އަންނަ ބުރާސްފަތީގައި ވެކޭޝަންސް އެކްސްޕޯ 2025 ފަށަނީ

މިއަހަރުގެ ވެކޭޝަންސް އެކްސްޕޯ އަންނަ ބުރާސްފަތި ދުވަހު ފަށަން ތައްޔާރުވެއްޖެއެވެ. މިއީ ރާއްޖޭގެ ޓްރެވަލް އިންޑަސްޓްރީގެ އެންމެ މަގުބޫލު އެކްސްޕޯއެވެ.

މި އަހަރުގެ އެކްސްޕޯގައިވެސް ފަތުރުވެރިކަމުގެ ދާއިރާގެ ނަން މަޝްހޫރު ވިޔަފާރިތަކާއި ރާއްޖޭގެ ގިނަ މަގުބޫލް ޓްރެވަލް އެޖެންޓުން ބައިވެރިވާނެ ކަމަށް ހައިރައިޒުން ބުނެއެވެ.

މި އެކްސްޕޯ ކުރިއަށްދާނީ އެޕްރީލް 17 އިން 25 އަށް ހުޅުމާލެ ސެންޓްރަލް ޕާކުގައެވެ.

އެހެން ފަހަރުތަކެކޭވެސް އެއް ގޮތަށް މިފަހަރުގެ އެކްސްޕޯއަށް ޒިޔާރަތްކުރާ ފަރާތްތަކަށް ހާއްސަ ޗުއްޓީ ޕެކޭޖުތައް ލިބުމުގެ އިތުރުން ފަތުރުވެރިކަމުގެ ދާއިރާގެ ފުންނާބު އުސް ޓްރެވަލް އެޖެންޓުންނާއި މާހިރުންގެ ކިބައިން ދަތުރުކުރުމަށް ބޭނުންވާ ގިނަ މައުލޫމާތުތައް ލިބިގެންދާނެއެވެ. އެގޮތުން، މިހާރުގެ ޓްރެވަލް ޓްރެންޑުތަކާއި ޗުއްޓީ ރޭވުމުގައި ބަލަންވީ އެންމެ މުހިންމު ކަންކަމާ ގުޅޭ މައުލޫމާތު އެކި ސްޓޯލްތަކުން ލިބެން ހުންނާނެއެވެ.

މިއަހަރުގެ އެކްސްޕޯގައި ބައިވެރިވާ އެގްޒިބިޓަރުންގެ ސްޓޯލުތަކުން ކޮންމެ ދުވަހަކު ނަސީބުވެރިން ހޮވޭ ލަކީޑްރޯތަކެއް ކުރިއަށް ގެންދިޔުމަށް ވެސް ވަނީ ހަމަޖެހިފައެވެ.

ޖުމްލަ 40 އެގްޒިބިޓަރުންނާއެކު ކުރިއަށްދާ ވެކޭޝަންސް އެކްސްޕޯ 2025 ގައި އެއާލައިންތައް، ރިސޯޓުތައް، ގެސްޓްހައުސްތައް، އަދި ޓްރެވަލް އެޖެންޓުންނާއި މި ދާއިރާގެ ޖަމިއްޔާތަކުން އަދި އެކި ގައުމުތަކުގެ ސަރުކާރުގެ އިދާރާތަކުން ވެސް ބައިވެރިވާނެއެވެ.