އީރާނާއެކު އަނެއްކާވެސް މަޝްވަރާ ކުރަމުންދާކަން ޓްރަމްޕް ހާމަކުރައްވައިފި

އީރާނާއެކު މިހާރު ވެސް މަޝްވަރާތައް ކުރިއަށްދާ ކަމަށާއި ނަމަވެސް އެ ޤައުމަށް ނިއުކްލިޔަރ ހަތިޔާރު ހޯދުމުގެ ފުރުޞަތު ނުދެއްވާނެ ކަމުގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ވޮޝިންގޓަނުގައި ބޭއްވި ވައިޓް ހައުސްގެ ނޫސްވެރިންގެ ފަރިއްކޮޅުގައި ވާހަކަފުޅު ދައްކަވަމުން ޓްރަމްޕް ވިދާޅުވީ އީރާނުން އެމެރިކާއާ ވާހަކަދައްކަން ބޭނުންވާ ކަމަށާއި، ނަމަވެސް ތެހްރާނުން އެ ކަމަށް ފުރިހަމައަށް ތައްޔާރަށް އޮތް ކަމަށް ޤަބޫލު ނުކުރައްވާ ކަމުގައެވެ.

އަދި، އެމެރިކާގެ ހަމަލާތަކުގައި އީރާންގެ އަސްކަރިއްޔާ ބަލިކަށިކޮށްލާފައިވާނެ ކަމަށާއި، 250 އަސްކަރީ މަތިންދާބޯޓާއި، 159 މަނަވަރު ނައްތައިލާފައިވާނެ ކަމުގައި ވެސް އޭނާ ވިދާޅުވިއެވެ.

މެދުއިރުމަތީގެ ހަނގުރާމައިގައި އެންމެ ފަހުން ހަމަލާބަދަލުކުރަން ފަށާފައި ވަނީ، ހުރްމުޒް ކަނޑުއޮޅީގެ ކޮންޓުރޯލު ނެގުމަށް ކުރަމުންދާ މަސައްކަތުގެ ދަށުންނެވެ. އެ ކަނޑުއޮޅީގެ ދަތުރުފަތުރަށް ހުރަސްއެޅިފައިވާއިރު، މި ކަމުގެ ސަބަބުން ދުނިޔޭގެ އިޤުތިޞާދަށް ވަނީ ނުރައްކާވެފައެވެ.

ޓްރަމްޕް ވަނީ ރައްދުގައި ގަލްފުގެ ޤައުމުތަކުގައި ހުރި އެމެރިކާގެ އަސްކަރީ އަމާޒުތަކަށް ހަމަލާދެމުންދާ އީރާންގެ އަސްކަރިއްޔާއަށް އަދަބު ދެއްވާނެ ކަމުގައި ވިދާޅުވެ، އިންޒާރު ދެއްވާފައެވެ.

ދެ ފަރާތުން އަމަލުކުރަމުންދިޔަ ޞުލްޙައިގެ އިބުތިދާއީ އެއްބަސްވުން އުވުނު ފަހުން ދެ ހަފުތާ ފާއިތުވެފައިވާއިރު، އެމެރިކާގެ ޢުދުވާނީ ހަމަލާތަކުގެ ރައްދުގައި އީރާނުުގެ ބާރުގަދަ އިސްލާމީ އިންޤިލާބީ ލަޝްކަރުން (އައިއާރްޖީސީ) އަދިވެސް ދަނީ ގަލްފުގެ ޤައުމުތަކުގައި ހުރި އެމެރިކާގެ އަސްކަރީ އަމާޒުތަކަށް ހަމަލާ ދެމުންނެވެ. އެންމެ ފަހުގެ ހަމަލާތައް އަމާޒު ކޮށްފައި ވަނީ ކުވައިތާއި ބަޙްރައިނަށެވެ.