޭން ނިންމައިފި

ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަޙްމަދު ނާޒިމް އެ މަޤާމުން ވަކިކުރުމަށް ހުށަހަޅާފައިވާ އިތުބާރު ނެތްކަމުގެ މައްސަލައިގައި، އަމިއްލަ ދިފާޢުގައި ވާހަކަދެއްކެވުމަށް 10 މިނެޓް ދިނުމަށް މަޖިލީހުގެ އާންމު ކޮމިޓީން މިއަދު ނިންމައިފިއެވެ.

މަޖިލީހުގެ ނައިބު ރައީސްގެ މަޤާމުން ނާޒިމް ވަކިކުރުމަށް ހުށަހެޅި ޤަރާރު މަޖިލީހަށް ހުށަހަޅާފައިވަނީ މި ހިނގާ ނޮވެމްބަރު މަހުގެ 14 ވަނަ ދުވަހުއެވެ.

މަޖިލީހުގެ އިދާރާއިން ހާމަކުރައްވާފައިވާ ގޮތުގައި، މި މައްސަލަ ކުރިއަށް ގެންދަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ރައްޔިތުންގެ މަޖިލީހުގެ ގާވާއިދުގެ އިމުގެ ތެރެއިންނެވެ.

މިއަދު ބޭއްވުނު އާންމު ކޮމިޓީގެ 5 ވަނަ ބައްދަލުވުމުގައި، މި ގަރާރާ ގުޅޭ ބަހުސް ކުރިއަށް ގެންދާނެ އުޞޫލުތައް ވަނީ ކަނޑައަޅާފައެވެ.

ހޮޅުދޫ ދާއިރާގެ މެންބަރު އަބްދުއްސައްތާރު މުޙައްމަދު ހުށަހަޅުއްވައި، ދުވާފަރު ދާއިރާގެ މެންބަރު މުޙައްމަދު އަލީ ތާއީދުކުރެއްވި ހުށަހެޅުމުގައި ވަނީ، މި މައްސަލައިގެ ބަހުސް ކުރިއަށް ގެންދިއުމަށް މަޖިލީހުގެ ތަޅުމުގައި ޖުމްލަ އެއް ގަޑިއިރުގެ ވަގުތެއް ކަނޑައެޅުމަށެވެ.

މި ނިންމުމުގައިވާ ގޮތުން، ސިޔާސީ ޕާޓީތަކަށް ވަގުތު ބަހާލާއިރު، ބަހުސްގައި ބައިވެރިވާ ކޮންމެ މެންބަރަކަށް ފުރުޞަތު ދެވޭނީ 3 މިނެޓަށެވެ. އަދި މަޖިލީހުގެ ނައިބު ރައީސް އަޙްމަދު ނާޒިމަށް ޖަވާބުދާރީވުމަށް ދެވޭ 10 މިނެޓުގެ ފުރުޞަތު އޮންނާނީ ބަހުސް މަރުޙަލާ ފެށުމުގެ ކުރިންނެވެ. މި ހުށަހެޅުން ފާސްވެފައިވަނީ ކޮމިޓީގެ ބައްދަލުވުމަށް ހާޒިރުވެވަޑައިގެން ތިއްބެވި 7 މެންބަރުންގެ ތެރެއިން 5 މެންބަރުންގެ އަޣުލަބިއްޔަތުންނެވެ.

ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސް މަގާމުން ވަކިކުރުމުގެ ގަރާރެއް ހުށަހެޅިއްޖެނަމަ، އެ މައްސަލައަށް ވަކި ގޮތެއް ނިންމުމުގެ ކުރިން މަޖިލީހުގެ އެހެން އެއްވެސް މަސައްކަތެއް ކުރިއަށް ނުގެންދެވޭނެ ކަމަށް މަޖިލީހުގެ ޤަވާއިދުގައި ބަޔާންކޮށްފައިވެއެވެ.

މިފަދަ ބަހުސެއް ހިނގާ ޖަލްސާއެއްގައި ބައިވެރިވެވަޑައިގެން، އަމިއްލަ ދިފާޢުގައި ވާހަކަދެއްކުމުގެ ޙައްޤު އެ ބޭފުޅަކަށް ލިބިދީފައިވީ ނަމަވެސް، އެ މައްސަލައިގައި ނަގާ ވޯޓުގައި ބައިވެރިވެވަޑައިގަތުމުގެ ފުރުޞަތެއް އެ ބޭފުޅަކަށް ނޯންނާނެއެވެ.