ގައިން ގަޔަށް އަރާ ނުރައްކާތެރި ބައްޔެއް ކަމަށްވާ މެނިންޖައިޓިސް ބަލީގެ އިތުރު ކޭސްއެއް ކޮންޓްރެކްޓް ޓްރޭސިންގެ މަސައްކަތް ނިމުނުއިރު ފާހަގަކުރެވިފައި ނެތްކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ މެނިންޖައިޓިސް ބަލި ރާއްޖެއިން ފެނުމުން ހެދި ކޮންޓްރެކްޓް ޓްރޭސިންގެ މަސައްކަތް ނިންމާލާފައިވާކަމަށާއި ބަލީގެ ކްލޯޒް ކޮންޓެކްޓުންނަށް ބޭސް ދެވިފައިވާކަމަށެވެ.
ބަލީގެ ކްލޯޒް ކޮންޓެކްޓްއެއްގެ ގޮތުގައި ބެލެވޭނީ ބަލިމީހުންނާ އެއް ގެއެއްގައި ދިރިއުޅޭ މީހުން، ބަލިމީހާއާއެކު މަތިންދާ ބޯޓުން ނުވަތަ ބަހުން ވަރަށް ގިނައިރުވަންދެން ދަތުރުކޮށްފައިވާ މީހުން އަދި ބަލި މީހާގެ ކުޅު ފަދަ ނޭވާލާ ނިޒާމުން އުފެދޭ ދިޔައަކަށް ހުށަހެޅިފައިވާ މީހުންކަމަށް އެޗްޕީއޭއިން ބުނެއެވެ.
މެނިންގޮކޯކޮލްއަކީ ނުރައްކާތެރި ބެކްޓީރިއާއެއްކަމަށްވާ މެނިންގޮކޯކަސްގެ ސަބަބުން ޖެހޭ ބައްޔެކެވެ. އެ ބެކްޓީރިއާގެ ސަބަބުން އެންމެ އާންމުކޮށްޖެހެނީ ދެ ބައްޔެކެވެ. އެއީ ސިކުނޑިއާއި މައިބަދައާ ގުޅުވައިލާ ސަރަހައްދަށް އިންފެކްޓުވާ މެނިންގޮކޯކަލް މެނިންގިޓިސްއާއި، ލެޔަށް ޖެހޭ އިންފެކްޝަނެއްކަމަށްވާ މެނިންގޮކޯކަލް ސެޕްޓިސެމިއާއެވެ. މެނިންގޯކޮކަލް ބަލި ފެތުރެނީ ނޭވާލާ ނިޒާމުގެ ޒަރީއާއިން. ބަލި ޖެހިފައިވާ މީހާއާ އެކު އެންމެ ގާތްކޮށް އުޅޭ ފަރާތްތަކަށް ބަލި ޖެހުމުގެ ފުރުސަތު ބޮޑެވެ. މި ބަލީގެ އަލާމާތްތައް ފެންނާނީ ބަލިޖެހޭތާ 1 ދުވަހާއި 10 ދުވަހާ ދެމެދުގައެވެ.
މި ބަލީގައި ރާއްޖެއިންވަނީ އެކަކު ނިޔާވެފައެވެ.
