ކުނި ނުގެންދާ ނަމަ ވެމްކޯއަށް ގުޅަން އެދިއްޖެ

ގޭބީސީތަކުން ގެންދަންޖެހޭ ކުނި ވޭސްޓް މެނޭޖްމަންޓް ކޯޕަރޭޝަނުން (ވެމްކޯ) ނުގެންގޮސް ހުރިނަމަ އެ ކޯޕަރޭޝަނަށް ގުޅުމަށް އެދިއްޖެ އެވެ.

މާލެއިން ކުނި ނަގައިދިނުމަށް މާލެ ސިޓީ ކައުންސިލުން އެންމެ ފަހުން ވެމްކޯގައި ވަނީ އެދިފައެވެ. ވެމްކޯއިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެ ކުންފުނީގެ މެނޭޖިންގ ޑައިރެކްޓަރ ޔޫސުފް ސިރާޖު ވިދާޅުވީ ހަމަ އެ ދުވަހު މާލެ ސިޓީ ކައުންސިލްގެ ފަރާތުން ވެމްކޯއަށް ސިޓީއެއް ހުށަހަޅާފައިވާ ކަމަށެވެ. އެ ގޮތުން މާލެ ސިޓީ ކައުންސިލްގެ ފަރާތުން ފޮނުވި އެ ސިޓީގައި ފަހާގަ ކޮށްފައި އޮތީމާލެ ތެރެ ހަޑިވެގެންދާ އެންމެބޮޑު ސަބަބަކީ މާލޭގެ މަގުތަކަށް އާންމުން ކުނި އެޅުން ކަމަށް ސިރާޖް ވިދާޅުވިއެވެ. އަދި މާލެއިން ކުނި ނަގައިދިނުމަށް ސިޓީ ކައުންސިލުން ވެމްކޯއަށް އިލްތިމާސްކޮށްފައިވާކަން ވެސް ހާމަ ކުރެއްވިއެވެ.

"ދެން އަޅުގަނޑު ހަމަ ފާހަގަ ކޮށްލަން ބޭނުންވޭ، މި ސިޓީގަ ވެސް ސިޓީ ކައުންސިލްގެ ކަންބޮޑުވުންތައް ފާޅުކޮށްފަ އެބައޮތް. މާލެތެރެ ވަރަށް ބޮޑަށް ހަޑިވެގެންދާ ކަމުގަ. ހަޑިވެގެންދާ އެންމެ ބޮޑު ސަބަބަކީ މާލެ ސިޓީގެ މަގުތަކަށް އާންމު ފަރާތްތަކުން އަޅާ ކުނީގެ މައްސަލަ ގޮތުގަ ސިޓީ ކައުންސިލުން ފާހަގަ ކޮށްފައި އެބަ އޮތް. އަދި އެ ކުނިތައް ނެގުމަށް ނުވަތަ ނަގައިދިނުމަށް ސިޓީ ކައުންސިލުން އަންގާ އިލްތިމާސް ކުރާ ވާހަކަ މީގަ މި އޮތީ" ސިރާޖު ވިދާޅުވިއެވެ.

ވެމްކޯއިން ކުރި ޓްވީޓެއްގައި ބުނެފައި ވަނީ އެ ކޯޕަރޭޝަންގައި ރަޖިސްޓްރީކޮށްފައިވާ ގޭބީސީތަކުގެ ތެރެއިން އެއްވެސް ގެއަކުން ކުނި ނުގެންގޮސް ހުރި ކަމަށް ހޮޓްލައިން ނަންބަރު 1666 އަށް ގުޅުމަށެވެ.

އެ ކޯޕަރޭޝަނަށް ޝަކުވާ ލިބުމުން ވީހާވެސް އަވަހަކަށް ކުނި ނެގުމަށް މުވައްޒަފުން ދާނެ ކަމަށް ވެސް ވެމްކޯއިން ބުނެ އެވެ.