މި އަހަރު ރާއްޖެ ޒިޔާރަތްކުރި ފަތުރުވެރިންގެ އަދަދު 751،101 ކަށް އަރައިފިކަމަށް މިނިސްޓްރީ އޮފް ޓޫރިޒަމްގެ ތަފާސް ހިސާބުތަކުން ދައްކައިފިއެވެ.
އެގޮތުން މި މެއި މަހުގެ 16 ވަނަ ދުވަހާއި ހަމައަށް 751,101 ފަތުރުވެރިން ރާއްޖެއަށް ޒިޔާރަތް ކޮށްފައިވާކަމަށާއި އޭގެ ތެރެއިން އެންމެ ގިނައިން ފަތުރުވެރިން ޒިޔާރަތް ކޮށްފައިވަނީ މިމެއިމަހުގެ 1 ވަނަ ދުވަހުއެވެ. އެދުވަހު އެކަނި ޒިޔާރާތްކުރި ފަތުރުވެރިންގެ އަދަދަކީ 5،592 ކެވެ.
ރާއްޖެއަށް އެންމެ ގިނަ ފަތުރުވެރިން އައިސްފައިވާ ގައުމަށް ބަލާއިރު، މިއަހަރުގެ މިހާތަނަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. އެގޮތުން އެގައުމުން ވަނީ 88,841 ފަތުރުވެރިން ރާއްޖެއަށް ޒިޔާރާތްކޮށްފައިވެއެވެ. އަދި ދެވަނަ އަށް އެންމެ ގިނަ ފަތުރުވެރިން ޒިޔާރާތްކޮށްފައިވަނީ އަވަށްޓެރި އިންޑިއާއިންނެވެ. އެގައުމުން 83,729 ފަތުރުވެރިން އައިސްފައިވާއިރު، 3 ވަނަ އަށް އެންމެ ގިނަ ފަތުރުވެރިން އައިސްފައިވަނީ އިނގެރޭސި ވިލާތުންކަން ފާހަގަކޮށްލެވެއެވެ.
ޓުއަރިޒަމް މިނިސްޓްރީން ހާމަކޮށްފައިވާ ގޮތުގައި، މިހާރު ރާއްޖޭގެ 170 ރިސޯޓެއްގައި ހިދުމަތް ދެމުންދާއިރު، 20 އަތޮޅެއްގެ 117 ރަށެއްގައި ގެސްޓް ހައުސްގެ ވިޔަފާރި ކުރިއަށް ގެންދެއެވެ. އަދި 13 ހޮޓަލަކާއި 152 ސަފާރީއެއްގައި ފަތުރުވެރިކަން ކުރަމުންގެންދެއެވެ.
ސަރުކާރުގެ އަމާޒަކީ މިއަހަރު 1.8 މިލިއަން ފަތުރުވެރިން ރާއްޖެ ގެނައުމެވެ. އަހަރުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންނަށް ބަލާއިރު، މި އަހަރު ނިމޭއިރު އެ އަދަދު 2 މިލިއަން އަށް ވުރެ މައްޗަށް ދާނެކަމަށް ބެލެވެއެވެ. މިދިޔަ އަހަރު ރާއްޖެ ޒިޔާރާތް ކުރި ފަތުރުވެރިންގެ އަދަދަކީ 1.6 މިލިއަންއެވެ.
