ޕާކިސްތާނުގައި 11 ފުލުހަކު ޝަހީދުކޮށްލައިފި

ޕާކިސްތާނުގެ ޚައިބަރު ޕަޚްތުންޚުވާގައި ދިން ޓެރަރިސްޓު ހަމަލާއެއްގައި ފުލުހުންގެ އިސް އޮފިސަރަކު ހިމެނޭހެން 11 މީހަކު ޝަހީދުވެއްޖެ އެވެ.

ޕާކިސްތާނުގެ އުތުރުގައި އޮންނަ ޚައިބަރު ޕަޚްތުންޚުވާ އަވަށުގެ ކޮހާޓް ސަރަހައްދުގައި، ފުލުހުންގެ ޓީމަކަށް އަމާޒުކޮށް ދިން މި ނުރައްކާތެރި ޓެރަރިސްޓު ހަމަލާގައި ޑީ.އެސް.ޕީއަކާއެކު 11 ފުލުހުން ޝަހިދުވެ، އިތުރު 12 މީހަކު ޒަޚަމް ވެފައިވާ ކަމަށް މީޑިޔާ ރިޕޯރޓްތައް ބުނެ އެވެ.

ޕާކިސްތާނު ފުލުހުންގެ ތަރުޖަމާން މުޙައްމަދު ނުޢުމާން ސޭބް މައުލޫމާތު ދެއްވި ގޮތުގައި، މި ހަމަލާ އަމާޒުވެފައިވަނީ ގަވާއިދާ ހިލާފަށް ރަން ނަގަމުންދިޔަ ބަޔަކާ ދެކޮޅަށް އޮޕަރޭޝަނެއް ހިންގަމުންދިޔަ ބަޔަކާއި ދެކޮޅަށެވެ.

ތަރުޖަމާން ވިދާޅުވީ ކޮހާޓާއި ކަރަކް ގުޅޭ ސަރަހައްދުގެ ފަރުބަދަމަތީގައި ފިލާތިބި ހަނގުރާމަވެރިން ފުލުހުންނަށް ވަރުގަދަ ބަޑީގެ ހަމަލާތަކެއް ދީފައިވާއިރު، ފުލުހުން ދަތުރުކުރި 5 އުޅަނދެއްގައި ވަނީ ހުޅުޖަހައި އަންދާލާފައެވެ.

މި ޙަމަލާގައި މަރުވި ފަރާތްތަކުގެ ތެރޭގައި ގުމްބާޓް ސަރަހައްދުގެ ޑީ.އެސް.ޕީ ޙައިދަރު ޒަމާންގެ އިތުރުން ސަބް-އިންސްޕެކްޓަރ މުޚުތާރު ހިމެނޭކަން ފުލުހުންގެ އިދާރާއިން ވަނީ ކަށަވަރުކޮށްދީފައެވެ.

މި ހާދިސާއާ ގުޅިގެން ޑިސްޓްރިކްޓް ހެޑްކުއޯޓާޒް ޓީޗިންގ ހޮސްޕިޓަލް ކުއްލި ހާލަތަކަށް ގެނެސް، ޒަހަމްވި ފަރާތްތަކަށް އަވަސް ފަރުވާ ދިނުމުގެ މަސައްކަތް ދަނީ ކުރަމުންނެވެ.