ގުޅީފަޅު ހިއްކުމުގެ މަޝްރޫއު ދެ ބިލިއަނަށް ބޮސްކާލިސްއަށް

ވިޔަފާރި ބަނދަރު ތަރައްގީކުރުމަށާއި މާލޭ މީހުންނަށް ގޯތިދިނުމަށް، ގުޅީފަޅު ހިއްކުމަށް ދެ 130 މިލިއަން ޑޮލަރު ނުވަތަ ދެ ބިލިއަން ރުފިޔާއަށް ނެދަލޭންޑްސްގެ ބޮސްކާލިސްއާއި ހަވާލުކޮށްފިއެވެ.

މީގެކުރިންވެސް ދެ ފިޔަވައްސަކަށް ބަހާލައިގެން ގުޅީފަޅުން ބިން ހިއްކާފައިވެއެވެ. އެގޮތުން 53 މިލިއަން ޑޮލަރު ނުވަތަ 817 މިލިއަން ރުފިޔާ ހަރަދުކޮށްގެން ގުޅީފަޅުން 192 ހެކްޓަރުގެ ބިން ހިއްކިއެވެ. ފުރަތަމަ ފިޔަވަހީގެ އެބިން ހިއްކީވެސް ބޮސްކާލިސް އެވެ.

ގުޅީފަޅު ބިން ހިއްކުމުގެ މަސައްކަތް ބޮސްކާލިސްއާ ހަވާލު ކުރީ 130.4 މިލިއަން ޑޮލަރު (2.01 ބިލިއަން ރުފިޔާ) އަށެވެ. ގުޅީފަޅުގައި ހިއްކާ ބައި ހާއްސަ ކުރުމަށް ހަމަޖެހިފައި ވަނީ ބައިނަލްއަގުވާމީ ބަނދަރު ހެދުމަށެވެ. އެ މަޝްރޫއާއެކު، މިހާރު މާލޭގެ އުތުރު ފަރާތުގައި ހިންގަމުން އަންނަ ވިޔަފާރި ބަނދަރު ގުޅީފަޅަށް ބަދަލު ކުރެވޭނެއެވެ.

މީގެއިތުރުން 8.9 މިލިއަން ރުފިޔާއަށް އެމްޓީސީސީއާއި ހަވާލުކޮށްގެންވެސް ގުޅީފަޅުން 80000 ކިއުބިކް މީޓަރުގެ ބިން ހިއްކިއެވެ. ގުޅީފަޅަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި މީހުން ދިރިއުޅުމަށް ހިއްކަންފެށި ރަށެކެވެ. ރައީސް ނަޝީދުގެ ވެރިކަން ވެއްޓުނުއިރު އެތަނުގައި ފްލެޓްވެސް އަޅާފައިވެއެވެ.

މި ބިން ހިއްކުމަށް ޔޫރަޕްގެ ބޭންކުތަކުން ސަރުކާރުން ވަނީ 1.6 ބިލިއަން ރުފިޔާގެ ލޯނު ނަގާފައެވެ.

ރައީސް އިބްރާހިމް މުހައްމަދު ސޯލިހްގެ ސަރުކާރުން ގުޅީފަޅުގައި މައިގަނޑު ދެ ކަމެއް ކުރަން އޮތީ ނިންމައިފައެވެ.

އެއް ކަމަކީ ގުޅީފަޅުގައި ބައިނަލްއަގުވާމީ ބަނދަރެއް އެޅުމެވެ. މިއީ 319 މިލިއަން ޑޮލަރުގެ މަޝްރޫއެކެވެ. މާލޭގެ ބަނދަރު ގުޅީފަޅަށް ބަދަލު ކުރުމަކީ މި ސަރަހައްދުގައި ހިންގާ އެންމެ ބޮޑު އެއް މަޝްރޫއަށް ވެގެން ދާނެއެވެ. ގުޅީފަޅުގައި ބައިނަލްއަގުވާމީ ބަނދަރެއް ހެދުމުގެ މަޝްރޫއަކީ މާލެ އާއި ވިލިމާލެ އާއި ތިލަފުއްޓާއި ގުޅީފަޅު ގުޅާލުމަށް ހަދާ "ތިލަމާލެ ބްރިޖު" އާ އެކުގައި ފުރިހަމަވާ މަޝްރޫއެކެވެ.

މީގެއިތުރުން ގުޅީފަޅުން މާލޭގެ ރައްޔިތުންނަށް ހާއްސަކޮށްގެން 2،000 ގޯތި ދިނުމަށް ވެސް ސަރުކާރުން ވަނީ ނިންމައިފައެވެ