ކުޑަކުދިންގެ ކެންސަރު ބަލީގެ ފަރުވާއަށްފަހު ދިމާވާ ގޮންޖެހުންތަކަށް ހޭލުންތެރިކަން އިތުރުކުރުމަށް ކެންސަރ ސޮސައިޓީ އޮފް މޯލްޑިވްސް، ދިރާގު، ޔުނިސެފް އަދި މިނިސްޓްރީ އޮފް އެޑިއުކޭޝަން ގުޅިގެން ޓީޗަރުންނާ ބެލެނިވެރިން އަދި ކުދިން ބަލަހައްޓާ ފަރާތްތަކަށް އަމާޒުކޮށް އަތްމަތީ ފޮތެއް ތައާރަފު ކޮށްފިއެވެ.
ސެޕްޓެމްބަރު މަހަކީ ކުޑަކުދިންގެ ކެންސަރަށް ހޭލުންތެރިކުރުމުގެ މަހުގެ ގޮތުގައި މުޅި ދުނިޔޭގައި ފާހަގަކުރާ މަސްކަން ފާހަގަކޮށް އެ ސޮސައިޓީން ބުނީ ތަފާތު ވައްތަރުގެކެންސަރުތަކަށް އާންމުން ހޭލުންތެރި ކުރުވުމަށް ކޮންމެ ކެންސަރަކަށް ވަކިކުލައެއްގެ ރިބަނެއް ޚާއްސަ ކުރެވިފައިވާ ކަމަށެވެ. އެގޮތުން ކުޑަކުދިންގެ ކެންސަރަށް ޚާއްސަ ކޮށްފައިވަނީ ރަންކުލައިގެ ރިބަނެއް ކަމަށް ކެންސަރ ސޮސައިޓީން ފާހަގަކުރެއެވެ.
ހޭލުންތެރިކަން އިތުރުކުުމުގެ އަތްމަތީ ފޮތް ތައާރަފް ކުރުމާ ގުޅިގެން ކެންސަރ ސޮސައިޓީން ނެރުނު ބަޔާނުގައި ބުނެފައިވަނީ، އެ ސޮސައިޓީއާއި، ދިރާގާއި، ޔުނިސެފްގެ އިތުރުން މިނިސްޓްރީ އޮފް އެޑިއުކޭޝަނާ ގުޅިގެން އިފްތިތާހު ކުރެވުނު ފޮތަކީ ސްކޫލުތަކުގެ ޓީޗަރުންނާއި ބެލެނިވެރިން އަދި ކުދިން ބަލަހައްޓާ ފަރާތްތަކަށް ޚާއްސަކޮށްގެން ނެރުނު ފޮތެއް ކަމަށެވެ. މި އަތްމަތީ ފޮތުގެ ސަބަބުން ބަލި ތަހައްމަލު ކުރަމުންދާ ކުދިންނަށް ހިތްހަމަޖެހުމާއި އުފާވެރިކަން ގެނަސްދޭނެ ކަމަށްވެސް ބުނެފައި ވެއެވެ.
ބަޔާނުގައި ބުނީ، މި ފޮތަށް ޓީޗަރުންނާއި ބެލެނިވެރިން ހޭލުންތެރިކުރުވައި، އަހުލުވެރިކުރުމުގެ ގޮތުން އެކަމުގެ މައުލޫމާތު ރާއްޖޭގެ ސްކޫލުތަކަށާއި ބެލެނިވެރިން އަދި ކުދިން ބަލަހައްޓާ ފަރާތްތަކާ ހިއްސާ ކުރެވޭނެ ކަމަށެވެ.
ކުޑަކުދިންނަށް ޖެހޭ ކެންސަރުގެ އަލާމާތްތަކާއި ނިޝާންތަކަކީ ކުޑަކުދިންނަށް ޖެހޭ އެހެން ބައެއް ބަލިތަކުގައިވެސް ފެންނަ އަލާމާތްތައްކަން ކެންސަރ ސޮސައިޓީން ފާހަގަކުރެއެވެ. އެހެން ކަމުން ގިނަ ފަހަރަށް އެންމެ ކުރިން ފަރުވާ ދެވެނީ އެހެން ބަލިތަކަށް ކަމަށް ބުނެފައިވެއެވެ.
ވުމާއެކު ރާއްޖޭގައި ކުޑަކުދިންގެ ކެންސަރު އަވަހަށް ދެނެގަތުމުގެ ގޮތުން ކުޑަކުދިންނަށް ޖެހޭ ކެންސަރުގެ އަލާމާތްތަކާއި ނިޝާންތަކާ ބެހޭގޮތުން ހޭލުންތެރިކަން އިތުރުކޮށް ދުޅަހެޔޮ، ހަރަކާތްތެރި މާހައުލެއްް ސްކޫލުތަކުގައި އުފެއްދުމަށް ހިތްވަރުދީ ދުޅަހެޔޮ މުޖުތަމައެއް ބިނާކުރުމަށް ބާރުއެޅުމަށް ދިރާގާއި ގުޅިގެން ކެންސަރ ސޮސައިޓީން މަސައްކަތްތަކެއް ކޮށްފައިވާނެ ކަމަށްވެސް ބަޔާނުގައި ފާހަގަ ކޮށްފައިވެއެވެ.
ކެންސަރ ސޮސައިޓީ އޮފް މޯލްޑިވްސް އަކީ ރާއްޖޭގައި ކެންސަރުޖެހުމަށް މެދުވެރިވާ ސަބަބުތަކާއި، މިބަލިން ރައްކާތެރިވުމަށް ބޭނުންވާނެ މައުލޫމާތު އާންމުންނަށް ދީ، ހޭލުންތެރިކުރުވައި، ކެންސަރު ބަލީގެ މީހުންނަށް އެހީތެރިކަން ފޯރުކޮށްދިނުމާއި، ކެންސަރާ ބެހޭގޮތުން ދިރާސާތައް ކުރުމާއި ތަފާސްހިސާބު އެއްކުރުމުގެ މަގުސަދުގައި 2012 ވަނަ އަހަރުގެ އޮކްޓޫބަރު މަހު އުފައްދާފައިވާ ހިލޭ ސަބާހަށް މަސައްކަތްކުރާ ޖަމުއިއްޔާއެކެވެ.
