މާދަމާ އޮންނަ ސިފައިންގެ އަހަރީ ދުވަހުގެ ހިނގާލުން ޝަރަފުވެރިކޮށްދެއްވާނީ ރައީސް

ސިފައިންގެ އަހަރީ ދުވަހުގެ މަގުމަތީ ހިނގާލުން މާދަމާ މާލޭގައި ބާއްވާ ގޮތަށް ހަމަޖައްސައިފިއެވެ.

އެމްއެންޑީއެފުން ބުނީ ސިފައިންގެ 133 ވަނަ އަހަރީ ދުވަސް ފާހަގަ ކުރުމަށް ބާއްވާ މަގުމަތީ ހިނގާލުން 16:15 ހާއިރު ބަންޑާރަކޮށިން ފެށިގެންދާނެ ކަމަށެވެ.

އެގޮތުން މި ހިނގާލުމުގައި ލަޝްކަރު، ރައީސް އޮފީސް ކަރިއަށް މަޑުކުރުމުން، އެ ހިނގާލުން ޝަރަފުވެރިކޮށްދެއްވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކަަމަށެވެ.

މާލޭގެ ކަނޑައެޅިފައިވާ މަގުތަކުން މި ހިނގާލުން ކުރިއަށްގެންދަން ހަމަޖެހިފައިވާ އިރު. ފަސް ސަރަހައްދެއްގައި ލަޝްކަރުން މަޑުކުރާނެ ކަމަށް އެމްއެންޑީއެފް އިން ވަނީ ބުނެފައެވެ. އަދި، ލަޝްކަރުގެ ކޮންމެ ހުއްޓުމެއްގައި ވެސް އަސްކަރީ ބޭންޑުގެ ރީތި ރާގުތައް ޕާފޯމް ކުރާގޮތަށް ވެސް ވަނީ ހަމަޖެހިފައި ކަމަށެވެ.

އެގޮތުން މި ހިނގާލުމުގައި ލަޝްކަރު ހުއްޓޭނެ ސަރަހައްދުތަކަކީ، އަމީރުއަޙްމަދުމަގު، ރައީސް އޮފީސް ކުރިމަތި، ސޯސަންމަގު ދިވެހިބަހުގެ އެކެޑަމީ ކުރިމަތި، މަޖީދީމަގާއި ޗާންދަނީމަގު ހަތަރު އަނގޮޅި، މަޖީދީމަގު މިލިއަން ބުކްޝޮޕް ކުރިމަތި އަދި ބޮޑުތަކުރުފާނުމަގު ކަޅުތުއްކަލާކޮށި ހުޅަނގު އުތުރު ކަންމައްޗަށެވެ.

އަދި މަގުމަތީ ހިނގާލުން ނިންމާލުމަށް ހަމަޖެހިފައިވަނީ ކަޅުތުއްކަލާކޮށްޓަށެވެ. މިހިނގާލުމުގައި ދިވެހި ސިފައިންގެ ލަޝްކަރުގެ އެކިއެކި ދާއިރާތަކާއި ޚިދުމަތްތައް ދައްކުވައިދޭނެކަމަށް އެމްއެންޑީއެފް އިން ބުނެއެވެ.