"ބޮޑު ބަދަލު" އިސްލާހީ އެޖެންޑާއަށް އާންމުންގެ ހިޔާލު ހޯދުމަށް ޚާއްސަ ވެބްސައިޓެއް!

ގާނޫނުއަސާސީއަށް ގެނައުމަށް ހުށަހަޅާފައިވާ މުހިންމު އިސްލާހުތަކާ ގުޅޭގޮތުން އާންމު ރައްޔިތުންގެ ހިޔާލާއި މަޝްވަރާ ހޯދުމަށްޓަކައި ޚާއްސަ ވެބްސައިޓެއް މިއަދު އިފްތިތާހުކޮށްފިއެވެ.

މި ވެބްސައިޓް ރަސްމީކޮށް އިފްތިތާހު ކޮށްދެއްވީ (މޯލްޑިވްސް ޑިމޮކްރަޓިކް ފާޓީ) އެމްޑީޕީގެ ޗެއަރޕާސަން، އަދި ކުރީގެ ރައީސް މުހައްމަދު ނަޝީދެވެ.

މިކަމާ ގުޅޭގޮތުން އެމްޑީޕީން އެކްސްގައި ކުރި ޕޯސްޓެއްގައި ބުނެފައިވަނީ، "ބޮޑު ބަދަލު" އިސްލާހީ އެޖެންޑާއާ ގުޅޭގޮތުން ހުށަހަޅާފައިވާ ކަންކަމަށް އާންމު ރައްޔިތުންގެ ހިޔާލާއި މަޝްވަރާ ހޯދުމުގެ މަސައްކަތް މިހާރު ރަސްމީކޮށް ފަށާފައިވާ ކަމަށެވެ.

މި ޕްލެޓްފޯމް މެދުވެރިކޮށް، ގާނޫނުއަސާސީއަށް ގެނައުމަށް ހުށަހަޅާފައިވާ ބަދަލުތަކާ ގުޅޭގޮތުން ރައްޔިތުންގެ އަގުހުރި ހިޔާލާއި އިރުޝާދު ހިއްސާކުރުމުގެ ފުރުސަތު މިވަނީ ހުޅުވާލެވިފައެވެ.

މި މަސައްކަތުގެ މައިގަނޑު މަގްސަދަކީ ގާނޫނުއަސާސީއަށް ގެނެވޭ ބަދަލުތަކަކީ ރައްޔިތުންގެ ބައިވެރިވުމާއި މަޝްވަރާއާއެކު ގެނެވޭ ބަދަލުތަކަކަށް ހެދުމެވެ. އެމްޑީޕީން ވަނީ ވީހާވެސް ގިނަ ރައްޔިތުން މި ވެބްސައިޓް މެދުވެރިކޮށް ހިޔާލު ހުށަހެޅުމަށް ދައުވަތު އަރުވާފައެވެ.

މިއީ ރާއްޖޭގެ ދިމިގްރާތީ ނިޒާމު ހަރުދަނާކުރުމަށާއި، ގާނޫނީ އޮނިގަނޑަށް ގެންނަންޖެހޭ މުހިންމު އިސްލާހުތައް ރައްޔިތުން ބޭނުންވާ ގޮތަށް ބައްޓަންކުރުމަށް އެޅުނު މުހިންމު ފިޔަވަޅެއްގެ ގޮތުގައި އެ ޕާޓީން ސިފަކުރެއެވެ.