މާލޭ ރައްޔިތުންނަށް ބޯހިޔާވަހިކަން ފޯރުކޮށްދޭން ގޮވާލާ ޤަރާރެއް!

މާލޭ ރައްޔިތުންނަށް ބޯހިޔާވަހިކަން ފޯރުކޮށްދޭން ގޮވާލާ ޤަރާރެއް ރައްޔިތުންގެ މަޖިލީހަށް ހުށަހަޅައިފިއެވެ.

މި ޤަރާރު މަޖިލީހަށް ހުށަހަޅާފައިވަނީ މެދު ހެންވޭރު ދާއިރާގެ މެންބަރު އަލީ އާޒިމެވެ.

މި ގަރާރުގައި ބުނެފައި ވަނީ ރިޔާސީ ކެނޑިޑޭޓްގެ ހައިސިއްޔަތުން 2018ވަނަ އަހަރު އެކިފަހަރު މަތިން އެކި ހަފްލާތަކުގައި ބޯހިޔާވަހިކަން ހައްގުވާ ކޮންމެ މީހަކަށް ދައުރު ނިމުމުގެ ކުރިން ބޯހިޔާވަހިކަން ފޯރުކޮށްދޭނެ ކަމަށް ރައީސް އިބްރާހީމް މުހައްމަދު ޞާލިހު ވިދާޅުވެފައިވާ ކަމަށެވެ. އެހެން ނަމަވެސް، ދައުރު ހަމަވާން ގާތްވެފައިވާއިރު މާލޭގެ އެއްވެސް ރައްޔިތަކަށް ގޯއްޗެއް ވެސް އަދި ފްލެޓެއް ވެސް ދީފައި ނުވާކަން އެ ގަރާރުގައި ވަނީ ފާހަގަކޮށްފައެވެ.

ނިމިގެން ދިޔަ އެމްޑީޕީގެ ރިޔާސީ ޕްރައިމަރީގެ ކެމްޕޭންގެ ތެރޭގައި ރައީސް އިބްރާހިމް މުހައްމަދު ސޯލިހު ވިދާޅުވީ މި އަހަރުގެ މެދު ތެރޭގައި 5000 ގޯތި މާލޭގެ ރައްޔިތުންނާ ހަވާލުކުރައްވާނެ ކަމަށެވެ.

މާލޭގެ ރައްޔިތުންނަށް ގޯތި ދޭން ނިންމާފައި ވަނީ ހުޅުމާލެއިން 1000 ގޯތި، ގުޅިފަޅުން 2000 ގޯތި އަދި ގިރާވަރުފަޅުން 2000 ގޯއްޗެވެ

ވަކި ބަޔަކަށް މާލެ ސަރަހައްދުން ގޯތި ދޭން ލިސްޓެއް ހަދާފައި ނޯންނާނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވަނީ ވިދާޅުވެފައެވެ.

އަސްލަމް އެގޮތަށް ވިދާޅުވީ ރައްޔިތުންގެ މަޖިލީހުގެ ޖަލްސާއެއްގައި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ކުރެއްވި ސުވާލަކަށް ޖަވާބު ދެއްވަމުންނެވެ.

އިމްތިޔާޒް ވިދާޅުވީ މާލޭ ސަރަހައްދުން ގޯތި ދޫކުރަން ނިންމާފައި ވަނީ ވަޒީރުން ގެންގުޅުއްވާ ލިސްޓަކަށް ބަލައިގެން ކަމަށް އެ ބޭފުޅުން މާލެ ތެރޭގައި ވާހަކަ ދައްކަވަމުންދާ އެނގިފައިވާ ކަމަށާއި އެހެންވެ އެކަން ސާފުކޮށްދިނުމަށް އެދިވަޑައިގެންނެވިއެވެ.

އެ ސުވާލަށް ޖަވާބު ދެއްވައި އަސްލަމް ވިދާޅުވީ ވަކި ބޭފުޅުން ބޭނުންވާ ލިސްޓެއް ނޯންނާނެ ކަމަށާއި އަދި އެގޮތަށް އެކަން ކުރަން ވާޒީރުން ވާހަކަ ދައްކަމުންދާކަން ވެސް އެނގިވަޑައިގެންފައި ނުވާ ކަމަށެވެ.

އަސްލަމް ވިދާޅުވީ ވަޒީރުން އެފަދަ ވާހަކަތަކެއް ދެއްކެވި ނަމަވެސް އެއީ ހަގީގަތެއް އޮތް ވާހަކައެއް ނޫން ކަމަށެވެ.

ބޯހިޔާވެހިކަން ފޯރު ކޮށްދިނުމަށް މިހާތަނަށް ސަރުކާރުން އެކަށީގެންވާ މަސައްކަތެއް ނުކުރާ ކަމަށާއި އިތުރަށް އެ މަސައްކަތް ދިގުދަންމައި ނުލައި ބޯހިޔާވެހިކަން ފޯރުކޮށްދިނުމަށް އެ ގަރާރުގައި ވަނީ ގޮވާލައިފައެވެ.