
އެމްޑީޕީ ތަޖުރިބާ ކުރަމުންދަނީ އުނދަގޫ ދުވަސްތަކެއް: ނަޝީދު

އައިޝަތު އިނާޝާ - 29 ނޮވެމްބަރު 2025 - 13:35
އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިވަގުތު ތަޖުރިބާ ކުރަމުންދަނީ އުނދަގޫ ދުވަސްތަކެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހިޔާލުތަފާތުވުންތަކާއެކު ކުރީގެ ރައީސް އިބްރާހިމް މުހައްމަދު ސޯލިހާއި ނަޝީދާ ދެ ބޭފުޅުންގެ ގާތް ގުޅުން ކެނޑި އެމްޑީޕީގެ ރައީސްކަމުގައި ހުންނެވި ނަޝީދު އަމިއްލަފުޅަށް އެ މަގާމުން އިސްތިއުފާދެއްވީ ނޮވެންބަރު 13، 2023 ގައެވެ. އެމްޑީޕީ ދޫކުރައްވައި ނަޝީދު އާ ޕާޓީއެއް އުފެއްދެވި އެވެ. އެކަމަކު ނަޝީދު ވަނީ މި އަހަރުގެ ޖޫން މަހު އަލުން އެ ޕާޓީއާ ގުޅިވަޑައިގެންފައެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ މިވަގުތު އެމްޑީޕީ ތަޖުރިބާ ކުރަމުންދަނީ އުނދަގޫ ދުވަސްތަކެއް ނަމަވެސް އެ ހާލަތުން އަރައިގަންނާނެ ކަމާ މެދުގައި ޝައްކު ނުކުރައްވާ ކަމަށެވެ.
ނަޝީދު ވިދާޅުވީ މިހާރު އެމްޑީޕީގެ ވަރަށް ގިނަ މެންބަރުން އެ ބުނަމުންދަނީ މުހިންމީ ޕާޓީގެ ޔުނިޓީ ނުވަތަ އެއްބައިވަންތަކަންކަމަށެވެ. ނަމަވެސް، އެއްބައިވަންތަކަމަށް ގޮވާލާ ފަރާތްތަކުގެ ނިޔަތާމެދު ނަޝީދު ވަނީ ސުވާލު އުފައްދަވާފައެވެ.
ނަޝީދު ވަނީ 1933 ވަނަ އަހަރު ހިނގި ''މޮޓަރުބޯޓުގެ ގަޑުބަޑު'' އާ ގުޅިގެން، އަމީން ދީދީ ވިދާޅުވި ބަސްފުޅެއް ހަނދާންކޮށްފައެވެ. އެއީ އެންމެ މުހިންމީ ކެބިނެޓުގެ އެއްބައިވަންތަކަން ކަމަށާއި ކެބިނެޓުގެ އެކަކަށް ލިބޭ ގެއްލުމެއް އަނެކަކަށް ވެސް ލިބެން ޖެހޭނެ ކަމަށް އަމީން ދީދީ ވިދާޅުވި ބަސްފުޅެވެ. އޭގެ ފަހުން، ފަރީދު ދީދީ އާއި އަމީން ދީދީ ފިޔަވައި އެންމެންނަށް މޮޓަރުބޯޓުގައި ކޮޅުމަޑުލަށް ދާން ޖެހި، އެތަނުގައި ކެބިނެޓްގެ މެންބަރުން އެއް އަހަރު ދުވަހު ތިބެން ޖެހުނު ކަން ވެސް ނަޝީދު ފާހަގަކުރެއްވިއެވެ. އަދި އެގޮތަށް ތިބި އިރު ދަރަވަންދޫގޭ ޙުސައިން ޞަލާޙުއްދީން ލިޔުއްވި ޅެން ބައިތެއް މިވަގުތަށް މުނާސަބު ކަމަށް އެމަނިކުފާނު ދެކެވަޑައިގަންނަވާ ކަމަށް ވިދާޅުވެ، އެ ޅެންބައިތު ނަޝީދު ހިއްސާ ކުރެއްވިއެވެ.
"އުނިކަން ނުވާ މާތް ދޫފުޅުން
އެ ދުވަހު ވިދާޅުވީ
ޔުނިޓީއަކީ ފަހެ ޙަސަދަޔާ
މަކަރަށް ނުވާނެ ބާ" : ނަޝީދު
މި ޅެންބައިތަކުން ނަޝީދު ވަނީ ޕާޓީގެ އެއްބައިވަންތަކަމުގެ މުހިންމުކަމާއި، އޭގެ ހަގީގަތާ މެދު ވިސްނާލުމަށް ގޮވާލައްވާފައެވެ.
ގުޅުން ހުރި ޙަބަރުތައް

6 ރަށެއްގައި އެއާޕޯޓް ތަރައްގީ ކުރުމަށް ދެ ކުންފުންޏަކާއެކު ފައިނޭސިންގް އެއްބަސްވުމަކަށް
3 އަހަރު ކުރިން

ނައިބު ރައީސް އަންނަ ހަފްތާގައި އައްޑޫއަށް ވަޑައިގަންނަވަނީ
3 އަހަރު ކުރިން

އެއިޑްސް ދުވަހުގެ ހަރަކާތްތައް ގއ.އަތޮޅުގައި ކުރިޔަށްދަނީ
3 އަހަރު ކުރިން

ޓައިމް މެގަޒިންގެ އަހަރުގެ ޝަހުސިއްޔަތަކީ ޒްލެންސްކީ
3 އަހަރު ކުރިން


