އެމްޑީޕީ ޗެއާޕާސަން ކަމުގެ މަގާމަށް މީކާއިލް ވާދަކުރައްވަނީ

އެމްޑީޕީގެ ހުސްވެފައިވާ ޗެއާޕާސަންގެ މަގާމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް، ވާދަކުރައްވަން ނިންމަވައިފިއެވެ.

އެމްޑީޕީގެ ޗެއާޕާސަންގެ މަގާމު ހުސްވީ އެ މަގާމުގައި ހުންނެވި ފައްޔާޒް އިސްމާއިލް ކުއްލި ގޮތަކަށް އިސްތިއުފާ ދެއްވުމުންނެވެ.

'އެކްސް' ގައި ކުރެއްވި ޕޯސްޓެއްގައި މީކާއީލް ވިދާޅުވީ ކުރިއަށް އޮތް އެމްޑީޕީގެ ޗެއާޕާސަންގެ އިންތިޚާބުގައި ވާދަކުރުމަށް ނިންމަވާފައިވާކަމަށެވެ. އަދި މީކާއީލް ވަނީ އެމްޑީޕީގެ އާންމު މެންބަރުންގެ އެއްބާރުލުމާއި ތާއީދަށް އެދިވަޑައިގެންފައެވެ.

މީކާއީލް ވަނީ 19 ވަނަ ރައްޔިތުންގެ މަޖިލީހުގެ ގަލޮޅު ދެކުނު ދާއިރާ ވެސް ތަމްސީލު ކުރައްވާފައެވެ. އެއަށްފަހު އޭނާ ވަނީ ދެވަނަ ފަހަރަށް ވެސް ގޮނޑި ދިފާއުކުރައްވައި 20 ވަނަ މަޖިލީހުން ވެސް ޖާގަ ހޯއްދަވާފަައެވެ.

ހުކުރު ދުވަހުގެ ރޭ އެމްޑީޕީގެ ގައުމީ މަޖިލީހުގެ ޖަލްސާއެއް ބާއްވައި، ވަގުތީ ޗެއާޕާސަނެއް ހަމަޖެއްސުމަށް އެމްޑީޕީން މަސައްކަތް ކުރިއެވެ. އެނގިފައިވާ ގޮތުގައި އެ މަގާމަށް ދެ ނަމެއް ހުށަހަޅަން މަސައްކަތްކުރިއެވެ. އެއީ މަޖިލީހުގެ ރައީސްކަން ކުރެއްވި، ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު އަސްލަމްގެ ނަމާއި، ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަމެވެ. ނަމަވެސް ހޫނު ބަހުސްތަކެއް ކުރެވި، ވަގުތީ ޗެއާޕާސަނަކަށް ހަމަޖެއްސުމަށް މަސައްކަތް ކުރި އެއްވެސް ބޭފުޅެއްގެ ނަމެއް ފާހެއް ނުވިއެވެ.

މަގާމުން އިސްތިއުފާދެއްވައި، އެމްޑީޕީގެ ގައުމީ މަޖިލީހުގެ މެންބަރުންނަށް އެޑްރެސްކުރައްވައި ފޮނުއްވި ސިޓީއެއްގައި ފައްޔާޒު ވިދާޅުވީ ޕާޓީގެ މަސައްކަތްތައް ކުރިއަށް ގެންދިއުމަށް ބޮޑެތި ގޮންޖެހުންތައް އެބަހުރިކަމަށެވެ. ޚާއްސަކޮށް ޕާޓީގެ އެތެރޭގައި ނުތަނަވަސްކަން އުފެދޭ މަންޒަރު މިހާރު ފެންނަ ކަމަށާއި އެކަމުގެ ސަބަބުން ޕާޓީގެ މަސައްކަތްތަކަށް ހިޔަނި އެޅޭ ކަމަށް ފައްޔާޒު ވިދާޅުވިއެވެ.

ފައްޔާޒް ވަނީ އެމްޑީޕީ މިހާރު ތަހައްމަލުކުރަމުންދާ ދަތި ކަންކަމުގެ އަލީގައި ޕާޓީގައި އެންމެ ލީޑަރެއް ހުންނާނެ ގޮތަށް އަސާސީ ގަވާއިދު ބަދަލުކުރުމަށް ވަނީ އިލްތިމާސްކުރައްވައިފައެވެ. ވިދާޅުވީ "އެއް އުރައެއްގައި ތިން ކަނޑިއަކަށް ނޯވެވޭނެ" ކަމަށެވެ. ފައްޔާޒް ވިދާޅުވީ ސިޔާސީ ލީޑަރުން ވާންޖެހޭނީ ރައްޔިތުންގެ ހައްގުތައް ހޯދާނެ ބަޔަކަށް ކަމަށާއި، އާންމު މެންބަރުންނަށް މަގު ދައްކައިދޭނެ ބަޔަކަށް ކަމަށެވެ.

އެމްޑީޕީ އުފެއްދެވުމުގައި އިސްކޮށް މަސައްކަތް ކުރެއްވި އަދި ޕާޓީގެ ރައީސްކަން ވެސް ކުރެއްވި ނަޝީދު މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މިވަގުތު އެމްޑީޕީ ތަޖުރިބާ ކުރަމުންދަނީ އުނދަގޫ ދުވަސްތަކެއް ނަމަވެސް އެ ހާލަތުން އަރައިގަންނާނެ ކަމާ މެދުގައި ޝައްކު ނުކުރައްވާ ކަމަށެވެ. ނަޝީދު ވިދާޅުވީ މިހާރު އެމްޑީޕީގެ ވަރަށް ގިނަ މެންބަރުން އެ ބުނަމުންދަނީ މުހިންމީ ޕާޓީގެ ޔުނިޓީ ނުވަތަ އެއްބައިވަންތަކަންކަމަށެވެ. ނަމަވެސް، އެއްބައިވަންތަކަމަށް ގޮވާލާ ފަރާތްތަކުގެ ނިޔަތާމެދު ނަޝީދު ވަނީ ސުވާލު އުފައްދަވާފައެވެ.