ގޭސް ލީކުވި ހާދިސާ: ހޮސްޕިޓަލުގައި ފަރުވާދެމުންދިޔަ މީހާގެ ހާލު މިހާރު ސްޓޭބަލް

މާލޭގެ ގެއެއްގައި ގޭސް ލީކުވެގެން ހިނގި ހިތާމަވެރި ހާދިސާގައި ހާލު ދެރަވެގެން ހޮސްޕިޓަލަށް ގެންދިޔަ މީހާގެ ހާލު މިހާރު ރަނގަޅުވަމުން އަންނަ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން މައުލޫމާތު ދިން ގޮތުގައި މި ހާދިސާ ހިނގާފައިވަނީ އިއްޔެ ހެނދުނު 10:34 އެހާކަންހާއިރު، މާފަންނު ދިލްކަޝާ ގޯޅީގައި ހުންނަ ގެއެއްގައެވެ. މި ހާދިސާ ފުލުހުންނަށް ރިޕޯޓްކޮށްފައިވަނީ އެ ގޭ ތެރޭގައި ދެ މީހެއްގެ ހާލު ދެރަވެފައި ތިބި ކަމަށް ބުނެއެވެ.

މި ހާދިސާއާ ގުޅިގެން ދަފްތަރު ނަންބަރު ރސ:6210، ޒާހިދާ ތައުފީގު ވަނީ ނިޔާވެފައެވެ. ފުލުހުން ވިދާޅުވީ، ޒާހިދާ އައިޖީއެމް ހޮސްޕިޓަލަށް ގެންދެވުނު އިރުވެސް ނިޔާވެފައިވާ ކަމަށް އެ ހޮސްޕިޓަލުން މައުލޫމާތު ދީފައިވާ ކަމަށެވެ.

މީގެ އިތުރުން، މި ހާދިސާގައި ހާލު ދެރަވެގެން ހޮސްޕިޓަލަށް ގެންދެވުނު 19 އަހަރުގެ އަންހެން މީހާއަށް އައިޖީއެމް ހޮސްޕިޓަލުގައި ފަރުވާދެމުން އަންނަ ކަމަށާއި، އޭނާގެ ހާލު މިހާރު ރަނގަޅުވަމުން އަންނަ ކަމަށް ހޮސްޕިޓަލާ ހަވާލާދީ ފުލުހުން ވަނީ ބުނެފައެވެ.

ފުލުހުން އިތުރަށް ބުނީ، ގޭސް ލީކުވާން މެދުވެރިވި ސަބަބު ދެނެގަތުމަށާއި މި ހާދިސާއާ ގުޅިގެން ބަލަންޖެހޭ ކަންކަން ބެލުމަށްޓަކައި މި މައްސަލަ މިހާރު ތަހުގީގު ކުރަމުން އަންނަ ކަމަށެވެ.