ރިސޯޓް ކުއްޔާއި ޖޫރިމަނާ ނުދައްކާ ފަރާތްތަކާއި މެދު ފިޔަވަޅު އަޅަނީ

ދިވެހިރާއްޖޭގައި ފަތުރުވެރިކަމުގެ ބޭނުމަށް ދޫކޮށްފައިވާ ތަންތަނުގެ ތެރެއިން، ދައުލަތަށް ދައްކަންޖެހޭ ކުއްޔާއި ޖޫރިމަނާ ފައިސާ ނުދައްކާ ހުރި ފަރާތްތަކާމެދު ގާނޫނީ ފިޔަވަޅު އެޅުމަށް ސަރުކާރުން ނިންމައިފިއެވެ.

މިނިސްޓްރީ އޮފް ޓޫރިޒަމުން ނެރުއްވި އިޢުލާނެއްގައި ބަޔާންކުރައްވާފައިވާ ގޮތުގައި، މި ފިޔަވަޅުތައް އެޅުމަށް ހަމަޖެހިފައިވަނީ ފަތުރުވެރިކަމަށް ދޫކޮށްފައިވާ ތަންތަނުގެ ތެރެއިން މިހާރު ހިދުމަތް ދެމުންދާ ތަންތަނާއި، އަދި އެ މިނިސްޓްރީގެ ހުއްދައަކާ ނުލައި ޚިދުމަތް މެދުކަނޑާލާފައިވާ ތަންތަނުގެ ތެރެއިން ދައުލަތަށް އަދާކުރަންޖެހޭ ފައިސާ ދައްކާފައި ނުވާ ފަރާތްތަކަށެވެ.

ސަރުކާރާއެކު ވެފައިވާ އެއްބަސްވުމާ އެއްގޮތްވާ ގޮތުގެ މަތިން، ދައްކަންޖެހޭ އެންމެހައި ފައިސާ ކަނޑައެޅިފައިވާ މުއްދަތުގެ ތެރޭގައި ދައްކައި ހަލާސްކުރަން މިނިސްޓްރީން ވަނީ އެފަރާތްތަކަށް އަންގަވާފައެވެ.

މި މައްސަލައިގައި އަޅާނެ ހާއްސަ ފިޔަވަޅުތަކުގެ ތަފްސީލު އެ އިއުލާނުގައި ހިމަނާފައި ނުވިނަމަވެސް، ރާއްޖޭގެ ފަތުރުވެރިކަމާބެހޭ ޤާނޫނާއި ގަވާއިދުތައް ތަންދޭ ގޮތުން، ކުލި ނުދައްކާ ފަރާތްތައް ޖޫރިމަނާކުރުމުގެ އިތުރުން، އެފަރާތްތަކާއެކު ވެފައިވާ ކުލީގެ އެއްބަސްވުން ބާތިލުކޮށް، އެ ތަންތަން އަނބުރާ ދައުލަތުގެ ބެލުމުގެ ދަށަށް ގެނައުމުގެ ފުރިހަމަ އިހްތިޔާރާއި ބާރު ސަރުކާރަށް ލިބިގެންވެއެވެ.