އުކުޅަހު އައުޓްޑޯ ވޮލީ ކޯޓު ހުޅުވައިފި

އއ. އުކުޅަހުގައި މި ސަރުކާރުން ތަރައްގީ ކުރި އައުޓްޑޯ ވޮލީކޯޓުގެ މަސައްކަތްތައް ނިންމައި، އެ ކޯޓު ރަސްމީކޮށް ހުޅުވައިފިއެވެ.

މި ކޯޓު ހުޅުއްވައިދެއްވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އއ. އުކުޅަހަށް ކުރެއްވި ރަސްމީ ދަތުރުފުޅުގެ ތެރެއިން އެ ރަށުގައި ބޭއްވި ހާއްސަ ރަސްމިއްޔާތެއްގައެވެ.

އުކުޅަހުގެ އައުޓްޑޯ ވޮލީކޯޓް ހުޅުވައިދެއްވީ ރައީސުލްޖުމްހޫރިއްޔާއެވެ.

މިދިޔަ ޖުލައި މަހުގެ 16 ވަނަ ދުވަހު ޢަމަލީ މަސައްކަތް ފެށި މި މަޝްރޫޢަކީ ޒުވާނުން ބާރުވެރިކުރުވުމާއި، ކުޅިވަރާ ބެހޭ ވުޒާރާއިން ޕްރޮކްސީ ގްރޫޕް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދިޔަ މަޝްރޫޢެކެވެ.

މި މަޝްރޫއަށް ޖުމްލަ 1,359,163.58 (އެއް މިލިއަން ތިންލައްކަ ފަންސާސް ނުވަހާސް އެއްސަތޭކަ ފަސްދޮޅަސް ތިން ރުފިޔާ ފަންސަވީސް ލާރި) ހަރަދުވެފައިވެއެވެ.

މި ވޮލީކޯޓަކީ ޒަމާނީ ވަސީލަތްތަކާއެކު، ރޭގަނޑުވެސް ކުޅިވަރު ކުޅެވޭނެހެން ފުރިހަމަ ލައިޓިންގ ސިސްޓަމަކާއެކު ފެންވަރު ރަނގަޅުކޮށް ތަރައްގީކޮށްފައިވާ ކޯޓެކެވެ.

ކޯޓު ހުޅުވުމުގެ ރަސްމިއްޔާތަށްފަހު، އެ ކޯޓުގައި އެކުވެރިކަމުގެ ވޮލީ މެޗެއްވެސް ވަނީ ކުރިއަށް ގެންގޮސްފައެވެ.