އެމްޑީޕީ އެތެރޭގެ އިންތިހާބު: ވޯޓުލާން ރީ-ރަޖިސްޓްރީވުމުގެ ފުރުސަތު ހުޅުވައިލައިފި

ދިވެހި ރައްޔިތުންގެ ޑިމޮކްރަޓިކް ޕާޓީ، އެމްޑީޕީގެ މެންބަރުން ރީ-ރަޖިސްޓްރީވުމުގެ ފުރުސަތު ހުޅުވާލައިފިއެވެ.

މި ފުރުސަތު ހުޅުވާލާފައިމިވަނީ، އެ ޕާޓީން މީގެކުރިން އާންމުކުރި ވޯޓުލާ ލިސްޓަށް ޝަކުވާ ހުށަހެޅުމަށްފަހު އެކުލަވާލެވުނު ލިސްޓުގެ މައްޗަށް ބިނާކޮށެވެ.

މި އިއުލާނާއެކު، އާންމުކުރެވިފައިވާ ލިސްޓްގައިވާ މެންބަރުންނަށް އަލުން ރީ-ރަޖިސްޓްރީވެވޭނެއެވެ. އެގޮތުން، ރަށްވެހިވެފައިވާ ރަށް ނުވަތަ މާލެއަށް ވޯޓުލާ ތަން ބަދަލުކުރުމުގެ ފުރުސަތު ވަނީ ލިބިދީފައެވެ.

ރީ-ރަޖިސްޓްރީވުމަށް އެދޭ މެންބަރުން އަންނަ ނޮވެމްބަރު މަހުގެ 6 ވާ ހުކުރު ދުވަހުގެ 14:00 ގެ ކުރިން، އެމްޑީޕީގެ ޔެލޯ އެޕް މެދުވެރިކޮށް ރީ-ރަޖިސްޓްރީވުމަށް އެ ޕާޓީން ވަނީ އެދިފައެވެ.

ރާއްޖޭގައި މިވަގުތު އޮޕޮޒިޝަންގައި އޮތް އެންމެ ބޮޑު ސިޔާސީ ޕާޓީއަކީ އެމްޑީޕީއެވެ. އެގޮތުން، އެ ޕާޓީގައި މިވަގުތު ވެސް 55,000 އަށްވުރެ ގިނަ މެންބަރުން ހިމެނެއެވެ.