ހިޔާ ފްލެޓްގެ ގަވާއިދުތަކާއި ހިލާފުވާ ފަރާތްތަކަށް ފިޔަވަޅު އަޅަނީ

ހުޅުމާލެ ފޭސް 2ގައި ހަދާފައިވާ ސޯޝަލް ހައުސިން ޔުނިޓް، ހިޔާ ފްލެޓްތަކުގެ އެޕާޓްމަންޓް ޔުނިޓުތަކުގައި ހެދިފައިވާ ގަވައިދުތަކާއި އުސޫލުތަކާ ހިލާފަށް އަމަލުކުރާ ޔުނިޓުތައް ހޯދައި ފިޔަވަޅު އަޅަން ހާއްސަ އިންސްޕެކްޝަނެއް ކުރިއަށް ގެންދަން އެޗްޑީސީން ނިންމައިފިއެވެ.

މިކަން ހާމަކޮށް އެޗްޑީސީން ނެރުނު ބަޔާނެއްގައި ބުނެފައިވަނީ، ހުޅުމާލެ ދެވަނަ ފިޔަވަހީގެ ހިޔާ ފުލެޓްތަކަކީ ބޮޑު އަބާދީއެއް ދިރިއުޅެމުން އަންނަ ސަރަހައްދެއް ކަމަށްވާތީ އެ ފުލެޓްތަކުގައި ދިރިއުޅޭ މީހުންގެ ރައްކާތެރިކަމަށާއި ފަސޭހައަށް ގިނަ އުސޫލުތަކަކާއި ގަވާއިދުތަކެއް އެ ކޯޕަރޭޝަނުން ކަނޑައަޅާފައިވާ ކަމަށެވެ.

އެގޮތުން ފްލެޓްގެ އެޕަރޓްމަންޓްތަކުގެ ފިނިޝިންގެ މަސައްކަތްތައް ކުރުމުގައި އުސޫލުތަކެއް ކަނޑައަޅައި، އިމާރާތުގެ ސްޓަރަކްޗާއަށް ގެއްލުން ވާ ފަދަ އާލާތްތައްނުވަތަ އެކަހަލަ މަސައްކަތް ކުރުން މަނާ ކުރެވިފައިވާއިރު، އިމާރާތް ބޭނުން ކުރުމުގައިވެސް އެހެން މީހުންނަށް އުނދަގޫ ނުވާނޭ ގޮތަށް އިމާރާތް ބޭނުން ކުރުމަށް އުސޫލުތަކެއް ހެދިފައިވާ ކަމަށް އެ ބަޔަނުގައި ވެއެވެ.

އެޗްޑީސީން ބުނީ، އުސޫލުތަކެއް ހެދިފައިވީ ނަމަވެސް އެކި ފަހަރު މަތިން ހިންގާފައިވާ އިންސްޕެކްޝަންތަކުގައި އުސޫލުތަކާއި ގަވައިދުތަކާ ހިލާފު ގިނަ ކަންތައްތަކެއް ފާހަގަވަމުން އަންނަ ކަމަށެވެ.

"ވިޔަފާރި ކުރުމަށް ކޮމާޝަލް އޭރިއާއެއްގެ ގޮތުގައި ކޮންމެ ޓަވަރެއްގެވެސް ގްރައުންޑް ފްލޯ ވަނީ ކަނޑައެޅިފައި. ނަމަވެސް، އެކި ފަހަރު މަތިން މި ކޯޕަރޭޝަންގެ ފަރާތުން ހިންގާފައިވާ އިންސްޕެކްޝަންތަކުގައި މި އުސޫލުތަކާއި ގަވައިދުތަކާއި ހިލާފު ގިނަ ކަންތައްތަކެއް ދަނީ ފާހަގަކުރެވެމުން." އެޗްޑީސީއިން ބުނެފައިވެއެވެ.

އެޗްޑީސީން ބުނީ، މިގޮތަށް ފާހަގަކުރެވިފައިވާ އެޕާޓްމަންޓް ޔުނިޓްތައް ޖޫރިމަނާކޮށް، ފިޔަވަޅު އަޅާފައިވާނެ ކަމާއި މިހާރުވެސް އެކަމަށް ހާއްސަ އިންސްޕެކްޝަނެއް ހިޔާ ފުލެޓްތަކުގައި ކުރިއަށް ގެންދިއުމަށް ނިންމައި، އެ އިންސްޕެކްޝަނުން ފާހަގަވާ ކަންކަމަށް ބަލާ އެކަށީގެންވާ ފިޔަވަޅުތައް ގަވައިދާއި އުސޫލުތަކުގެ ތެރެއިން އަޅަމުން ގެންދާނެކަމުގައެވެ.