މާލޭ ރައްޔިތުންނަށް ބޯހިޔާވަހިކަން ދޭނީ ގޯތި ދައްކާފައި- އަސްލަމް

މާލޭ ރައްޔިތުންނަށް ބޯހިޔާވަހިކަން ދޭނީ ގޯތި ދައްކާފައި ކަމަށް ޕްލޭނިންގ މިނިސްޓަރ މުހައްމަދު އަސްލަމް ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރާ ސުވާލުކުރައްވަން ލިބުނު ފުރުސަތުގައި މެދުހެންވޭރު ދާއިރާގެ މެމްބަރު އަލީ އާޒިމް ވަނީ މާލޭ ރައްޔިތުންނަށް މި ސަރުކާރުން ދޭން ބުނި ބޯހިޔާވަހިކަމަށް މިއަދާހަމައަށްވެސް އެއްވެސް އަލިމަގެއް ފެނިފައިނުވާކަމަށް ވިދާޅުވެފައެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ހެދިގޮތަށް ހަމައެކަނި ލިޔުމެއް ދީފައި ނިންމާލުމަކީ މިސަރުކާރުގެ ވިސްނުންތޯ އާޒިމް ވަނީ ސުވާލުކުރައްވާފައެވެ.

އެސުވާލުގެ ޖަވާބުގައި މިނިސްޓަރ އަސްލަމް ވިދާޅުވީ، މާލޭގެ ރައްޔިތުންނަށް މި ސަރުކާރުން ގޯއްޗާއި ފްލެޓްވެސް ދޭނެ ކަމަށެވެ. މި ސަރުކާރުން މާލޭ ރައްޔިތުންނަށް ބޯހިޔާވަހިކަން ދޭނީ ހަމައެކަނި ލިޔުމަކުން ނޫންކަމަށާއި، އެކަން ކުރައްވާނީ ގޯތި ދައްކާފައި ކަމަށް މިނިސްޓަރ ވިދާޅުވި އެވެ.

" ގޯއްޗާއި ފްލެޓް ހަމަ ދޭނަން. ހަމައެކަނި ލިޔުމެއް ނޫން ދޭނީ. ގޯތި ދައްކާފަ އެކަން ކުރާނީ." މިނިސްޓަރ އަސްލަމް

މި ސަރުކާރުން ކުރިއަށް ގެންދާ ސޯޝަލް ހައުސިންގ މަޝްރޫއަށް އަލިއަޅުވާލައްވައި މިނިސްޓަރ އަސްލަމް ވިދާޅުވީ، ބައެއް ފްލެޓުތައް ސީދާ ވަންނަ މިންވަރަށް ނުނިމި ހުރެދާނެ ކަމަށެވެ. އަދި ބައެއް ފްލެޓުތަކުގެ މަސައްކަތް އެއްކޮށް ނިންމާލެވޭނެ ކަމަށެވެ.

އަސްލަމް އިތުރަށް ވިދާޅުވީ، މާލޭ ރައްޔިތުންގެ އުންމީދާ އެއްގޮތަށް ވަރަށް އަވަހަށް ގޯއްޗާއި ފްލެތްތައް ދެވޭނެ ކަމަށެވެ.