ކާބޯތަކެތީގެ ހިދުމަތް ފޯރުކޮށްދޭ ތަންތަނުން ނަގަމުން އަންނަ ފީތައް ކުޑަކޮށްފި

ކާބޯތަކެތީގެ ޚިދުމަތްދޭ ތަންތަނުން ނަގަމުން އަންނަ ފީތައް މޯލްޑިވްސް ފުޑް އެންޑް ޑްރަގް އޮތޯރިޓީ އެމް.އެފް.ޑީ.އޭ އިން ކުޑަކޮށްފިއެވެ.

އެ އޮތޯރިޓީން ހާމަކުރައްވާފައިވާ ގޮތުގައި، ކާބޯތަކެތީގެ ޚިދުމަތްދޭ ތަންތަން ރަޖިސްޓްރީކުރުމާ ބެހޭ ގަވާއިދުގެ ދަށުން ނަގަމުންދާ ރަޖިސްޓްރޭޝަން ފީ އާއި ކެޓަގަރީ ފީ ކުޑަކުރަން ވަނީ ނިންމާފައެވެ. ކުރިއަށް އޮތް ދެ އަހަރު ދުވަހުގެ މުއްދަތަށް މި ފީތަކުން 50 އިންސައްތަ އުނިކުރުމަށް ވަނީ ހަމަޖެހިފައެވެ.

މި ބަދަލާއެކު ފީތަކަށް އަންނާނެ ބަދަލުތަކަކީ:

ރަޖިސްޓްރޭޝަން ފީ: މީގެ ކުރިން އަހަރަކު 500 ރުފިޔާ ނަގަމުން އައި ނަމަވެސް މިހާރު މި ފީ ވަނީ 250 ރުފިޔާއަށް ކުޑަކުރެވިފައެވެ.

ބަދިގެއާއެކު ސަރވިންގ އޭރިއާ ހިމެނޭ ތަންތަން: އަހަރީ ފީގެ ގޮތުގައި ކުރިން ނަގަމުން އައި 2,000 ރުފިޔާ، 1,000 ރުފިޔާއަށް ވަނީ ކުޑަކުރެވިފައެވެ. (50 ގޮނޑިއަށްވުރެ އިތުރުވާ ކޮންމެ 50 ގޮނޑިއަކަށް ނަގާ 100 ރުފިޔާގެ ފީ ވެސް 50 ރުފިޔާއަށް ކުޑަވާނެއެވެ.)

ޓޭކްއަވޭ އަދި ބަތްޕާރުސަލް ވިއްކާ ތަންތަން: 2,000 ރުފިޔާގެ ބަދަލުގައި ދެން ނަގާނީ 1,000 ރުފިޔާއެވެ.

ވިޔަފާރީގެ އުސޫލުން ކާބޯތަކެތި ތައްޔާރުކުރާ ބަދިގެތަކާއި ހެދިކާ ހަދާ ތަންތަން: މިފަދަ ތަންތަނުން ނަގާ ފީ 2,000 ރުފިޔާއިން 1,000 ރުފިޔާއަށް ވަނީ ދަށްކޮށްފައެވެ.

ޖޫސް ފަދަ ބުއިންތައް ވިއްކާ ތަންތަން: އަހަރީ ފީ 2,000 ރުފިޔާއިން 1,000 ރުފިޔާއަށް ވަނީ ކުޑަކުރެވިފައެވެ.

ކާބޯތަކެތި ވިއްކާ ގާޑިޔާ ފަދަ ތަންތަން: ކުރިން ނަގަމުން އައި 500 ރުފިޔާގެ ބަދަލުގައި ދެން ނަގާނީ 250 ރުފިޔާއެވެ.

ހުއްދަ ދީފައިވާ ތަންތަނުން ކުރެ ތަނެއްގެ ލައިސަންސް ގެއްލިއްޖެނަމަ އައު ލައިސަންސެއް އަލުން ހެއްދުމާއި އަދި ހަލާކުވެގެން އައު ކުރާނަމަ ގަވާއިދުގައި އޮންނަގޮތުން ލައިސަންސް ފީގެ 50 އިންސައްތަ ނަގާނެ ކަމަށްވެސް އެމްއެފްޑީއޭ އިން ވަނީ ބުނެފައެވެ.