ވައިރަހަކުން ނޭވާލާ ނިޒާމަށް ޖެހޭ އިންފެކްޝަނެއް ކަމަށްވާ 'ރެސްޕިރޭޓަރީ ސިންޝިއަލް ވައިރަސް' (އާރުއެސްވީ) ގޭ ކޭސްތައް އިތުރުވަމުންދާތީ ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުންނަށް އިލްތިމާސްކޮށްފި އެވެ.
އެ އޭޖެންސީން މިއަދު ބުނީ، ކުޑަކުދިންނަށް އާރުއެސްވީ ޖެހިގެން ރިޕޯޓު ކުރި ކޭސްތައް މިފަހުން އިތުރުވެފައިވާ ކަމަށެވެ. އަދި މިހާރު ހާލަތު މޮނީޓަރ ކުރަމުންދާ ކަމަށް ވެސް ބުނެފައިވެއެވެ.
އެކަން ފާހަގަކޮށް އެޗްޕީއޭ އިން ވަނީ، ރައްކާތެރިކަމުގެ ފިޔަވަޅުތައް އަޅަން އިލްތިމާސްކޮށްފަ އެވެ. އެގޮތުން އަތް ދޮވުމާއި ގިނަ މީހުން ޖަމާވާ ތަންތަނަށް ނުދިއުމަށް އެ އޭޖެންސީން ވަނީ އެދިފަ އެވެ.
އެޗްޕީއޭ އިން ވަނީ ހުން އައުމާއި، ކެއްސުމާއި ނޭވާ ލާން އުނދަގޫވުން ފަދަ އަލާމާތްތައް ފެންނަ ނަމަ ވީހާވެސް އަވަހަކަށް ޑޮކްޓަރަކަށް ދިއުމަށް އިލްތިމާސްކޮށްފަ އެވެ.
އާރުއެސްވީ ފެތުރެނީ ބަލި ޖެހިފައިވާ މީހުން ކެއްސާ ކިނބިހި އަޅާއިރު ނޭފަތާއި ކަރުން ބޭރުވާ ޑްރޮޕްލެޓްތައް މެދުވެރިކޮށް ފެތުރޭ ބައްޔެކެވެ. ބަލީގެ އަސަރު ބޮޑަށް ކުރަނީ އުމުރުން ހަގު ކުދިންނަށެވެ. އެ ބަލި ޖެހޭ ކުދިންނަށް ހަފްތާއެއް ނުވަތަ އެއަށް ވުރެ ގިނަ ދުވަހަށް ވެސް ފަރުވާ ދޭން ޖެހެ އެވެ. ..
