އާއިލީ ބޯހިޔާވަހިކަމަށް ފޯމް ހުށަހަޅާއިރު ލިޔެކިޔުންތައް ހަމައަށް ހުށަހަޅަން ސަމާލްވުމަށް އިލްތިމާސްކޮށްފި

އާއިލީ ބޯހިޔާވަހިކަމަށް ފޯމް ހުށަހަޅާއިރު ލިޔެކިޔުންތައް ހަމައަށް ހުށަހަޅަން ހައުސިންގ މިނިސްޓްރީގެ ފަރާތުން އިލްތިމާސްކޮށްފިއެވެ.

ހައުސިންގ މިނިސްޓްރީ އިން ބުނީ އާއިލީ ބޯހިޔާވަހިކަމަށް ފޯމް ފުރިހަމަ ކުރާ ފަރާތްތަކުން ފޯމް ފުރިހަމަކޮށް ސަބްމިޓް ކުރުމުގެ ކުރިން ފޯމާއި އެކު ހުށަހަޅަންޖެހޭ އިގްރާރު އަޕްލޯޑް ކުރެވެނީ މިނިސްޓްރީން ދީފައިވާ ޓެމްޕްލޭޓްގައިތޯ ޔަގީންކުރަންވާނެ ކަމަށެވެ. އެހެންކަމުން އެކަމަށް ސަމާލުކަން ދިނުމަށް ހައުސިންގ މިނިސްޓްރީން އެދިފައިވެއެވެ.

މީގެ އިތުރުން މާލޭގައި ދިރިއުޅޭ އެހެން ރަށްރަށުގެ ރަށްވެހިން މާލޭގައި 15 އަހަރު ދިރިއުޅުނު ކަން ސާބިތުކޮށް ދިނުމުގެ ގޮތުން ހުށަހެޅިދާނެ ގިނަ ލިޔުންތަކެއް ހިމެނޭކަމަށް ހައުސިންގ މިނިސްޓްރީން ވަނީ ބުނެފައެވެ.

މާލޭގައި ދިރިއުޅޭ އެހެން ރަށްރަށުގެ މީހުން މާލޭގައި ދިރިއުޅުނުކަން ސާބިތުކޮށްދިނުމަށް މާލޭގައި ދިރިއުޅޭ ގޭގެ ވެރިފަރާތުން ފޯރުކޮށްދޭ އެފިޑެވިޓް ހުށަހަޅާއިރު މިނިސްޓްރީގެ ޕޯޓަލް އާއި އުސޫލުގައި ހިމެނޭ ޓެމްޕްލޭޓްގައި ހުށަހަޅާފައިވާ ލިޔުމެއްކަން ޔަގީން ކުރުމަށް ހައުސިންގ މިނިސްޓްރީއިން ވަނީ އެދިފައެވެ.

މާލޭގައި 15 އަހަރު ދިރިއުޅުނުކަން ސާބިތުކުރުމަށް ކައުންސިލްތަކުން ދޫކުރާ ލިޔުން ހުށަހެޅިދާނެތޯ އާއި މެދު ގިނަ ފަރާތްތަކުން ސުވާލު ކުރަމުންދާ ކަމަށް މިނިސްޓްރީ އިން ވަނީ ބުނެފައެވެ.

އާއިލީ ބޯހިޔާވަހިކާމާއި ބެހޭ އުސޫލުގައި ރަސްމީ އިދާރާއަކުން ބަލަހައްޓާ މައުލޫމާތު ތަކުގެ މައްޗަށް ބިނާކޮށް ދޫކުރާ ލިޔުމަކީ ބަލައިގަނެވިދާނެ ލިޔުމެއްކަމަށް ބަޔާންކޮށްފައިވާ ކަމަށް ހައުސިންގ މިނިސްޓްރީ އިން ވަނީ ބުނެފައެވެ. އެހެންކަމުން ކައުންސިލްތަކުން ދޫކުރާ ލިޔުމަކީ ކައުންސިލްތަކުން ބަލަހައްޓާ މައުލޫމާތުގެ އަލީގައި މީހަކު މާލޭގައި ދިރިއުޅުނުކަން ސާބިތުކޮށްނުދެވޭ ކަމުގައިވާނަމަ އެލިޔުން ބަލައިނުގަނެވޭނެ ކަމަށް ވެސް ވަނީ ބުނެފައެވެ.

ވަޒީފާގެ ލިޔުން ހުށަހަޅާއިރުގައި ވަޒީފާގެ މުއްދަތާއި ވަޒީފާގެ އާމްދަނީ ހިމެނޭހެން ފުރިހަމަ ލިޔެކިޔުންތައް ހުށަހެޅުމަށް ސަމާލުކަން ދިނުމަށް މިނިސްޓްރީން އިލްތިމާސްކޮށްފައިވެއެވެ.

އާއިލީ ބޯހިޔާވަހިކަމަށް އެދި ފޯމް ހުށަހަޅާއިރު ފުރިހަމަކުރަންޖެހޭ ހުރިހާ ލިޔުންތަކެއް ހުށަހަޅާއިރު އުސޫލުގައި ބަޔާންކުރާކަންތައްތައް ފުރިހަމަވެފައިވާ ލިޔުންތައް ހުށަހެޅުމަށް ހާއްސަ ސަމާލުކަމެއް ދިނުމަށް ހައުސިންގ މިނިސްޓްރީގެ ފަރާތުން އެދިފައިވެއެވެ.

އާއިލީ ބޯހިޔާވަހިކަމަށް އެދި ފޯމް ހުށަހަޅާއިރު އަވަހަށް ފޯމް ސަބްމިޓްކުރުމުގެ ބަދަލުގައި ވީހާވެސް ރަނގަޅަށް ހުރިހާ މައުލޫމާތުތަކެއް ފުރިހަމަކޮށް ހުރިހާ ލިޔެކިޔުމެއް ހަމަކޮށް އެއަށްފަހުވެސް ދެތިން ފަހަރު ޗެކްކޮށް އަމިއްލައަށް ވެރިފައިކުރުމަށްފަހު ފޯމް ސަބްމިޓްކުރުމަށް ވަނީ އެދިފައެވެ.