ހުސްވި އަހަރު ސިވިލް ކޯޓަށް 5000 އަށް ވުރެ ގިނަ މައްސަލަ ވަނީ ބަލައިގަނެފައި

ހުސްވި އަހަރު ސިވިލް ކޯޓުން 5000 އަށް ވުރެ ގިނަ މައްސަލަ ބަލައިގަނެފައިވާ ކަމަށް އެކޯޓުގެ ތަފާސް ހިސާބުތަކުން ދައްކައިފިއެވެ.

ސިވިލް ކޯޓުން އާއްމުކޮށްފައިވާ ތަފާސްހިސާބުތަކަށް ބަލާއިރު، 2025 ވަނަ އަހަރު އެ ކޯޓުގައި ޖުމްލަ 5,680 މައްސަލައެއް ރަޖިސްޓްރީކޮށްފައިވެއެވެ.

މިއީ 2024 ވަނަ އަހަރު ރަޖިސްޓްރީކުރި 5,142 މައްސަލައާ އަޅާބަލާއިރު 10.46 އިންސައްތައިގެ އިތުރުވުމެކެވެ.

މައްސަލަ ނިންމި މިންވަރަށް ބަލާއިރު، 2025 ވަނަ އަހަރު ޖުމްލަ 6,718 މައްސަލައެއް ނިންމާފައިވެއެވެ. މިއީ 2024 ވަނަ އަހަރު ނިންމި 5,432 މައްސަލައާ އަޅާބަލާއިރު 23.68 އިންސައްތައިގެ ކުރިއެރުމެކެވެ.

މީގެއިތުރުން، އިޖުރާއީ ނިންމުންތަކާއި އިޚްތިޞާޞާ ގުޅޭގޮތުން ނިންމި ނިންމުންތަކަށް ބަލާއިރު، 2024 ވަނަ އަހަރު 135 ނިންމުމެއް ނިންމާފައިވާއިރު، 2025 ވަނަ އަހަރު ނިންމާފައިވަނީ 126 ނިންމުމެވެ.

ވަގުތީ އަމުރުތަކާއި ކޯޓު އަމުރުތަކާ ގުޅޭގޮތުން ނިންމި ނިންމުންތަކަށް ބަލާއިރު، 2024 ވަނަ އަހަރު 103 މައްސަލައެއް ނިންމާފައިވީ ނަމަވެސް، 2025 ވަނަ އަހަރު މި އަދަދު ވަނީ 166 އަށް އުފުލިފައެވެ.

މިއީ އޭގެ ކުރީ އަހަރާ އަޅާބަލާއިރު 63 މައްސަލައިގެ އިތުރުވުމެކެވެ.