ހާއްސަ އެހީ އަށް ބޭނުންވާ މީހުންނަށް ހޭހަންކުރުމުގައި އަމަލުކުރާނީ އަތުގުޅާލައިގެން: ރައީސް

މުޖުތަމައުގައި ޚާއްސަ އެހީ އަށް ބޭނުންވާ ފަރާތްތަކަށް ހޭހަން ކުރުމުގައި މަސައްކަތްކުރާނީ އެންމެން އެކީ އަތުގުޅާލައިގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ މިއަދު ފާހަގަކުރާ ދުނިޔޭގެ ޑައުން ސިންޑްރޯމް ދުވަހާ ގުޅިގެން ކުރެއްވި ޕޯސްޓެއްގަ އެވެ.

ރައީސްގެ ޕޯސްޓުގައި ވިދާޅުވީ އޯގާތެރިކަމާއި އެހީތެރިކަމުގައި ދިވެހީންނަކީ ލާމަސީލު ނަމޫނާއެއްކަމަށެވެ. އަދި މުޖުތަމަޢުގެ ޚާއްޞަ އަޅައިލުމާ ލޯބި ބޭނުންވާ ހަމަ ކޮންމެ ކުއްޖަކާއި ޢާއިލާއަކަށް ހޭހަންކޮށްދިނުމުގައިވެސް ސަރުކާރާއި ރައްޔިތުން މަސައްކަތްކުރާނީ އަތުގުޅާލައިގެންކަމަށް އެމަނިކުފާނު ވިދާޅުވިއެވެ.

ކޮންމެ އަހަރަކު ވެސް މާޗު މަހުގެ 21 ވަނަ ދުވަހު ފާހަގަކުރާ ވޯލްޑް ޑައުން ސިންޑްރޯމް ޑޭގެ މި އަހަރުގެ ޝިއާރަކީ "އިމްޕރޫވް އަވަރ ސަޕޯޓް ސިސްޓަމް" އެވެ. މިއީ ޑައުން ސިންޑްރޯމް ހުންނަ ފަރާތްތަކަށް މުޖުތަމަޢުގެ އެހީތެރިކަން ހަރުދަނާކުރުމަށާއި، ވަށާޖެހޭ އަދި އެންމެނަށް ވެސް ހަމަހަމަފުރުސަތުތަކެއް ފަހިވެފައިވާ ތައުލީމީ އަދި ސިއްހީ ޚިދުމަތްތައް ފަދަ އަސާސީ ކަންކަން ކަށަވަރުވުމެވެ.